Bibliapiqa kanmi ancha allin consejokuna, ichaqa manan runaq munayninpichu chaykunaqa qelqakuran. Chaymi Bibliapuni nin: “Diospa simin qelqapi qelqasqa kaqqa llapanmi Diospa yuyaychasqan”, nispa (2 Timoteo 3:16). ¿Imakunan rikuchin Biblia Diospa yuyaychasqanpuni kasqanta? Wakinmanta yachasun.

•   Ñaupa tiempopi imakunachus pasasqanmanta Bibliaq willasqanqa cheqaqpunin, manataqmi pipas jayk’aqpas “manan chhaynachu” niyta atiranchu.

•   Bibliata qelqaq runakunaqa cheqaqllatan imatapas willakuranku, manataqmi imatapas pakarankuchu. Imapichus pantasqankutapas llapantan qelqaranku, chaymi Bibliaqa confianapaq jinapuni.

•   Bibliata askha runakunaña qelqaranku chaypas, juj temallamantan riman. ¿Imamanta? Dioslla runakunata gobernananpaq derechoyoq kasqanmanta, imaynata gobiernonwan kay pachapaq imachus munasqanta junt’ananmantawan.

•   Ñaupaq tiempopiña Bibliata qelqakuran chaypas, “ciencia” nisqawanqa k’apajtan tupan.

•   Imaymana qelqakunan rikuchin Bibliaq willasqan profeciakuna junt’akusqanta.