QALLARIYPI KAQ
¿Pikunan kanku Jehová Diospa testigonkuna?
“Unayñan Miketa reqsini, yachanitaqmi Jehová Diospa testigon kasqanta. Ichaqa tapukuqmi kani: ‘¿Pitaq Jehová? ¿Imaraykun Testigokuna mana fiestakunata festejankuchu?’, nispa. Ima sectamanchá Mikeqa haykunpas”. (Becky, Estados Unidos, California)
“Vecinoykunan Jehová Diospa testigonkunawan Biblia estudiayta qallarirqanku, hinan nirqani: ‘¿Imaraykutaq chay sutitari churakunku? ¿Ima ninantaq chay sutiri?’, nispa”. (Zenon, Canadá, Ontario)
“Esposaywanmi niq kayku: ‘Iglesianchisman mana risqanchisraykun Testigokunaqa paykunaq religionninkuman apawananchispaq hamushanku’, nispa. Hinaspapas niqmi kayku: ‘Manan allin reqsisqa religionpipas yachay munasqaykuta yachaykuchu, chaychu huk sectapi chaykunata yachaykuman’, nispa”. (Kent, Estados Unidos, Washington)
“Manan yacharqanichu pikuna kasqankuta, imapi creesqankutapas”. (Cecilie, Dinamarca, Esbjerg)
Yaqapaschá Testigokunata rikurqanki wasi-wasinta otaq callekunapi predicaspa, Bibliamanta qelqakunata rakispa otaq Bibliamanta estudiota munachispa. Yaqapaschá kay revistatapas huk Testigo qorqasunki. Hinaspa chay runakuna hina tapukushanki: “¿Pikunan kanku Jehová Diospa testigonkuna?”, nispa.
¿Yachayta munawaqchu imakunapi creesqaykumanta, ima qolqewan gastokuna pagasqaykumanta, imarayku wasi-wasinta callekunapipas predicasqaykumanta?
Cecilie nillantaq: “Internetman haykuspan imaymana qelqakunata paykunamanta leerqani. Hinaspapas imaymanatan uyariq kani, chaymi mana allinpaq paykunata rikurqani”, nispa. Ichaqa kikin Testigokunawan rimaspañan paykunata allinta reqsirqan.
¿Imaynapin cheqaqllata yachawaq Jehová Diospa testigonkunamanta? Paykunatapuni tapukuspa. Paykunan kay revistata ruwamunku, paykunan astawanqa sut’illanta imatapas willasunkiku (Proverbios 14:15). Qatimuq paginakunapin kay revista willashan pikuna kasqaykumanta, imapi creesqaykumanta, imata ruwasqaykumantawan.
