Pisi tiempollamantan kay pacha paraisoman tukunqa

“Yayayku hanaq pachapi kaq, sutiyki yupaychasqa kachun, Qhapaqsuyuyki [“Reinoyki”, NM] hamuchun, munayniyki kay pachapi ruwakuchun, imaynan hanaq pachapipas ruwakun hinata.” (Mateo 6:9, 10)

JESUSPA kay mañakusqantaqa “yayayku” nispa sutichakun, chay mañakuymi runakunaman huk sumaq suyakuyta qon.

Jesuspa mañakusqan hina, Reinonwanmi Diosqa munayninta ruwachinqa kay pachapi, imaynan hanaq pachapipas ruwachishanña hinata. Payqa munan kay tiyasqanchis pachata sumaq paraisoman tukuchiyta (Apocalipsis 21:1-5). Qhawasunchis imapuni chay Reino kasqanta, imaynatataq kay pachata paraisoman tukuchinantapas.

Diospa churasqan gobiernon

Diospa Reinonqa huk gobiernon. Huk gobiernotaq chayqa kananmi kamachikuqkuna, kamachikuykuna, kamachisqa runakunapas. Chaymi qhawasunchis Diospa gobiernonmanta Biblia imanisqanta.

¿Pikunan Diospa gobiernonpi kamachikuqkuna? Jehová Diosña Ancha Hatun Kamachikuq chaypas, Churin Jesucristotan churan gobiernonpi kamachinanpaq (Isaías 33:22; Mateo 28:18). Jesusqa Taytanpa yanapayninwanmi akllaran wakin runakunata “lliw ayllumanta, rimaymanta, llaqtamanta, suyumantawan”, paywan kuska ‘kay pachata kamachimunankupaq’ (Apocalipsis 5:9, 10).

¿Mayqenkunataq chay gobiernopi kamachikuykunari? Iskay t’aqa kamachikuykunan kan. Huknin t’aqa kamachikuykunan niwanchis imakuna ruwananchista. Jesusmi rimaran iskay aswan chaniyoq kamachikuykunamanta:  “‘Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan’. Chaymi aswan chaniyoq ñawpaqkaq kamachikuyqa. Iskaykaq aswan chaniyoqqa kaymi: ‘Runamasiykitan qan kikiykita hina munakunki’”, nispa (Mateo 22:37-39).

Hukninkaq t’aqapi kamachikuykunataq niwanchis imakunata mana ruwananchischu chayta. Chaykunamanta wakinmi kaykuna: “Ama pantaychischu. Qhelli huchapi puriqkunapas, ídolo yupaychaqkunapas, wasanchaqkunapas, warmiman tukuqkunapas, qharipura t’inkikuqkunapas, suwakunapas, payllapaq kananta munaqkunapas, machaqkunapas, yanqa tunpaqkunapas, ch’achukunapas, Diospa qhapaqsuyunmanqa [gobiernonmanqa] manan haykunqakuchu”, nispa (1 Corintios 6:9, 10).

¿Pikunatan chay gobierno kamachinqa? Pikunatachus Diospa gobiernon kamachinqa chay runakunatan Jesús tupachiran ovejakunawan. Khaynata niran: “Kunkayta uyarinqaku, ch’ulla t’aqallataq kanqa, huk michiqnillayoq”, nispa (Juan 10:16). Chay gobiernoq kamachikusqanpi kawsananchispaqqa manan simillanchiswanchu “Jesustan qatikuni” nina, aswanpas kasukunanchismi. Paymi niran: “Manan llapa ‘¡Señor! ¡Señor!’ niwaqniychu hanaq pacha qhapaqsuyumanqa haykunqa, aswanpas hanaq pachapi kaq Yayaypa munayninta ruwaqllan haykunqa”, nispa (Mateo 7:21).

Chay gobiernopi kawsayta munaqkunaqa rimanankutaq hatunchanankutaq Jehová Diospa sutinta, imaynan Jesuspas ruwaran hinata (Mateo 6:9). Chaymantapas hukkuna hukkunawan munanakunanku, chay gobiernomanta ‘allin willakuykunatapas’ runamasinkuman willananku (Mateo 24:14; 28:19, 20; Juan 13:35).

Chay gobiernoqa ‘kay pacha tukuchiqkunatan’ wañuchinqa

Reparasqanchisman hina Diospa Reinonqa pisi tiempollamantan kay pachamanta chinkachinqa tukuy imaymana mana allin kaqta. ¿Imaynapin chayta yachanchis? Iskay waranqa wata hinañan Jesús willaran imakunas sucedenan karan Diospa Reinon ‘qayllaykamushaqtin’ chayta (Lucas 21:31). Chaykunaqa teqsimuyuntinpiñan hunt’akushan ñawpaq kaq yachachikuypi willakusqan hina.

¿Imakunan chaymanta sucedenqa? Jesusmi niran: “Chay p’unchaykunaqa manchay ñak’ariymi kanqa, chay hinaqa manan hayk’aqpas kay pacha qallariymantapacha kunankama karqanchu, manataqmi kanqapaschu”, nispa (Mateo 24:21). Jesusqa manan rimasharanchu runakuna kay pachata tukuchinanmantachu, aswanpas Diospa gobiernon “kay pacha waqllichiqkunata [tukuchiqkunata]” wañuchinanmantan rimasharan (Apocalipsis 11:18). Chay runakunaqa allinnillankuta maskhaspan kay pachata tukuchishanku, chaymi kay pachamanta ‘t’irasqa kanqaku’. Diosta servispa kawsaq runakunan ichaqa ‘kay pachapi kashanqaku’ (Proverbios 2:21, 22).

¿Razonllawanchu Jehová Dios chaykunata ruwanqa? Arí. Kaywan rikch’anachisun. Wasiykipi askha inquilinoykikuna kan. Wakinmi munay sonqo respetakuq kanku, tiempollanpin pagasunkiku alquilermanta, alquilasqayki cuartokunatapas sumaqta cuidanku. Wakinmi ichaqa, mana qhawarikuq uma nanay kanku, manan alquilermanta pagasunkikuchu, tiyasqanku cuartokunatapas mana cuidankuchu. Askha kutitañan paykunata anyaranki chaykunamanta, ichaqa mana uyarisunkikuchu. ¿Imatan ruwawaq? Razonwanmi riki paykunata wasiykimanta qarqoruwaq.

Jehová Diosmi kamaran kay pachata, chaypi tukuy imaymana kaqkunatapas. Payllan ninman pikunachus kay pachapi tiyankuman chayta (Apocalipsis 4:11). Chaymi allintaña yuyaykun mana kasukuqkunata, runamasin ñak’arichiqkunatapas chinkachinanpaq (Salmo 37:9-11).

Diospa gobiernonmi kay pachata paraisoman tukuchinqa

Pisi tiempollamantan Diospa gobiernon, Jesuspa umallisqan, llapa runakunata kamachinqa. Jesuspa nisqan hina, chay tiempopin “tukuy imapas mosoqyachisqa [kanqa]” (Mateo 19:28). ¿Imaynataq kawsay kanqa Cristo kamachikamuqtin? Qhawasunchis Biblia imanisqanta:

 Salmo 46:9: “[Diosmi] teqsimuyuntinpi awqa-tinkuykunata [guerrakunata] qolluchin”.

Isaías 35:1: “Ch’inneqpas ch’aki pampapas kusikunqan, wakmanta t’ikarispan q’ochukunqa”.

Isaías 65:21-23: “Akllakusqaykunaqa llank’asqankuq rurusqantan kusisqa mikhunqaku. Manan yanqachu llank’anqaku”.

Juan 5:28, 29: “Aya p’ampanakunapi lliw [yuyarisqa] kaqkunaq [Jesuspa] kunkanta uyarinanku tiempon chayamunqa”.

Apocalipsis 21:4: “Diosmi paykunaq ñawinkumanta tukuy weqeta pichanqa, manan wañuypas kanqañachu, manallataqmi llakikuypas, waqaypas, nanaypas kanqañachu”.

¿Imaraykun chaykunapi iñisunman?

¿Hunt’akunqapunichu Bibliapi leesqanchis chay promesakuna? Diospa Simin Qelqan willaranña askha runakuna mana iñinankuta. Kay hinatan willaran: “Qhepa p’unchaykunapin millay asipayakuqkuna hamunqaku, kikinkuq millay munayninkuman hinataq kawsanqaku. Paykunan asikuspa ninqaku: Criston hamunanpaq prometewarqanchis, ¿maytaq hamunchu? Kurak taytakunaq wañukapusqanmantapachan lliw imaymanapas kaqllapuni kashan, imaynan kamay qallariymantaña karqan chay hinallapunin kashan, nispanku”, nispa (2 Pedro 3:3, 4.) Chay runakunaqa pantashankun chhaynata rimaspa. Kunanmi qhawasunchis imarayku Bibliaq nisqanpi iñisunman chayta:

(1) Ñawpaq tiempopiñan Jehová Diosqa mana allin runakunata wañuchiran kay pachata limpiananpaq. Noepa tiemponpi chhayna runakunata unuwan millp’uchiran (2 Pedro 3:5-7).

(2) Diospa Simin Qelqaqa mana pantaspan willaran kay tiempopi imakuna sucedenanmanta.

(3) Tukuy imapas manan ‘kamay qallariymanta’ hinachu kashan. Mana hayk’aq rikukusqan hinan kay pachapi rikukushan runakunaq mana allin kawsasqan, Hallp’a pachanchis qhellichasqa kasqanpas.

(4) Pachantinpi ‘allin willakuykuna’ predicakusqanwanmi yachanchis ‘p’uchukay chayamunanpaqña’ kasqanta (Mateo 24:14).

Bibliamanta astawan yachayta munanki chayqa, Jehová Diospa testigonkunawan estudiawaq. Chhaynapin astawan yachanki Diospa Reinon kamachikamuqtin, wiñay kawsayman aypanaykipaq ima ruwanaykita (Juan 17:3). Qhepamanqa tukuy imapas allinkaman kanqa. Pisi tiempollamantan kay tiyasqanchis pacha sumaq paraisoman tukupunqa. ¿Chaypi kayta munawaqchu?

[5 paginapi willakuy]

“Tukuy imapas kaqllapunin kashanqa” niqkunaqa pantasqatan rimashanku

[6 paginapi dibujo]

¿Chaypi kayta munawaqchu?