CHUNKA wata ñawpaqtan Gregoriowan Marilouwanqa Manila llaqtapi precursorkuna karqanku, chay tiempopiqa 30 más watankupin karqanku. Hinaspapas llank’anankupin ch’isiyaqta llank’arqanku, chaymi mana tiemponkuwan aypachikuqkuchu astawan predicanankupaq. Chayllamanmi Marilouta llank’asqan bancopi jefa kananpaq churarqanku. Paymi yuyarin: “Tukuy imaymanayoqmi karqayku”, nispa. Askha qolqeyoqtaq kapurqanku chayqa, huk sumaq hatun wasita ruwakunankupaqmi decidirqanku Manila llaqtamanta 19 kilómetro karupi. Chaymi huk contratota ruwarqanku wasi vendeq empresawan chunka watapi chay wasinkumanta paganankupaq.

Marilou willakun: “Mana tiempoyoqmi karqani jefa kasqayrayku chaymi pisita Dios serviyniypi ruwasharqani. Manan tukuy sonqoywanchu Diosta servisharqani”, nispa. Chaykunata reparaspan Gregorio Marilouwan rimanakurqanku imayna kawsasqankumanta. Gregorion willakun: “Jehová Diosta astawan serviyta munaspan kawsasqaykuta  cambiayta munarqayku mana wawayoqmi karqaykupas, ichaqa manan yacharqaykuchu imayna cambiayta, hinan Diospa yanapayninta mañakurqayku”, nispa.

Chay tiempopin discursokunapi iñiqkunata kallpacharqanku huk llaqtakunaman predicaq rinankupaq. Gregorion willakun: “Diosmi mañakusqaykuman kutichimusharqan”, nispa. Hinan Diospa yanapayninta mañakurqanku allinta decidinankupaq. Ichaqa rantisqanku wasiraykun sasa karqan decidinankupaq. ¿Imarayku? Chay wasimantaqa kinsa watañan pagasharqanku. Marilou willakun: “Manaña pagaspaqa wasiykuta, pagasqayku qolqetapas pierdepunayku karqan. Chaywanpas Diospa munayninta ruwanaykupaqmi decidikurqayku”, nispa. Apóstol Pabloq ruwasqantan yuyarirqanku, payqa tukuy imata saqespan Diospa Gobiernonmanta willarqan. Chaymi paykunaqa wasinkuta pierdepurqanku, llank’anankumanta lloqsipurqanku, cosasninkunata vendespataq karu llaqtaman astakurqanku (Filip. 3:8).

Gregoriowan Marilouwanqa yachasharqankun imachus kaqnillankuwan kawsayta, ichaqa chayasqanku llaqtapiqa aswan pisiwanraqmi kawsarqanku. Marilou willakun: “Sinchi llakisqan sientekurqani, chay llaqtapiqa mana luzqa karqanchu q’onchapitaqmi wayk’ukunay karqan, manan ñawpaq tiyasqay llaqta hinachu karqan”, nispa. Ichaqa sapa kutillanmi yuyarichinakurqanku imarayku chay llaqtapi kasqankuta, hinan tiempowanqa yachakapurqanku. Marilou willakun: “Kunanqa campota, ch’askakunata qhawarispan kusikuni... Hinaspapas runakunaqa kusisqan uyariwanku predicasqaykuta, chaymi astawanqa kusichiwan. Kay llaqtapin yacharqani imachus kaqnillaywan kawsayta”, nispa (Filip. 4:12).

Gregoriopas ninmi: “Chayasqayku llaqtapiqa tawa Testigokunallan karqan. Paykunaqa ancha kusisqan sientekurqanku sapa semana discurso qosqaywan, Diosman takinaykupaq guitarrayta waqachisqaywanpas”, nispa. Huk watallapin 24 Testigokunaña kapurqayku. Paymi nillantaq: “Iñiqmasiykunaq munakuwasqankuqa sonqoykutan llanllarichirqan”, nispa. 6 wata servisqanku qhepamanmi paykuna ninku: “Maytan kusikuyku Jehová Diospa llaqtanman askha runakuna haykumusqankumanta. Manan ñawpaqqa chay hinataqa kusikurqaykuchu”, nispa.

Filipinas nacionmanta 3.000 iñiqmasikuna maypichus predicaqkuna necesitakusqanman astakurqanku.  500 iñiqmasikunan soltera kanku. Hukninmi Karen.

Karenqa 25 watanpi hinan kashan, Baggao llaqtapitaq tiyarqan. Aswan sipasllaraq kashaspan astawan predicayta munarqan, paymi willakun: “Yacharqanin tukukuy p’unchaykunapi kashasqanchista Diospa Gobiernonmanta askha runakunaraq yachananku kasqantapas, chaymi yanapakuyta munarqani predicaqkunaq necesitakusqan llaqtapi”, nispa. Wakin familiankunan nirqanku: “Huk llaqtaman predicaq rinaykimantaqa universidadpi estudiay”, nispa. Karenmi ichaqa Jehová Diospa yanapayninta mañakurqan, rimarqantaq huk llaqtakunapi predicaq iñiqmasikunawan. Chaymi 18 watanpi kashaspa wasinmanta 64 kilómetro karupi tarikuq llaqtaman rirqan predicaq.

Karenpa chayasqan iñiq t’aqaqa orqokunapi tarikuq wasikunatan predicaq. Karenmi yuyarin: “Llaqtaymanta chay iñiq t’aqaman chayanaypaqmi kinsa p’unchayta purirqani orqokunata wichaspa, askha mayukunata chimpaspapas. Chaymantapas estudiantekunaq wasinman chayanaypaqmi soqta horasta purirqani, chaymi wasinkupi puñuq kani, kutimpunaypaqpas soqta horallatataq purirqani”, nispa. ¿Chay ruwasqan allinchu karqan? Karenmi asirikuspa nin: “Mayninpiqa chakiykunan nanawaq, ichaqa 18 estudiokunatan qorqani, chaypin rikurqani may sumaqchus Jehová Dios kasqanta”, nispa (Sal. 34:8.)

Sukhi sutiyoq soltera iñiqmasinchismi 40 más watanpi kashan, paymi Estados Unidosmanta Filipinas nacionman ripurqan. ¿Imaraykun chayta ruwarqan? 2011 watapin payqa huk hatun huñunakuyman rirqan, chaypin huk casarasqa iñiqmasita tapurqanku, hinan paykuna willarqanku yaqa llapa kaqninkuta vendespa Mexico nacionman predicaq ripusqankuta. Sukhi willakun: “Chay willasqankuta uyarisqaymi kallpachawarqan predicayniyta astawan mast’arinaypaq”, nispa. Chay qhepamanmi yacharurqan Filipinas nacionpi panjabí simipi predicaqkuna necesitakusqanta, payqa yacharqanmi chay simita, chaymi decidikurqan chayman rinanpaq. ¿Ima sasachakuykunapi tarikurqan?

Sukhi willakun: “Kaqniykunamanta imatas vendenay karqan imatas mana, chayta decidiyqa sasan karqan. Chaymantapas 13 watañan allin wasipi tiyarqani, chay qhepamanmi ichaqa familiaywan huk huch’uy wasiman astakurqani. Chhaynapi tiyasqay sasaña karqan chaypas yanapawarqanmi imachus necesitasqallaywan kawsanaypaq”, nispa. ¿Ima sasachakuykunapi tarikurqan Filipinas nacionpi? Paymi willakun: “Sinchitan manchakuq  kani imaymana ch’uspikunata. Chaymantapas llakikuqmi kani llaqtayta amigoykunata yuyarispa. Ichaqa chaypin yacharqani Jehová Diospi astawan confiayta”, nispa. ¿Allinchu chay ruwasqan karqan? Sukhi asirikuspa willakun: “Jehová Diosmi niwanchis: ‘Probaykuwaychis, ahinapin yachankichis hanaq pacha ventanakunata kicharispa saminchasqayta’, nispa. ¡Cheqaqpunin chayqa karqan! Chaytan repararqani predicasqayta uyariq runakuna niwaqtin: ‘¿Hayk’aqmi kutimunki? Imaymanamantan tapukuyta munayki’, nispa. Anchatan kusikuni Jehová Diosta reqsinankupaq runakunata yanapasqaymanta (Mal. 3:10). Filipinas nacionman rinaypaq decidikusqaymi sasaqa karqan, chay qhepamanmi ichaqa Jehová Diospa yanapayninta tukuypi rikurqani”, nispa.

Simen casarasqa cristianon, yaqa tawa chunka watanpi kashaspa Filipinas nacionmanta huk nacionman ripurqan allin llank’anata tarisqanrayku. Chaypin payqa iñiq t’aqata watukuq umalliq yanapayninta chaskirqan. Hinaspapas Umalliq T’aqamanta huknin iñiqmasiq discursontan uyarisqa, chaykunan paytaqa anchata kallpachasqa Dios serviyninta ñawpaqman churananpaq. Paymi willakun: “Llank’anay saqeytaqa sinchitan machakuq kani”, nispa. Chaywanpas saqepurqanmi llank’ananta hinaspan Filipinas nacionman kutimpurqan. Kunanqa esposan Haideewan kuskan predicaqkunaq necesitakusqan llaqtapi yanapakushanku. Sime willakun: “Anchatan kusikuni llank’anayta saqespa Diosta astawan servisqaymanta. Chay ruwaymantaqa manan imapas aswan allinqa kanchu”, nispa.

Ramilowan esposan Julietwanmi precursor kanku, paykunaqa yanapakuqmi rirqanku yaqa 30 kilómetro karupi tarikuq iñiq t’aqaman. Sapa semanan chiripipas parapipas motonkupi riqku huñunakuyman predicacionmanpas. Chayman rinankupaq sasaña karqan chaypas, kusikunkun chayta decidisqankumanta. Ramilon willakun: “Iskayniykumantan 11 estudiokunata qoshayku, predicaqkunaq necesitakusqan llaqtapi serviyqa manan facilchu ichaqa kusikuytan tarirqayku”, nispa (1 Cor. 15:58).

¿Munawaqchu serviyta maypichus necesitakusqan llaqtakunapi? Chhaynaqa iñiq t’aqakunata watukuq umallitan tapukuwaq hinaspapas leewaqmi “¿Yanapakuwaqchu Macedoniapi?” nisqa temata 2011 agosto killamanta Diosmanta Willasunchis qelqapi.