Onqosqa tarikuqtinchisqa familianchispa, amigonchiskunaq hinallataq iñiqmasikunaq sonqochayninmi yanapawasun.

Huk amigonchispa sumaqta rimaykuwasqanchisqa cuerpopaq hampi hinan sonqonchista “thak” niyachinman (Prov. 16:24; 18:24; 25:11). Ichaqa manan ñoqallanchischu munananchis hukkuna sonqochawananchista. Ñoqanchispas kallpachakunanchismi ‘ima llakipi kaqkunatapas Diospa sonqochawasqanchis sonqochaywan sonqochananchispaq’ (2 Cor. 1:4; Luc. 6:31). Mexico nacionpi iñiq t’aqakunata qhawariq Antonio iñiqmasinchismi chayta ruwarqan.

Payqa yawarninpi cáncer kasqanta (linfoma) yacharuspan sinchitapuni llakikurqan. Ichaqa kallpachakurqanmi llakikuyninwan ama ñit’ichikunanpaq. ¿Imatan ruwarqan? Diospaq takikunata yuyarispan takiq, chay takikunaq nisqanpitaq yuyaymanaq. Hinaspapas kunkawanmi Bibliata leeq Diosmantapas mañakuq.

Ichaqa iñiqmasikunas astawanqa yanapasqa. Paymi nin: “Ñoqatawan esposaytawan llaki ñit’iwaqtinkun huk umallita wahaq kayku ñoqaykuwan kuska mañakunanpaq, chay umalliqa familiaykun karqan. Chaymi kallpachawaqku, hinan ‘thak’ sientekuq kayku. Familiaykuq iñiqmasikunaq yanapayninwan iman pisi-pisimanta llakikuyniyku pisiyarqan”, nispa. Payqa anchatan agradecekurqan munakuq khuyapayakuq amigokunayoq kasqanmanta.

¿Iman yanapawallasunmantaq? Jesuspa prometesqan santo espiritun, chaytan apóstol Pedro nirqan Diospa ‘qokuynin’ nispa (Hech. 2:38). 33 wata Pentecostés fiesta p’unchaypin Jesusta qatikuqkuna chay qokuyta chaskirqanku. Kunanpas chay qokuyta mañakuqtinchisqa tukuy necesitasqanchistan chaskisun. Chhaynaqa, ¿manachu qanpas chay santo espirituta mañakuwaq? (Is. 40:28-31.)

Apóstol Pablon sinchi sasachakuykunapi tarikurqan, mayninqa wañuy patapi imaraq (2 Cor. 1:8-10). Ichaqa Jehová Diospa yanapayninpin confiakurqan, chaymi mana wañuytapas manchakurqanchu. Kaytan qelqarqan: “Yupaychasqa kachun Señorninchis Jesucristoq Yayan Diosqa, payqa khuyapayakuq Yayan, tukuy imapi sonqochakuq Diostaq. Diosmi tukuy llakikuyniykupi sonqochawanku”, nispa (2 Cor. 1:3, 4). Sinchi sasachakuykunapiña tarikurqan chaypas payqa manan payllapichu yuyaykurqan, aswanmi sasachakuyninkunata qhawarispa hukkunapi yuyaykurqan. Chaymi yanaparqan hukkunata sonqochaykunanpaq.

Antonio iñiqmasiqa onqoyninmanta qhaliyaspan yapamanta iñiq t’aqakunata qhawarirqan. Payqa ñawpaqmantapachan iñiqmasikunapi interesakuq, qhaliyapusqan qhepamanmi ichaqa astawan kallpachakurqan onqosqakunata sonqochananpaq. Huk kutinmi onqosqa iñiqmasita visitaspa yacharurqan chay iñiqmasi manaña huñunakuyman riy munasqanta. Paymi nin: “Payqa munakurqanmi Diostapas iñiqmasikunatapas, ichaqa onqosqa kasqanwanmi pisipaq qhawarikuq”, nispa.

Qaynakunalla kusirikunapaq huñunakuy ruwasqankupin Antonio nirqan: “Mañakuwaqchu Diosmanta”, nispa. Onqosqa iñiqmasitaq manaña atiqpaqchu qhawarikurqan chaypas, mañakurqanmi. Antonio nin: “Ancha sumaqtan mañakurqan, chay qhepamantaq allin sientekurqan”, nispa.

Llapallanchismi mayninqa ñak’arirqanchis ima onqoywanpas. Ichaqa Pabloq nisqan hina, ñak’ariypi tarikusqanchismi yanapawasun chay hinapi tarikuqkunata sonqochananchispaq. Chayrayku kallpachakusun ima onqoywanpas ñak’ariq iñiqmasikunapi interesakuspa Jehová Dios hina sonqochanapaq.