Efesios 6:1-24
6 Wawakuna, Señorpa munasqanman jina tayta-mamaykichista kasukuychis,+ chay ruwaytaqa chaninpaqmi Diosqa qhawarin.
2 Ñaupaq kaq promesayoq kamachikuymi nin: “Tayta-mamaykitan sumaqta qhawarinki”,+ nispa. Chay kamachikuypa promesantaq khayna:
3 “Chhaynapin allillan kanki, unaytataq kay pachapi kausanki”, nisqa.
4 Taytakuna, ama wawaykichista colerachiychischu,+ aswanpas sumaqta uywaychis Jehová* Diospa nisqanman jina wanachispa* yachachispa ima.+
5 Kamachikuna, patronniykichista tukuy sonqowan ancha respetowan ima kasukuychis,+ imaynan Cristotapas kasukunkichis jinata,
6 ichaqa amayá jujkunaq rikunallanpaqchu kasukuychisqa, runakunata kusichiyta munaqkunallan chaytaqa ruwanku,+ aswanpas Cristoq kamachinkuna jina, tukuy almawan* Diospa munayninta ruwaqkuna jinapuni kasukuychis.+
7 Arí, tukuy sonqowan paykunata serviychis, Jehová* Diostapas servishawaqchis jinata,+ ama runakunatapas servishawaqchis jinachu.
8 Yachasqaykichis jina, kamachikunamanpas libre kaqkunamanpas ima allinpas ruwasqankumantaqa Jehová* Diosmi kutichipunqa.+
9 Qankunapas patronkuna, chhaynata kamachiykichistaqa qhawariychis, amataq manchachiychischu. Yachasqaykichis jina, qankunaqpas paykunaqpas patronniykichisqa janaq pachapin kashan,+ payqa manataqmi pimanpas sayapakunchu.
10 Chhaynaqa, chaskishallaychis atiyta+ Señorpa ancha jatun kallpanmanta.
11 Chaymantapas Diospa qosqan llapallan maqanakuna p’achawan churakuychis,+ chhaynapi yachaysapa kayninpi Saqraq churasqan trampakuna contra qaqata sayanaykichispaq.
12 Noqanchisqa guerrapin kashanchis,+ ichaqa manan runakunawanchu, aswanpas gobiernokunawan, autoridadkunawan, kay laqhayaq* pachapi kamachikuqkunawan iman; chaykunaqa janaq pachapi kaq millay espiritukunan kanku.+
13 Chayrayku, Diospa qosqan llapallan maqanakuna p’achawan churakuychis,+ chhaynapi mana allin p’unchaypi ama pisipanaykichispaq, aswanpas tukuy ima ruwanaykichista junt’aspa qaqata sayanaykichispaq.
14 Chhaynaqa, qaqata sayaychis cheqaq kay chumpiwan allin chumpiykusqa,+ chanin kay qhasqo* jark’anawan churaykusqa,+
15 allin usut’asqa ima; allin usut’asqa kaspaqa listollan kashankichis thaj kay allin willakuykunata willanaykichispaq.+
16 Chaymantapas iñiyniykichista jatun jark’apakuna escudota jina jap’iychis,+ chaywanmi Satanaspa llapa raurashaq flechankunata thasnunkichis.+
17 Salvasqa kanaykichiswanpas cascowan jina churakuychis,+ jinallataq espirituq espadantapas allinta jap’iychis, chay espadaqa Diospa siminmi.+
18 Chaymantapas tukuy imaymana mañakuykunawan,+ rogakuywan ima Diosmanta imay ratupas espirituwan mañakushallaychis.+ Chaypaqqa rijch’asqallan kashanaykichis tukuy tiempo llapa iñiqkunapaq rogakuspa.
19 Noqapaqpas mañapuwaychis rimaqtiy Dios simita qowananpaq, chhaynapi allin willakuykunamanta pakasqa ch’uya yachayta mana manchakuspa rimanaypaq.+
20 Chayta willanaypaqmi Diosqa kachamuwarqan, chayraykutaqmi presopas kashani;+ chayrayku Diosmanta mañapuwaychis imaynachus rimanayta jina ama manchakuspa rimanaypaq.
21 Señorpa junt’aq kamachin munasqa iñiqmasinchis Tiquicon+ lliuta noqamanta willasunkichis,+ imaynapichus tarikushani chayta, imakunatachus ruwashani chaykunatawan.
22 Paytan qankunaman kachamushaykichis imaynachus kashasqaykumanta willanasuykichispaq, llakikuyniykichispi kallpachanasuykichispaqwan.
23 Llapa iñiqmasinchiskunawan kachun Taytanchis Diosmanta, Señor Jesucristomantawan jamuq thaj kaypas, iñiywan munakuypas.
24 Pikunachus Señorninchis Jesucristota mana tukukuq munakuywan munakunku chaykunapaq kachun Diospa ancha sumaq sonqo kaynin.
Uraypi willakuykuna
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Qhaway “Astawan yachanapaq A5” nisqata.
^ Laqhayaqtaqa “tutayaq” nillankutaqmi.
^ Qhasqotaqa “pecho” nillankutaqmi.
