YAQA llapanchikmi sasachakuypi kaspaqa amistadninchikta otaq pitapas maskanchik yanapawananchikpaq. Munanchikmi amistadninchikqa experienciayoq chaynataq llakipayakuq kananta.

Orakunankupaqpas wakinqa chaynatam ruwanku. Jehova Diosqa tukuy atiyniyoq otaq llumpay karupi kasqanta piensaspankum santokunata mañakunku. Piensankum santokunaqa runakunapa ñakarisqanman hina ñakariykunata pasasqankuwan astawan llakipayakuq kasqankuta. Ejemplopaq, wakinqa kuyasqanku kaq imapas chinkaruptinqa san Antonio de Padua nisqanku taytachatam mañakunku, piensankum payqa chinkasqa kaqkunata rikurichiq kasqanta. Wakinñataqmi animalninku umpuyaruptin mañakunku san Francisco de Asís nisqanku taytachata. Imankupas chinkaruptin llumpay hukmanyasqa kaspañataqmi san Judas Tadeo nisqanku taytachata mañakunku.

¿Bibliachu yachachin santokuna mañakuyta? ¿Diosqa uyarinchu santontakama mañakusqankuta? ¿Allinpaqchu qawan chayna mañakusqankuta? Kaymanta yachayqa ancha allinmi Dios uyariwananchikmanta yachanapaq.

Santokunata mañakuyqa catolica religionpa yachachisqanmi, huk qellqam nin: “Santokunata mañakusqaqa paykunam Diosta ruegakunku kay pachapi imapas yachasqankumanta”, nispa (Catecismo de la Iglesia Católica). Diospa qayllanpi tarikusqankuta piensaspankum paynintakama Diospa favornin chaskiyta munanku.

¿Chaynatachu Bibliaqa yachachin? Wakinqa chayna yachachisqantam piensanku apostol Pablopa qellqasqankunapi hapipakuspa. Roma llaqtapi kaq iñiqmasinkunamanmi kaynata qellqarqa: ‘Wawqe-panillaykuna, Señorninchik Jesucristoman iñisqanchikraykum hinaspa chuya Espiritu kuyanachiwasqanchikraykum ruegakamuykichik ñoqapaq tukuy sonqowan Diosta mañaysiwanaykichikpaq’, nispa (Romanos 15:30). ¿Pabloqa iñiqmasinkunatachu orakuchkarqa paypa favorninpi Diosta mañapunankupaq? Manam. Pabloqa nichkarqam paypa favorninpi huk cristianokunapas Diosta mañapunanpaq. Diosman oracionnintakama asuykunapaqqa manam santokunatachu mañakunanchik. ¿Imanasqataq mana chaynataqa ruwanachu?

 Jesusmi nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6). Chaymantapas nirqam: ‘Taytaymi qosunkichik ñoqapa sutiypi llapa ima mañakusqaykichikta’, nispa (Juan 15:16). Jesusqa manam nirqachu payta mañakuptinchik taytanman willananpaq kasqanmantaqa. Mañakusqanchikta Jehova Dios uyariwananchikpaqqa Jesuspa sutinpim mañakunanchik, paynintakamallam Diosqa uyariwanchik.

Huk kutipim discipulonkuna imayna mañakunankupaq Jesusta nirqaku, chaymi pay nirqa: “Diosta mañakuspaqa kaynatam ninkichik: ‘Taytayku, sutiki yupaychasqa kachun’”, nispa (Lucas 11:2). Chaymi sapa orakuspanchik Jehova Diosta mañakunanchik manam Jesustachu nitaq santokunatachu. Jesuspa yachachisqanman hinam paypa sutinpi Jehova Diosta mañakunanchik, manam santokunapa sutinpichu.

Chaymantapas mañakuspanchikqa Diostam yupaychanchik payllatam yupaychananchikqa manam hukkunataqa, chaytam Bibliaqa yachachin (Juan 4:23, 24; Apocalipsis 19:9, 10).

Jesusmi Ancha Reqsisqa Yachachikuyninpi rikchanachispan willakurqa huk warmacha taytanta mikuy mañakusqanmanta hinaspam nirqa: “Churikichikmanqa ¿yaqachum rumita qoykuwaqchik tantata mañakusuptikichik otaq culebrata, challwata mañakusuptikichik?”, nispa (Mateo 7:9, 10). Manachá chaykunataqa qonmanchu kuyakuq taytaqa.

Astawan entiendenapaq kaypi piensarisun. Churikiwan anchata sientenakuwaq chaynataq ima willasusqaykitapas uyarinaykipaq anchata kallpanchakuwaq. Ichaqa imayna kasqaykita manchakuspan huk runantakama imatapas mañakusunkiman. ¿Imaynataq sientekuwaq sapa kutilla chaynata mañakusuptikiqa? ¿Allinpaqchu hapiwaq chayna ruwayninta? Manachá. Kuyakuq taytaqa munanmi kikin churin rimapayananta chaynataq ima munasqantapas mañakunanta.

Chay rikchanachiypi taytanta mikuy mañakuq warmachamanta rimaspanmi Jesusqa uyariqninkunata piensarichirqa kaynata nispan: “Qamkunaqa mana allin runakuna kachkaspam churikichikmanqa allin kaqkunata qonkichik ¿chaychu mañakuqkunamanqa hanaq pachapi kaq Taytaykichik mana qosunkichikman allin kaqkunata?”, nispa (Mateo 7:11). Runakuna allin kaqkunata churinman qoptinqa astawanraqmi Jehova Diosqa mañakusqanchikta uyarispan chayman hina qowanchik.

Pantaq kasqanchikwan hukmanyasqa tarikuptinchikpas Diosqa munanmi paytapuni mañakunanchikta. Mañakusqanchikkunataqa kikinpunim uyariwanchik. Bibliam niwanchik: “Tayta Diosmanyá qoykuy preocupasqa kasqaykitaqa. Payñam cuentallikunqa qanmantaqa”, nispa (Salmo 55:22). Santokunata mañakunanchikmantaqa kikin Jehova Diostam confianzawan mañakunanchik.

Taytanchik Jehova Diosqa sapakamatam qawariwanchik. Payqa munanmi ima sasachakuynichikpipas yanapawayninchikta chaymi kallpanchawanchik payman asuykunanchikpaq (Santiago 4:8). ¡Mayna allinmi ‘mañakusqanchik uyariykuq’ Taytanchik Jehova Diosman asuykuyqa! (Salmo 65:2.)