Nacerqanim Ohio mayupa patan Moundsville llaqtapi, chayqa kachkan Virginia Occidental norte lawpim. Ñoqaykuqa karqaniku kimsa qari hinaspa huk warmim, ñoqañataqmi mayorniykupa qatiqnin karqani. Wasiykupiqa kusisqam kawsakurqaniku. Tayta-mamayqa confianza hinaspa allin llamkaq runakunam karqaku, mana apu kaptiykupas manam imaykupas pisipuwaqkuchu. Jehova Diospa testigon kasqankuraykum warmacha kasqaykumantapacha Bibliamanta yachachiwanankupaq anchata kallpanchakuqku.

Wiñasqayman hinam ichaqa Bibliapi yachasqaykunamanta karunchakururqani. Bibliapa yachachikuyninkuna allinniypaq kasqanmantam iskayrayarqani. Libre kaspay cheqappuni kusisqa kawsanaypaqmi piensarqani. Chaymi huñunakuyman riytaqa saqerurqani, wawqeywan paniypas ñoqatam qatipakuwarqa. Tayta-mamaykuqa tukuytam ruwaqku yanapawanankupaq, ichaqa chay ruwasqankutam mana kasukurqanikuchu.

Manam piensayllapas piensarqanichu libre kay munasqay vicioman apawanantaqa. Huk punchawmi estudiasqaymanta wasiyman kutichkaptiy huk amistadniy cigarrota munachiwarqa, hinaptinmi chaskikuykurqani. Chaymantapacham qallaykurqaniku drogakuyta, trago tomayta hinaspa huchapakuytapas. Watakuna pasasqanman hinam tukuy rikchaq drogakunata mallirqani hinaspam wakinkunataqa mana saqeyta atirqanichu. Chay vicioykunata paganaypaqmi drogatapas rantikuq kani.

Concienciaypi hawkayayta munaptiypas mana allin ruwasqaymantam sapa kuti yuyarichiwaq. Ñoqam ichaqa nirqani: “Ruwasqaytaqa manañam allichayta atiymanñachu”, nispa. ¡Achka kutitamá llumpay llakisqa hinaspa sapallaypi hina tarikurqani achka runakuna fiestakunapi kachkaptinpas! Wakinpim yuyariq kani tayta-mamay allin runakuna kasqanta, hinaspam tapukuq kani imanasqa kayna kawsasqaymanta.

Mana valeqpaq hinam sientekurqani, ichaqa manam lliwchu chaynata piensarqaku. 2000 kaq watapim tayta-mamayqa Jehova Diospa testigonkunapa asambleaman rinaypaq invitawarqaku. Mana munastinpas hinatam rinaypaq nirqani. Diospa llaqtanmanta karunchakuruq wawqeywan paniypas asambleaman rinankupaqmi nirqaku.

Chay asambleapi kaspaymi yuyarirqani huk wata ñawpaqta hina chaypi takiqkuna uyariq hamusqayta. Ichaqa asambleapi kasqaymi sonqoyman chayarurqa. Takiqkunata uyariq riptiyqa tukuy lawpim qachallaña kakurqa hinaspapas cigarrollañam asnakurqa. Runakunapas karqa millakuypaqmi hinaspa taki uyarisqaykupas hukmanyachikuqllañam. Asambleapim ichaqa kusisqa runakunawan tarikurqani, wakinkunawan unay watakunaña mana tupachkaptiypas kusikuywanmi chaskiykuwarqaku. Chay sitioqa limpiom karqa, yachachikuykunapas kallpanchakuqllañam karqa. Bibliapa yachachikuyninkuna allin yanapakuq kasqanta qawaspaymi tapukurqani imanasqa qepanchasqaymanta (Isaias 48:17, 18).

Chayllam Diospa llaqtanman kutimunaypaq tanteakururqani. Wawqeywan paniypas chaytam ruwarqaku, asambleapi uyarisqankum paykunatapas yanaparqa. Kimsaykum Biblia estudiayta qallaykurqaniku.

Santiago 4:8 nisqanmi sonqoyman chayarurqa, chaypim nin: “Diosman asuykuptikichikqa paypas asuykusunkichikmi”, nispa. Diosman asuykuyta munaspayqa tukuy mana allin ruwasqaykunatam saqenay karqa. Saqenaytaqmi karqa cigarro pitayta, drogakuyta hinaspa trago tomaytapas (2 Corintios 7:1).

Ñawpaq amistadniykunawanqa manañam hukllawakurqaniñachu aswanmi Jehova Diosta serviqkunawanña amistadta ruwarqani. Bibliamanta yachachiwaqniy ancianom anchata yanapawarqa. Telefonowanmi qayamuwaq hinaspam watukamuwaq imayna kasqaymanta tapuwananpaq. Kunankamapas ancha allin amistadniymi.

2001 kaq watapim Diosman qokusqayta qawachirqaniku wawqeywan hinaspa paniywan kuska Jehova Diospa testigon kanaykupaq bautizakuspayku. Tayta-mamaywan sullka kaq wawqeyqa anchatam kusikurqaku familiaypi llapallaykuña Diosta servisqaykumanta.

Bibliapa nisqan sasa kasukunapaq kasqantam ñawpaqtaqa piensarqani, kunanmi ichaqa imayna yanapawasqanta qawani. Biblia estudiasqaymi yanapawarqa manaña drogakunaypaq, drogata manaña rantikunaypaq hinaspa allin runa kanaypaqpas.

Anchatam kusikuni Jehova Diosta serviq runakunawan kuska kasqaymanta, paykunaqa tukuy sonqonkuwanmi kuyanakunku (Juan 13:34, 35). Diospa llaqtanpitaqmi Adrianne señoraytapas reqsirurqani, payqa Diospa qowasqanmi. Paytaqa kuyanim hinaspapas respetanim, iskayniykum Diosta servispayku kusisqa tarikuniku.

Ñawpaqpi ruwasqaykunata hinalla ruwanaymantaqa, tukuy tiempoywanmi kunanqa Diospa Palabranmanta yachachichkani. Kay ruwasqayqa anchatam kusichiwan. Mana iskayrayaspam niyman vidayta Biblia cambiasqanmanta. ¡Kunanmi ichaqa cheqapta niyman libre kasqayta!