Diosman asuykuychik

Jehová Diosqa chaninchanmi humilde kaytaqa

Numeros 12:1-15

KAY pachapi imatapas haypay munaq runakunaqa kikillanpaq munaq hinaspa hatunchakuqmi kanku. Chayna kayqa, ¿yanapawanchikchu Diosman asuykunapaq? Manamá. Payqa munanmi serviqninkuna humilde kanankuta. Chaypaq qawasun Numeros libropa 12 capitulonta. Chaypim willawanchik Egiptomanta israelitakuna lloqsiruptinku Sinai chunniq lawpi ima pasasqanmanta.

Moisespa sullkan Aaronmi, Mariawan ‘Moisespa contranpi rimayta’ qallaykurqaku (1 versiculo). Moisespa contranpi rimasqankumanta Biblia nispanqa, yaqapaschá runakunapa qayllanpi rimasqankumanta nichkarqa. Ichapas Maria rimayta qallaykurqa, paymantam Bibliaqa puntata rimachkan. Chaynataqa rimarqa, Cus nacionniyoq warmiwan Moises casarakurusqanraykum. ¿Envidiakuchkarqachu Maria? ¿Munachkarqachu payllata israelitakuna allinta qawananta?

Nirqakumá: “¿Diosqa Moisesnintakamallachu rimarqa? ¿Manachum rimarqa ñoqanchiktakamapas?”, nispa (2 versiculo). Paykunaqa yaqachusmi imallapipas kamachiq hinaspa reqsisqa kayta munarqaku.

Moisesmi ichaqa pacienciakuspan tukuy rimasqankuta aguantarqa, kaymi qawachin Bibliapa nisqanman hina “ancha humillakuq” kasqanta (3 versiculo). * Moisesqa manamá kutipakurqachu, aswanmi Diosman saqerqa.

Diospaqqa chayna rimasqankuqa paypa contranpim karqa. Moisestaqa Jehová Diosmi llaqtanta pusananpaq churarqa. Chaymi Mariatawan Aaronta corregispan yuyarichirqa Moiseswan allin amistad kaspan, ‘uyapura rimasqankumanta’. Hinaspam tapurqa: “¿Imanasqamá manaqa manchakurqankichikchu [. . .] Moisespa contranpi rimaytaqa?”, nispa (8 versiculo). Hinaptinqa Diosmantapunim mana allinta rimachkarqaku. Chaymi Diospa castigonta chaskinanku karqa.

Lepra onqoywan Maria castigasqa kaptinmi, Aaronqa Moisesta ruegakurqa Diosta mañakuptin sanoyaykachinanpaq. Kunanqa Moisesmantañamá sanoyayninqa karqa. ¿Imatam payqa rurarqa? Jehová Diostam sanoyaykachinanpaq mañakurqa, chaywanmi yapamanta qawachirqa kuyapayakuq, humilde hinaspa pacienciakuq kasqanta. Mariaqa sanoyarurqamá, ichaqa israelitakunamantam penqakuypaq 7 punchaw rakisqa karqa.

Kaymi yachachiwanchik imayna kayta Dios cheqnisqanta hinaspa munasqantapas. Diosman asuykuyta munaspaqa, saqenanchikmi hatunchakuyta, kikillanchikpaq munaytapas. Yuyariyá, Jehová Diosqa anchatam kuyan humildetawan llampu sonqo runataqa. Paymi nin: “Ñakariqmi [otaq humildem] ichaqariki dueñoyanqa allpatapas. Paykunaqa kusikuywanmi hawkayaypi kawsanqapas”, nispa (Salmo 37:11; Santiago 4:6).

[Willakuy]