KAYPI yuyaymanay: Riqsisqa huk warmipa vidanmantam videota qawachkawaq. Chay videom qallarin warmacha kasqanmanta chay warmi taki tocaqña kasqanmanta. Chaymantañataqmi wiñaruspanqa hatun llaqtakunapiña tocastin purin, chaymi paytaqa runakuna alabanku. Chaymantam ichaqa yuyaqyaruspa wañukun.

Chaynam riqsisqa runakunapa vidanmanta videokunallapiña kunanqa qawanchik, unayña wañukusqankurayku. Wakinkuqa karqakum llallinakuypi allin kallpaqkuna chaynataq yachaysapa runakunapas. Tukuy ima ruwasqankumanta yachaspanchikmi tapukunchik: “¿Imakunataraq ruwanman karqa mana yuyaqyaspanqa utaq mana wañukuspanqa?” nispa.

Arí, llapallanchikmi wañuqlla kanchik (Eclesiastes 9:5). Manam imataña ruwaspapas wañuymantaqa librakuchwanchu, manataqmi ima ruwaytapas atichwanchu mana yuyaqyanapaqqa. Wakinpiqa qunqayllamantam imapas pasaruwaptinchik utaq ima unquywanpas wañuruchwan. Chaymi bibliapa nisqanman hinaqa kanchik ‘huk rato rikuriramuspa chinkaruq puyu hinalla’ (Santiago 4:14).

Chaymi runakunaqa kaynata ninku: “Mikukusun, tomakusun paqarinmi wañukusun”, nispa (1 Corintios 15:32). Chaynata nispankuqa huk punchaw wañurunanchikmantam yachanku. Chaymi sasachakuypi tarikuspaqa tapukunchik: “¿Wañunallanchikpaqchu Diosqa unanchawarqanchik?”, nispa. ¿Maypitaq chaymanta yachachwan?

Chaymanta yachanankupaqmi wakin runakunaqa yachaysapa runakunapa nisqanpi hapipakunku. Yachaysapa runakunapa hinaspa doctorkunapa hampi ruwasqankum yanapawanchik huk watallapas kawsakunapaq. Chayta qawaspam wakin doctorkunaqa unay wata kawsachikuq hampi ruwaypi kallpanchakuchkanku. Chaywanpas, hinallam yachayta munanchik imanasqa yuyaqyasqanchikmanta hinaspa wañusqanchikmanta, yachaytataqmi munanchik sichu haykallapipas wañuy chinkananmanta. Qatiqnin yachachikuykunapim chaykunamanta yachasun.