Pablo Jerusalenman chayaruptinmi chiqniqninkuna presocharurqaku. Carcelpi kachkaptinmi Pablota musquyninpi hina Jesus kaynata rimapayarqa: “Roma llaqtaman rispaykim, chaypi willakamunki”, nispa. Chay carcelmantam aparqaku Cesarea llaqtaman, chaypim iskay wata presochasqa karqa. Huk kutipim kamachiq Festo sutiyuq runata Pablo nirqa: “Roma nacionta kamachiqmanmi riyta munani mana huchayuq kasqayta qawachinaypaq”, nispa. Hinaptinmi Festo nirqa: “Chaynaqa Roma nacionta kamachiqmanmi rinki”, nispa. Chaymi Pablotaqa buqueman qispiykachirqaku Romaman rinanpaq. Paytam riysirqaku Lucaswan Aristarco.

Lamar quchapi kachkaptinku llumpay wayra-para kasqanraykum runakunaqa wañunankutaña piensarqaku. Chaymi Pablo nirqa: “Ama manchakuychikchu, ¡manam wañusunchu! Diospa angelninmi niwarqaña Roma llaqtaman llapanchik hawkalla chayananchikmanta”, nispa.

14 punchaw sasachakusqankumantam Malta sutiyuq islata karullamantaraq rikururqaku. Chayman manaraq chayachkaptinkum buquenku wichirirurqa, chaywanpas 276 riqkunaqa nadiaspankum allinlla chayarurqaku. Chaypi yachaqkunam ninata ratachirqaku quñikunankupaq.

Kimsa killamantam soldadokunaqa Pablota huk buquepiña Romaman aparqaku. Chayaruptinmi iñiqmasinkuna suyachkasqaku, chaymi paykunata qawaykuspan Pabloqa kallpanchasqa tarikurqa hinaspapas Diostam agradecekurqa. Pabloqa alquilasqa wasipim iskay wata presochasqa karqa soldadokunapa qawasqan. Haykam watukuqnin runakunamanmi Pabloqa Diospa munaychakuyninmanta hinaspa Jesusmanta yachachirqa. Chaymantapas Pabloqa cartakunatam qillqarqa Asia Menor hinaspa Judea lawpi yachaq iñiqmasinkunapaq. Jehova Diospa yanapakuyninwanmi Pabloqa achkallaña runakunata yanaparqa Diosmanta yachanankupaq.