Jehova Diospa testigonkunaqa kay tiemponchikpim Diosmanta yachachikuykunata astawan chaskichkanchik videokunapi uyarinapaq kaqkunapi, chaypaqqa internettam servichikunchik. Ichaqa huklaw llaqtachakunapi kaq iñiqmasinchikkunaqa internet pagaytam mana atinkuchu utaq internetpa mana kasqanpi yachallanku.

 Kunanqa achka iñiqmasinchikkunañam mana internetllawan chay yachachikuykunata celularninkupi qawayta utaq ñawinchayta atichkanku. Chaypaqqa, ¿imatataq servichikuchkanku?

 JW Box nisqankutam, chay cajachaqa uchuychallam, chaytam apachinku internetpa mana kasqan lawpi kaq iñiqmasinchikkunaman. Chayta rantiruspankum betelpi iñiqmasinchikkuna jw.org nisqamanta videokunata hinaspa qillqanchikkunata grabarunku. Chay cajachaqa 75 dolar qullqipa chaninmi.

 JW Box nisqanchik cajachaqa internetniyuqmi, chaytam huñunakunanchik wasiman chayachinku, chaymantam iñiqmasinchikkunaqa videokunata, qillqanchikkunata celularninkuman grabanku. ¿Imaynatam JW Box nisqanchikmanqa chayllaraq ruwasqaku videokunata chaynataq qillqanchikkunata apachinku? Chaypaqqa betel wasipim USB nisqankupi grabanku hinaspam apachinku. Chaytam JW Box nisqanchikman churanku. Chay USB nisqankuqa valen yaqa 4 dolarmi.

 ¿Imaynatam JW Box nisqanchikqa iñiqmasinchikkunata yanapachkan? Republica Democratica del Congo nacionniyuq Nathan Adruandra iñiqmasinchikmi nin: “Ñawpaqmantaraqmi Ezequiasmanta videota hinaspa Lotpa warminmanta videota qawayta munaspay celularniypi grabayta munarqani, ichaqa manam atirqanichu, chaywanmi llakisqa tarikurqani. Kunanmi ichaqa celularniypi videokunata grabayta atiniña. Chayqa yanapawanmi churiykunata allinta yachachinaypaq”, nispa.

 JW Box nisqanta Nigeria nacionpi servichikunankupaq yanapaq iñiqmasinchikmi nin: “Iñiqmasinchikkunaqa Jehova Diostam anchata agradecekunku kay JW Box nisqanchikwan videokunata hinaspa qillqanchikkunata celularninkuman grabayta chaylla atisqankumanta”, nispa.

 JW Box nisqataqa 1.700 cajachakunatañam aparachinku Africaman, Oceaniaman hinaspa Sudamerica lawkunaman. Tantiachkankutaqmi huklaw llaqtachakunapi kaq iñiqmasinchikkunaman apachinankupaqpas. Chaykunataqa, ¿ima qullqiwantaq rantinku? Rantinkuqa enteron pachapi iñiqmasinchikkuna qullqichankuta qusqankuwanmi. Wakinkuqa donate.isa4310.com nisqamanmi qullqichankuta apachinku. Anchatam agradecekuykiku qullqichaykichikwan yanapakusqaykichikmanta.