Bibliataqa hebreo hinaspa griego rimaypim qillqarqaku. Chay rimaykunapiqa alma palabratam néfesch hinaspa psykjé ninku. Chay palabrakunaqa kawsaq runa utaq kawsaq animal ninanmi. a Arí, almaqa kawsaq runam manam runakunapa nisqanman hina wañukuqpa animanchu. Chayna kasqanmanta bibliawan yachaykusun.

•   Jehova Dios Adanta allpamanta ruwaruspan sinqanman wayrata pukuykuptinmi “kawsaq almaña rikurirurqa” (Genesis 2:7 b). Adanmanqa Diosqa manam sapaq almatachu ukunman churaykurqa, aswanqa kikinmi kawsaq almaña rikurirurqa.

•   Almaqa kawsaq runa kasqanraykum bibliapiqa nin imatapas llachpay atisqanta (Levitico 5:2), mikuq kasqanta (Levitico 7:20), llamkay atisqanta (Levitico 23:30), aycha mikuruyta utaq ima mikuruytapas munasqanta (Deuteronomio 12:20) hinaspa kamachikuykunata kasukusqanta (Romanos 13:1, Diospa palabran Mateo-Apocalipsis). Kawsaq runakunallam chaykunataqa ruwanchik.

¿Almaqa wañunmanchu?

 Arí, Almaqa kawsaq runa kasqanchikraykum wañuqlla kanchik. Chayna kasqanmanta bibliawan yachaykusun.

•   Bibliapim nin: “Huchallikuq almaqa wañunqam”, nispa (Ezequiel 18:4, 20, Reina Valera).

•   Israel llaqtapi pipas huchallikuruspanqa wañuchisqam kanan karqa. Chaymi bibliapipas nin: “Chay ‘almaqa’ wañunanmi”, nispa (Exodo 12:15, 19; 31:14, Reina-Valera; Levitico 7:20, 21, 27). Huk bibliakunapipas chaynatam nin. La Biblia de las familias católicas sutiyuq bibliapim nin: “Chay ‘almaqa’ wañunqam”, nispa (Levitico 19:8).

•   Bibliapiqa wañusqa runamanta rimaspanpas ninmi: “wañusqa alma”, nispan (Levitico 21:11; Numeros 6:6). Wakin bibliakunapi “aya” utaq “wañusqa runa” nispa niptinkupas hebreo rimaypiqa ninmi: “néfesch”, nispa. Huk rimaypiqa “alma” nichkanmi.

Almaqa vidanchikmi

 Bibliapiqa vidanchiktapas alma ninmi. Bibliapim wañuypa patanpi tarikuq runamanta rimaspan nin: “Paypa almanqa sepulturamanñam hichpaykuchkan”, nispa (Job 33:22). Chaymi runa wañuypa patanpi kaptin bibliapiqa nin “alman” peligropi kasqanta (Mateo 2:20; Romanos 11:3, Diospa palabran Mateo-Apocalipsis Filipenses 2:30).

 Almaqa vidanchikmi, chayta yachaspaqa sumaqtam entiendesun wakin textokunatapas. Wakin bibliakunapim wañuypa patanpi tarikuq warmichamanta rimaspan nin “alman lluqsisqanta” (Genesis 35:18). Chay warmicha wañukunanpaqña kasqanraykum wakin bibliakunapiqa nin wañuy patanpiña kasqanta (Chuya Qellqa).

¿Almaqa mana wañuq kasqanta pikunataq yachachirqaku?

 Bibliapiqa manam ninchu wañukuptinchik almanchik hinalla kawsasqantaqa. Chaynataqa niqku Grecia nacionniyuq runakunam. Diccionario enciclopédico del Cristianismo qillqam nin: “Grecia nacionniyuq runakunaqa niqkum runapa (sōma) sapaq alman kasqanta (psychḗ). Bibliam ichaqa yachachin almaqa kikin runa kasqanta”, nispa.

 Jehova Diosqa manam allinpaqchu qawan runakunapa yanqa yachachisqankutaqa. Hukkaqnin yachachikuymi alma mana wañusqanmanta. Chaymi bibliapi niwanchik: ‘Cuidakuychikyá, yanqañataq pipas presochasunkichikman runakunapa yachayninwan hinaspa costumbrenkuman hina yanqa rimaykunawan’, nispa (Colosenses 2:8).