Briana sutiyuq sipasmi nin: “Bibliatam ñawinchachkarqani, ichaqa ñawinchanapaq achka kasqanta qawaykuspaymi saqirurqani”, nispa.

 ¿Chaynachu qampas tarikunki? Hinaptinqa kay yachachikuymi yanapasunki.

•  ¿Imanasqataq bibliata ñawinchayqa ancha allin?

•  ¿Imataq yanapasunkiman ñawinchayta mana aminaykipaq?

•  Wakin musu-sipaskunam ninku

 Ima niwaqtaq, ¿biblia ñawinchayqa amirunapaq hinachu? Ichapas ninki “arí” nispa. Ichapas chaynataqa ninki achka letrakuna kasqanrayku chaynataq mana dibujochayuq kasqanrayku. Chaychá biblia leeymantaqa munanki television qawakuyta utaq pukllakuyta.

 Ichaqa, ¿imatataq ruwawaq huk baulpi achka-achka quri-qullqi kasqanta yacharuspaykiqa? Chayllachá imaynatapas kicharuwaq hayka kasqanta yachanaykipaq.

 Bibliapas chay baul hinam. Ñawinchaspam tarinki achka-achka sumaq yachachikuykunata. Chayqa yanapasunkim:

•   Allinta imapipas tantianaykipaq.

•   Allinlla tayta-mamaykiwan kanaykipaq.

•   Allin amistadkunata tarinaykipaq.

•   Ima llakiwanpas mana hukmanyarunaykipaq.

 Ichaqa, ¿imanasqataq bibliaqa ñawpa-ñawpaq watakunataraq qillqasqa kachkaspanpas kunan yanapawachwan? Arí, yanapawanchikmi. Yanapawanchikqa Diospa yuyay qusqanwan qillqasqa kasqanraykum (2 Timoteo 3:16). Bibliapi ñawinchasqanchik yachachikuykunaqa tukuy ima unanchaq Jehova Diospa yachachikuyninmi.

 Ñawinchawaqmi qallariyninmanta tukupayninkama. Chaynata ñawinchaspaykiqa yachankim enteron bibliaqa huk yachachikuyllamanta willakusqanta. Qallariyninmanta tukupayninkama ñawinchanaykipaqqa kaytam ruwawaq:

•    Bibliapa 66 libronkunatam qatinasninpi ñawinchawaq, Genesismanta qallaykuspayki Apocalipsiskama.

•    Imakuna pasakusqanman hinam ordenninpi ñawinchawaq.

 Kaytam ruwawaq: Bibliata estudianapaqmi yanapawasun niq qillqapa 4 kaqninpim kachkan huk cuadrocha Jesuspa vidanmanta. Chaypim willakuchkan ima watakunapi imakuna Jesuspa ruwasqanmanta.

 Ñawinchawaqtaqmi qam hina Diosta serviq imakunawan sasachakusqankumantapas.

•    Ichapas munachkanki allin amistadkuna tariyta. Chayna kaptinqa ñawinchawaqmi Davidmantawan Jonatanmanta (1 Samuel 18 capitulonmanta 20 capitulonkama). Chaymantañataqmi “¿Imaynatam allin amistadkunata tariwaq?” niqpi kaq tapukuykunapi yuyaymanariwaq, chaynapi ñawinchasqayki kawsakuynikipi yanapasunaykipaq.

•    Ichapas munachkanki mana allin ruwaykunamanta karunchakuyta. Chayna kaptinqa Joseymantam ñawinchawaq, payqa qarinchakuspam mana allin ruwaymanta karunchakurqa (Genesis 39 capitulon). Chaymantañataqmi “Cómo resistir las tentaciones” hinaspa “Acusado falsamente” niqpi tapukuykunapi yuyaymanariwaq. Yanapasunkim mana allin ruwaykunamanta karunchakunaykipaq.

•    Ichapas munachkanki Diosta mañakuyqa imaynata yanapasusqaykimanta yachayta. Chayna kaptinqa ñawinchawaqmi Nehemiasmanta (Nehemias 2 capitulon). Chaymantañataq “Jehova Diosmi mañakusqanta uyarirqa” niqpi kaq tapukuykunapi yuyaymanariwaq. Chay ruwayqa anchatam yanapasunki.

 Kaytam ruwawaq: Bibliataqa ñawinchay chaqwapa mana kasqanpi, chaynapi allinta entiendenaykipaq.

 Ñawinchawaqtaqmi huk kaqnin willakuyllanta utaq huk kaqnin Salmosllanta, hinaspam imayna yanapasusqaykipi yuyaymanawaq. Ñawincharuspaykim kaykunapi yuyaymanawaq:

•    ¿Imapaqraq tayta Dios kaykunata palabranpi qillqachirqa?

•    ¿Jehova Dios imayna kasqantam kayqa yachachiwan?

•    ¿Imaynatam kay ñawinchasqay yanapawanman?

 Kaytam ruwawaq: Tantiakuy biblia ñawinchayta haykapi tukunaykipaq. Haykapi ñawinchayta qallaykunaykipaqmi yanapasunkiman “Bibliata imaynata ñawinchanapaq yanapakuy” niq qillqanchik. Kaytaqa tariwaq internetpim jw.org nisqanpi.