Cai oficinagunai chaupimanda yali tarbajcuna mana sucursalgunai tarbanun, astaun Oficinas Remotas de Traducción nishcaunai (RTO). ¿Imarasha cai ashca valishca an? ¿Ima cosasguna ministinun shuj shimima pasachijcuna RTO oficinagunai ali tarbangaj? Shinallara cai oficinaguna runauna quiquin shimira rimaj llactaibi tiashcamanda ¿imasnara yanapana ushan shuj shimima ali pasachingaj?

 Cai RTO oficinaguna shuj shimima pasachijcunara yanapanmi paiguna shimira rimaj llactaunai causanuchu. Bajo alemán shimima pasachij Karin shuti pani cuintan: “México Chihuahua partii, RTO oficina Cuauhtémoc llactama pasashca hurasmanda tucui huras bajo alemán shimii rimanchi ñucanchi compañerogunahua, Bibliamanda yachachinai shinallara randingaj rishcai. Tucui huras ñuca shimira rimajcunahua tuparinchi. Unai timpui mana uyashca ñucanchi shimii quiquin rimashca shimiunara uyanchi, shinallara imasna rimanujta uyasha paiguna rimashca tunura yachasha catinchi.

 Shinallara Ghana llactai, Frafra shimima pasachij huauqui James betelbi ajcunahua ña mana pasashcamanda maicambi llaquirin. Shinajpi pai nin: “Ashcara cushiyani RTO oficinai tarbashcamanda. Shinallara Bibliamanda yachachiushcai, runauna paiguna quiquin shimii uyasha gustu intindishcamanda ñuca shungu ucui yapa cushi sintirinimi”.

 ¿Imasnara huauquiuna ajllanun maican llactai shu RTO oficina tiachu? Warwick (Nueva York) llactai tiaj Departamento Mundial de Diseño y Construcciombi sirvij huauqui Joseph nin: “Maican lugargunai shu problema charinchi, yacu, luz tucui huras mana tian, shinallara shuj shimima pasachingaj cachamushca archivogunara huacachingaj ali Internet mana charinun, chimanda alira ricuna anchi shu RTO oficina maican lugarbi tiachu mas ali ashcara.

 Maicambi, dsaslla chi oficinara charingaj, mana yapa cullquira gastangaj shu Asamblea Huasiunai, misioneroguna tiana huasii churangaj ali an, shu shimima pasachijcuna tucui punzhauna chima ringahua. Caigunai lugar mana tiajpi departamentogunara randina ushanun oficina rurangahua, chibi causasha tarbangahua. Shu shimima pasachijcuna shu tunu ministishcaunara charinujpi, paiguna charishca oficinaunara catuna ushanun, chi cullquira mas ministishca lugargunai alira utilizangaj.

 2020 sirvinamanda pasaushca huatai, 13 millones de dólares gastanuca RTO oficinagunai tarbasha catinuchu. Cai oficinagunai tarbajcuna ministinun computadoraguna, software especializado nishca, grabangaj aparatoguna, internet, shinallara shuj ministishca cosasguna. Caran shuj shimima pasaquij shu computadora, programas comerciales nishcandi charichu maicambi 750 dólares valin. Shinallara charinun ñucanchi organizacionmanda Watchtower Translation System nishca programa, cai programa shuj shimima pasachijcunara yanapan paiguna ministishcaunara charisha paiguna shimima alira pasachingaj.

 Shu shimima pasachijcuna oficinagunai grabangaj aparatoguna apinun. Cai aparatoguna ashca valishca anushca cai coronavirus pasachij ungüi tiaushcai, ashca shuj shimima pasachijcuna, paiguna huasima cai aparatogunara apana ushanuca publicaciongunara videogunaras grabasha catingaj.

 Caran llactai tiaj voluntarioguna yanapanun shuj shimima pasachishca publicaciongunara revisasha, shinallara RTO oficinagunara mantenimiento rurasha. Sudáfrica llactai, Ciudad del Cabo RTO oficinai afrikáans shimima pasachij Cirstin huauqui nin: “Ashca Bibliamanda yachachijcuna, precursores regularesguna paiguna tarbana yachashcahua yanapana ushanun cai oficinagunai.

 Cai voluntarioguna cushihua tarbanun. Shu RTO oficinai tarbaj pani nin chibi tarbana, “rupaj punzhai gustu chiri huaira shamushca cuinta an”. Maican oficina mayambi causaj huauqui paniuna yanapanun videogunara grabangaj. Estado de Veracruz México llactai, totonaco shimima pasachij Juana nishca pani nin: “Cuna ñucanchi shimira rimaj mayanlla llactaunai tiashcamanda mas alimi an huauqui paniuna shamunuchu publicaciongunara, videogunaras grabangaj”.

 Shinajpi ¿RTO oficinaguna yanapana ushacachu mas ali shu shimima pasachingaj? Ari, ashca huaranga ñucanchi publicaciongunara leaj runauna ninun alimi yanapashca. República Democratica del Congo llactai, congo shimima pasachingaj tarbaj huauqui Cédric nin: “Maican ñucanchi huauqui paniuna ninuj aca, ñucanchi congo shimima pasachina tunura intindingaj shinzhi ashcara, mana congo shimii runauna rimashca cuinta ashcamanda. Shinajpi cuna ninun, ñucanchi publicacionguna paiguna rimashca Kongo shimii pasachishca anun, tucui runauna rimashca cuinta, intindinalla anun”.

 Sudráfrica llactai, xhosa shimima pasachisha tarbaj huauqui Andile shina rimashca tunullara uyaca, pai nin: “Ashcauna ninun ñucanchi shimima pasachishca publicacionguna, videogunas mas ali ashcara. Ñaupa timpui huahuauna La Atalaya revistara inglés shimii leaj anuca, cuna xhosa shimii leanun. Ashcara gustanun Traducción del Nuevo Mundo revisashca Biblia intindinalla shimiunahua quillcashca ashcamanda”.

 Intiru mundui Bibliamanda yachachingaj cuyashca cullquira utilizanchi RTO oficinagunara shayachingaj, mantenimiento rurangaj shinallara chibi tarbajcunara yanapangaj. Maican cai cuyashca cullqui Internetpi donate.isa4310.com nishca puistui cunun.