“Cusacunapish, quiquin cuerpota shina paicunapaj huarmicunata cꞌuyachun. Maijanpish paipaj huarmita cꞌuyajca, paillatajmi cꞌuyarin. Paipaj quiquin cuerpotaca, pi manataj pꞌiñanchu. Ashtahuanpish allimi micun, allimi cuidan” (EFESIOS 5:28, 29).

Cusaca familiapaj umami can (Efesios 5:23). Shuj alli cusaca pai munashca shina paipaj huarmi tucuita rurachunca mana obliganchu. Ashtahuanpish huarmita valorashpami ima minishtishcacunata cushpa cuidan, cꞌuyashcatapishmi ricuchin. Cusaca mana paillapi yuyashpa imatapish ruranchu, sino paipaj huarmita cushichingapajmi esforzarin (Filipenses 2:4). Huarmihuan parlacushpaca pai ima shina sintirishcata, imata yuyashcatami parlan. Pero huarmita alli uyanatapishmi yachan. Alli cusaca huarmihuanca mana yallitaj pꞌiñarinchu, mana maltratanchu, mana insultanchu (Colosenses 3:19).

“Huarmipish, paipaj cusata respetachun” (EFESIOS 5:33).

Huarmica cusata respetashpa, paipaj decisioncunata apoyashpami familia sumajta causachun ayudan. Paipaj cusa pandarijpica mana yanga rimanchu. Ashtahuanpish mana pꞌiñarishpami respetohuan tratan (1 Pedro 3:4). Shinallataj cusahuan shuj problemamanta parlana cashpaca shuj alli tiempotami mashcan y respetohuanmi parlan (Eclesiastés 3:7).

‘Cꞌarica, paipaj huarmihuan tandanacushpa ishquindijmanta shuj aichallami tucunga’ (GÉNESIS 2:24).

Shuj cꞌari shuj huarmi cazarashpaca shuj shinalla tucushpami alli apanacui callarincuna. Chashna alli apanacunata mana saquingapajca ishquindijmi achcata esforzarina can. ¿Ima shina? Ishquindijmi shungumanta parlana can. Caishuj chaishuj ayudanacushpa, caishujmanta chaishujmanta huaquin cosascunata rurashpami cꞌuyaita ricuchina can. Cusa o huarmica shujtahuan huainayashpa mana traicionanachu can. Traicionashpaca cusata o huarmitami achcata llaquichinga. Paicunapurapica ña mana confiangacunachu. Familiatapish achcatami llaquichinga (Hebreos 13:4).

“Cambaj huahuataca uchilla cajpiraj, alli yachachingui. Chashna yachachijpica yuyajyashpapish manataj cungaringachu” (PROVERBIOS 22:6).

Diosca yaya mamacunamanca huahuacunata alli yachachichunmi mingashca. Chaimantami paicunaca huahuacuna alli comportarichunca ejemplohuan yachachina can (Deuteronomio 6:6, 7).  Huahuacuna mana alli comportarijpica alli yaya mamacunaca mana yallitaj pꞌiñarincunachu. Ashtahuanpish ‘imatapish uyanataca allimi uyancuna. Manaraj alli yuyarishpaca mana rimancunachu, mana utca pꞌiñarincunachu’ (Santiago 1:19). Huahuacunata disciplinana cajpica mana pꞌiñarishca cashcallamanta castigangacunachu. Ashtahuanpish huahuacunata cꞌuyashcamantami disciplinangacuna.

‘Huahuacuna, cancunapaj yaya mamata cazuichij. “Cambaj yaya mamata alli ningui”’ (EFESIOS 6:1, 2).

Huahuacunaca yaya mamataca tucui shunguhuanmi cazuna, respetana can. Chaita rurajpimi familiaca cushilla cangacuna. Huahuacuna ña jatunyashpaca yaya mamata respetashcata ricuchingapajmi paicunataca alli cuidancuna. Por ejemplo, yaya mamapaj huasi ama dañarichunmi ricuncuna. Shinallataj cullquita minishtijpica cushpami ayudancuna (1 Timoteo 5:3, 4).