¿Imamantataj yuyajyashpa huañunchij?
JEHOVÁ DIOSCA gentecuna huañuchunca mana munarcachu. Adantapish Evatapish jucha illaj cuerpohuan, jucha illaj yuyaihuanmi rurarca. Paicunaca cunancamami causashpa catinman carca. ¿Imamantataj chashna ninchij? Edén huertapi Jehová ima mandashcata yachashpami chaita intindishun.
Jehová Diosca Adantaca, ‘chai yuramanta micushpaca huañunguimi’ nircami (Génesis 2:17). Adán yuyajyashpa huañunallataj cashca cajpica, ¿Diosca imapajtaj chai mandashcataca cunman carca? Chai yuramanta mana micushpaca huiñaita causai tucushcatami Adanca alli yacharca.
DIOSCA GENTECUNA HUAÑUCHUNCA MANA MUNARCACHU
Edén huertapica achca granota pꞌucuj yuracunami tiyarca. Chaimantami Adán Eva causashpa catingapajca huerta chaupipi tiyaj yuramanta micunataca mana minishtircacuna (Génesis 2:9). Paicuna chai yuramanta mana micushpaca, paicunaman causaita cuj Diosta cazushcata, Dioslla paicuna imata rurana cashcata mandachun minishtishcatami ricuchinman carcacuna.
¿ADÁN EVACA IMAMANTATAJ HUAÑURCACUNA?
Adán Eva imamanta huañushcata yachangapajca shuj millai ángel, Evahuan ima parlashcatami intindinaraj canchij. Caita alli intindishpami cunan punllacunapish imamanta llaquicunata charishcata yachashun. Chai millai angelca Diablomi can. Paica shuj culebrata parlachishpami Eva huarmitaca jatunta llullarca. Bibliapica: “Mandaj Taita Dios rurashca tucui animalcunamanta yalli yachajca culebrami carca. Paimi huarmitaca: ‘¿Cancunataca Taita Diostajchu, cai huertapi tiyaj yuracunamantaca ama micunguichij nirca?’ nishpa tapurca” ninmi (Génesis 3:1).
Chaimi Eva huarmica: “Huertapi tiyaj yuracunapi pꞌucushca granocunataca micui tucunchijmi. Ashtahuanpish Taita Diosca: ‘Cancuna ama huañungapajca, huerta chaupipi tiyaj yurapi pꞌucushcataca amataj micunguichij, amataj tuparinguichijllapishchu nircami’ nishpami cutichirca. Chaimi culebraca Evataca: ‘Cancunaca mana huañunguichijchu. Ashtahuanpish chai yuramanta micushpaca cancunapaj ñahuicuna pascarijpi Taita Dios shina tucunata, allitapish, mana allitapish yachaj tucuna cashcatamari Taita Diosca yachan’ nircami”. Diabloca cai shimicunahuanca Jehová Dios llullaj cashcata, alli cosascunamanta Dios jarcacushcatapishmi intindichirca (Génesis 3:2-5).
Eva huarmica Diablo nishcatami crirca. Paipaj ñahuipica chai yurapi tiyaj granoca micunapaj alli cashcata ricushpami micurca. Chai qꞌuipaca, “paipaj cusamanpish carajpimi, paipish paipaj huarmi shinallataj micurca” (Génesis 3:6).
Diosca Adantaca: ‘Chai yuramanta micushpaca, huañunguitajmi’ nircami (GÉNESIS 2:17).
Adán Eva mana cazujpimi Jehová Diosca achcata llaquirishcanga. Chaimi Adantaca: “Canca allpamanta japishpa rurashcami cangui. Ñutu allpallamantataj cashcamantaca ñutu allpallatajmi tucungui” nirca (Génesis 3:17-19). Adanca 930 huatacunallata causashpami huañurca (Génesis 5:5). Adán huañushpaca jahua pachaman o shujtaj ladoman mana rircachu. Jehová Dios ñutu allpamanta manaraj rurajpica Adanca maipi mana tiyarcachu. Chai shinallatajmi huañushpaca ñutu allpallataj tucurca, maipi mana causagrircachu. ¡Llaquimi carca!
¿IMAMANTATAJ MANA JUCHA ILLAJ CANCHIJ?
Adán Evaca Diosta mana cazushcamantami jucha illaj causaita pirdircacuna. Chai punllamantami juchayujcuna tucushpa huañuna carcacuna. Adanpaj huahuacuna cashcamantami ñucanchijpish juchayuj tucushcanchij. Romanos 5:12-pica: “Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” ninmi.
Bibliapica huañuitaca tucuicunapaj ñahuita tapashca linsohuan, tucui llajtacunapaj jahuata tapashca mantohuanmi chꞌimbapuran (Isaías 25:7, NM). ¿Caica imatataj ricuchin? Juchamanta, huañuimanta pi mana quishpiri tucushcatami ricuchin. Adanmantaca tucuicunami huañunchij (1 Corintios 15:22). Apóstol Pablopish: “¿Pitaj ñucataca, cai huañuj cuerpomantaca cacharichingari?” nishpami tapurirca. Ñucanchijpish pai shinallatajmi tapurinchij. Pero, ¿huañuimantaca pitaj cacharichi tucunga? (Romanos 7:24).
Puede que también le interese
HUILLAJ
¿Huañuica ima shinataj tucuchishca canga?
Diosca yallitaj cꞌuyaj cashcamantami huañuimanta quishpichingapajca shuj valishca preciota pagana carca.
