Llaquicunamanta Dios mana culpata charijpica ¿pitaj culpata charin?, ¿imamantataj achca gentecunaca yaricaihuan huañucuncuna?, ¿macanacuicuna, ungüicuna, jatun llaquicunaca imamantataj tiyashpa catin? Bibliapi quimsa puntocunata ricushun.

1. Gentecunaca paicunallapimi yuyan, charinallatami munancuna. Chaimantami Bibliapica: “Shujcunaca caishujcunata llaquichishpa causashpaca, quiquinpaj llaquipajllatajmi chashna rurancuna” nin (Eclesiastés 8:9).

2. Llaquicunaca mana yuyashca horaspi japinllami. Chaimantami Bibliapica: “Manapish yuyashca horaspimi llaquicunaca japinlla” nin (Eclesiastés 9:11, NWT). Por ejemplo, shuj accidente horas justo chaipi cashcamanta o ñucanchij culpamantachari maipica llaquicunaca japin.

3. Bibliapica: “Cai pachapajta rurajcunataca, tucuicunatami Diablo mandacun” ninmi (1 Juan 5:19, QC, 1989). Diablo manaraj millai tucushpaca shuj alli angelmi carca. Pero paica Diosta mana cazushpami llullai callarirca (Juan 8:44). Cutin caishuj angelcunapish paicunapaj munaita rurangaraicumi Diosta mana cazurcacuna. Shinami demoniocuna tucurcacuna (Génesis 6:1-5). Diablopish, demoniocunapish Diosta mana cazui horasmantami cai Allpapica mana allicunata ruracuncuna. Paicuna mashna poderta charishcataca cunan punllacunami ashtahuan ricui tucunchij. Diabloca jatunta pꞌiñarishpami cai ‘pachapi causajcunata umachicun’. Chaimantami Bibliapica: “Allpapi causajcuna, mama cuchapi causajcunaca ¡aij imachari tucunguichij!” nin (Apocalipsis 12:9, 12). Diabloca millai cashcamantami gentecuna sufrijta ricushpaca cushicun. Diosca llaquicunamantaca mana culpata charinchu.

CAIPI YUYAI: Mana alli shunguta charij gentecunallami shujtajcunata llaquichinata munan. Pero Yaya Diosca mana chai gentecuna layachu can. Paica “cꞌuyajmari” (1 Juan 4:8). Chaimantami siempre allicunata ruran (Job 34:10).

¿Diosca ima horastaj Diablota tucuchinga? nishpachari tapuringui. Caipi ricushca shinaca Diosca mana allitaca mana ricunachinchu. Paica ñucanchijcuna sufrijta ricushpami shungupi achcata nanarin. 1 Pedro 5:7-pica: “Diosmi cancunataca cuidacun. Chaimanta ima llaquicuna yuyailla canataca paiman mingaichij” ninmi. Catij yachaipimi Dios ñucanchijta dimastij cꞌuyashcata ricushun. Shinallataj llaquicunata ima shina tucuchigrijtami yachashun. *