Chꞌican chꞌican llajtamanta mandajcuna macanacui ama tiyachun jarcasha nijpipish, 24 de febrero de 2022 tutamantapica Rusia llajtamanta soldadocunami Ucrania llajtata llaquichi callarircacuna. ¿Cai guerra callarishcamantaca shujtaj llajtacunapipish ima llaquicunataj tiyanga? Naciones Unidasmanta secretario general António Guterresca: “Cai macanacui tiyashcamantaca muyundij Allpapimi achca llaquicuna tiyanga. Europapi saquirij llajtacunapi, shujtaj llajtacunapi causajcunapish ña mana tranquilo causai tucungacunachu” nircami.

•   Jesucristoca: “Shuj mama llajtaca caishuj mama llajtahuanmi macanacunga. Shuj gobiernoca caishuj gobiernohuanmi macanacunga” nishpami huillarca (Mateo 24:7). Cunan tiempopi tiyaj macanacuicunaca Jesús huillashca shimicuna pajtaricushcatami ricuchicun. Chaita yachangapajca “¿Tucuri punllacunapaj señalcunaca maijancunataj can?” nishca yachaita liyi.

•   Apocalipsis libropica macanacuicunataca ‘nina shina pucanicuj caballo jahuapi tiyacujhuanmi’ chꞌimbapuran. Cai caballo jahuapi tiyacujca ‘cai allpapi sumaj causaitami anchuchin’ (Apocalipsis 6:4). Cai tiempopi tiyaj macanacuicunaca Apocalipsis libropi huillashca profecía pajtaricushcatami ricuchin. Caimanta yachangapajca “¿Qué representan los jinetes del Apocalipsis?” nishca yachaita españolpi liyi.

•   Daniel libropica janaj lado llajtata mandajca, ura lado llajtata mandajhuan macanacuna cashcatami huillarca (Daniel 11:25-45). Imamanta Rusia llajta, paita apoyajcunapish janaj ladomanta mandaj cashcata yachangapajca Daniel capítulo 11-pi tiyaj profeciami pajtarishca nishca videota ricui. a

•   Shinallataj Apocalipsis libropica ‘Tucui poderta charij Diospaj jatun punllapi macanacuimantami’ parlan (Apocalipsis 16:14, 16). Pero cai macanacuipica mana cunan ricushca shina shuj llajtahuan caishuj llajtahuan macanacungacunachu. Cai macanacuimanta ashtahuan yachasha nishpaca “¿Qué es el Armagedón?” nishca yachaita españolpi liyi.

•   Bibliapica ‘Yaya Diosca tucui cai pacha macanacuicunata tucuchinatami’ huillan (Salmo 46:9). Diospaj promesacunamanta ashtahuan yachangapajca “La esperanza real de un mañana mejor” nishca yachaita españolpi liyi.

•   Jesusca paita catijcunamanca, Diospaj Gobierno mandanaman shamuchun mañanguichij nishpami yachachirca (Mateo 6:9, 10). Diospaj Gobiernoca jahua pachapimi can. Cai Gobiernomi cai Allpapi sumaj causai tiyachun ayudanga. Cai Gobierno canmanta imata ruragrishcata yachangapajca ¿Diospaj Mandanaca imataj can? nishca videota ricui.

 Ucrania llajtapica 129.000 yalli testigo de Jehovacunami tiyan. Muyundij Allpapi causaj Testigocunaca Jesuspaj ejemplota catingapajmi esforzarinchij. Chaimantami politicapi mana chagrurinchij, guerramanpish mana rinchij (Juan 18:36). Mundo enteropimi testigo de Jehovacunaca ‘Diospaj Gobiernomanta alli huillaicunata’ huillanchij. Tucui gentecunamanmi problemacuna, guerracuna ima shina tucurinatapish huillanchij (Mateo 24:14). Bibliapi cushca esperanzamanta ashtahuan yachasha nishpaca testigo de Jehovacunahuan parlai.