¿Diosca tucui ladocunapi, tucui cosascunapichu can?

SHIMI

Bibliaca caitami yachachin

Diosca tucuitami ricun. Maipi ima layapish paipaj podertami utilizai tucun (Proverbios 15:3; Hebreos 4:13). Shinapish Bibliapica Diosca tucui ladocunapi cashcata, tucui cosascunapi cashcataca mana yachachinchu. Ashtahuanpish Diosca shuj espiritumi can. Paica shuj causana lugartami charin ninmi.

¿Diosca ima shinataj can? Diosca shuj espiritumi can (Juan 4:24). Chaimantami Diostaca ni pi mana ricushca (Juan 1:18). Bibliapi muscuipi shina ricushcacunapica Dios tucui ladocunapi cashcataca mana ninchu. Ashtahuanpish Diosca shuj lugarllapi cashcatami ricuchin (Isaías 6:1, 2; Apocalipsis 4:2, 3, 8).
¿Diosca maipitaj causan? Bibliapica Diosca “jahua pachapimi” causan ninmi (1 Reyes 8:30). Diosca mana pai huiñachishca universopi o cai Allpapi causanchu. Diosca cielopimi causan. Bibliapimi angelcunaca shuj punllaca “Jehová Diospaj ñaupajpi ricuringapajmi shamurcacuna” nin. a Chaimantami Diosca shuj lugarllapi causashcata yachai tucunchij (Job 1:6).

Dios mana tucui ladocunapi cashpaca ¿ñucanchijtaca cuidai tucunchu?

Ari. Diosca cielopi causashpapish cai Allpapi causajcunamantami sustarin. Diosca tucui shunguhuan paita cazujcunatami ricuracun. Chaimantami paicunata ayudanata munan (1 Reyes 8:39; 2 Crónicas 16:9). Pero ¿ñucanchijmanta sustarishcata, ñucanchijta cuidasha nishcataca ima shinataj ricuchin?

Paita mañajpi: Jehová Diosca ñucanchij mañashcacunataca enseguidami uyan (2 Crónicas 18:31).
Yallitaj llaquilla cajpi: “Mandaj Diosca shungupi llaquilla cajcunapaj cꞌuchullapimi. Espiritupi llaquilla cajcunata quishpichinmi” (Salmo 34:18).
Consejachun minishtijpi: Jehová Diosca paipaj Shimihuanmi alli yachaita cun. Mai ñanta catina cashcatapishmi ricuchin (Salmo 32:8).

Diosca tucui ladocunapimi can nishca panda yuyaicuna

¿Huaquin gentecunaca imatataj nin? Diosca tucui pai huiñachishcacunapimi can nincunami.

Verdadta yachai: Diosca ni cai Allpapi, ni pai huiñachishca universopi mana causanchu (1 Reyes 8:27). Es cierto Bibliapica lucerocunapish tucui pai huiñachishcacunapish Dios “tucuita rurai tucuj cashcatami huillacun” ninmi (Salmo 19:1). Pero caipi yuyashun. Shuj cuadrota pintajca pai pintashca cuadrocunallapitajca mana causai tucunchu. Chai shinallatajmi Yaya Diospish tucui pai huiñachishcacunapica mana causan. Pero pintashca cuadrocunaca pintaj runa ima shina cashcatami ricuchin. Chai shinallatajmi Yaya Dios tucui huiñachishcacunaca pai ima shina cashcata ricuchin. Pai tucui poderta charishcata, yachaj cashcata, cꞌuyaj cashcatami ricuchin (Romanos 1:20).

¿Huaquin gentecunaca imatataj nin? Diosca tucui poderta charishcata ricuchingapaj, tucuita yachangapajca tucui ladocunapimi cana can nincunami.

Verdadta yachai: Espíritu santoca Diospaj fuerza, Diospaj podermi can. Chai fuerzahuanmi Yaya Diosca maipipish ima hora cajpipish imatapish yachai tucunlla, imatapish rurai tucunlla. Pai chai lugarpi canaca mana minishtirinchu (Salmo 139:7).

¿Huaquin gentecunaca imatataj nin? Salmo 139:8-ta liyishpami Diosca tucui ladocunapimi can nincuna. Chai versopica: “Jahua pachacunaman huichiyajpipish, chaipimi cangui. Seolman (o panteonman) uriyajpipish, chaipimi cangui” ninmi.

Verdadta yachai: Salmo 139:8 versoca Dios tucui ladocunapi cashcataca mana nisha ninchu. Ashtahuanpish cai alaja shimicunaca ñucanchij maipi cajpipish Yaya Dios ñucanchijta ayudai tucushcatami intindichin.

a Bibliapica Diospaj shutica Jehovami can ninmi.