Shamoq semänakunaqa atska nacionkunachömi votacion kanqa, y nunakunaqa pï gobernanampaq kaqtam akrayanqa.

 ¿Ima nintan Bibliachö tsë asuntupaq?

 Bibliachömi willakun gobernanti nunakunaqa llapanta rurëta mana puëdiyanqanta.

•   “Ama mandakoqkunaman ni pï nunakunamampis confiakuyëtsu. Pëkunaqa manam salvayäshuynikita puëdiyantsu. Nunaqa jamanin ushakäriptinmi wanur o wañur allpayärin, tsë junaqmi llapan pensanqan ushakärin” (Salmus 146:3, 4).

 Alli gobernanti karpis, llapan gobernantikunam wanur ushakäyan. Imëka allikunata rurashqa kaptimpis, höraqa manam pëpa rantin yëkoq gobernantiqa pë ruranqanta sïguintsu (Eclesiastes 2:18, 19).

 Bibliachömi willakun Teyta Diosqa gobernanakuyänampaq nunakunata mana kamashqa kanqanta.

•   “Purikaq nunakunaqa manam imanö kawayanqanllatapis alli dirigita puëdiyantsu” (Jeremïas 10:23).

 ¿Kanan witsanqa pillapis puëdinku alli gobernanti këta?

 Bibliachömi willakun alli preparädu kaptin y confiakuypaq kaptin, Jesucristuta gobernanti kanampaq Teyta Dios akrashqa kanqanta (Salmus 2:6). Jesusmi Diospa Gobiernunchö gobernëkan. Tsë gobiernuqa ciëluchömi këkan, y tsëpitam gobernëkämun (Mateu 6:10).

 Qamqa, ¿Jesustatsuraq gobernashunëkipaq akranki? Bibliachömi cläru willakun imanir tsëta decidinëkipaq kaqta:

•   “Teyta Diospa tsurinta [Jesucristuta] respetayë, mana respetayaptikiqa, Teyta Diosqa cöleranqam. Cölerakurqa jinan höram ushakätsiyäshunki. ¡Teyta Diosman confiakoqkunaqa, llapankunapis kushishqam kayanqa!” (Salmus 2:12).

 Kananmi imata ruranëkipaq kaqtapis decidinëki. Bibliachö puntallapitana willakunqannömi, Jesusqa 1914 watapitana gobernar qallashqa. Bibliachömi willakun ichikllachöna llapan gobiernukunata ushakäratsir, Diospa Gobiernunllana imëyaqpis gobernamunampaq kaqta (Daniel 2:44).

 Jesuspa gobiernunta imanö yanapanëkipaq kaqta musyëta munarqa, “Diosnintsikpa Gobiernunchö kawanapaqqa, ¿imatataq ruranantsik?” neqta leyiri.