Bibliachöqa manam nintsu Armagedon guërra juk sitiuchö kanampaq kaqta. Bibliachö Armagedon nirqa parlëkan Diosnintsik y entëru munduchö gobiernuna guërrachö kayänampaq kaqpaqmi.

•   Apocalipsis 16:14, 16 textuchömi kënö nin: “Tsë noticiakunaqa demoniukunapitam shamun [...]. Llapanta Puëdeq Teyta Dios nunakunata juzganan tiempuchö guërraman juntakäyänampaqmi, tsëkunaqa entëru patsachö gobernaqkunaman chan [...]. Y hebreu idiömachö Armagedon niyanqan sitiumanmi gobernaqkunata juntayarqan”.

 Armagedon niyanqan palabraqa hebreu idiömachö Har Meghiddohn neq palabrapitam shamun, y tsëqa “Meguidö jirka” ninanmi. Meguidöqa unë Israel nacionchö juk markapa jutinmi karqan. Tsëmi wakinqa niyan Armagedon guërra Israel nacionchö qallanampaq kaqta. Peru rasumpa kaqchöqa, unë Meguidö marka kanqan sitiu o tsë kinrëchö mëqan sitiupis manachi tinkunmantsu ‘entëru patsachö gobernaqkuna’ y ejercitunkuna juntakäyänampaq.

 Apocalipsis libruta qellqaqtaqa Diosnintsikmi suëñuyninchö imëkata rikätsirqan, y tsë rikätsinqankunaqa imakuna pasanampaq kaqta entiendinapaqmi yanapakunan karqan, peru manam rasumpatsu rikanqannölla pasanan karqan (Apocalipsis 1:1). Tsëmi Bibliachö Armagedonpaq parlarqa mana juk rasumpa sitiupaqtsu parlëkan, sinöqa entëru munduchö gobiernukuna juntakarnin Diospa Gobiernunta ushakätsita munayänampaq kaqtam rikätsikun (Apocalipsis 19:11-16, 19-21).