1. ¿Imanötaq nunakuna esclävu këta rikäyan, y imatataq Romänus 12:11 textuqa rikätsimantsik?

MËTSIKAQ nunakunam esclävu këtaqa mana allitanö rikäyan. Peru Diospa esclävun këqa kikintsikpitam. Patrunnintsik alläpa kuyakoq kanqantam Bibliaqa nin. Tsëmi Pabluqa cristiänu mayinkunata, “Jehoväta sirwiyë esclävunö” nirqa, animëkarqan kuyarnin rurayänampaq (Rom. 12:11, NM). ¿Imanötaq Jehoväpa esclävun këqa? ¿Imatataq rurashwan Satanaspa y mundumpa esclävun mana kanantsikpaq? ¿Ima bendicionkunataraq chaskiyanqa Jehoväta mana jaqipa sirweq esclävukunaqa?

2. a) ¿Imanirtaq wakin esclävukunaqa libri këta munayantsu? b) ¿Imatataq rikätsikoq juk esclävupa rinrinta uchkuriyanqanqa?

² Israelïtakunata Jehovä qonqan Leymi yanapamantsik imanö esclävu kanantsikpaq kaqta. Judïu esclävukunaqa qanchis kaq watachöqa librinam këta puëdiyaq (Ex. 21:2). Peru juk esclävu patrunninta kuyar sirwillata munaptinqa, Jehovämi shumaq mandakïta patsätsirqan Pë rikarëkaptin patrunnin esclävumpa rinrinta punkupa marcunman churëkur uchkurapunampaq (Ex. 21:5, 6). ¿Imanirtaq rinrintaraq uchkuyaq? Tsëmi rikätsikoq, patrunninta sirwita y wiyakïta imëyaqpis munanqanta. Tsënöllam noqantsikpis, Jehoväta kuyarnin mandamanqantsikta wiyakunapaq awnikurquntsik.

3. ¿Imanirtaq Jehoväta sirwinapaq awnikuntsik?

³ Manaraq bautisakurmi Jehoväpa esclävun kanapaq awnikurqantsik, y kënöqa awnikurqantsik pëta cäsukïta y munëninta rurëta munarninmi. Manam pipis obligamarqantsiktsu. Jövinkunapis kikinkuna munarmi Diosta sirwiyänampaq awnikuyan y bautisakuyan, manam teytankunata kushitsiyananrëkurllatsu. Rasumpam, Patrunnintsik Jehoväta kuyarninmi sirwinapaqqa awnikuntsik. Tsëmi apostul Juan qellqarqan: “Mandacushqancunata cäsucurnenqa, Diosta[m] cuyantsic” (1 Juan 5:3).

4. ¿Imanötaq “allicuna rurepa esclabun” tikrarquntsik?

⁴ Alläpam Jehoväta agradecikuntsik esclävun kanantsikpaq permitimanqantsikta. Jesus wanunqanman markäkunqantsikmi, jutsapa esclävun kanqantsikpita libramarquntsik. Jutsasapam kantsik, tsënö kaptimpis Patrunnintsik Jehoväta y Jesusta cäsukunantsikpaqmi awnikurquntsik. Këpaq parlarmi Pablu nirqan: “Yarpäyänequi[m] jutsa rurepaqqa wanushqa cuentana cayanqequita; y Teyta Jesucristurecurllana Diospaq cawayänequita”. Jina nirqanmi: “Qamcuna musyayanquim juc patronpa sirweqnin yecurnin, tse patronpa esclabun car llapan munashqanta ruranqanta. Tse cuentanomi mana alli ruraq nunacunaqa jutsapa esclabun yecurnin, castiguman euquicayan, peru Diosta cäsucoqcunaqa allipa ricashqanam cawacuyanqa. Diostam allapa agradesiquicü qamcunapita. Porqui puntataqa jutsapa esclabun cuenta carninmi, mana allicunata ruracuyarqequi. Peru cananqa Teyta Jesus yachatsiconqancunata wiyacurmi, llapan shonqiquicunawan willaquininta chasquiyarqonqui. Tse jutsapa esclabun quepita libracushqana quecarqa, cananqa allicuna rurepa esclabun cuentana cayë” (Rom. 6:11, 16-18). Rikanqantsiknömi Pabluqa, “llapan shonqiquicunawan willaquininta chasquiyarqonqui” nin. Awmi, Jehoväpa sirweqnin kanapaq awnikurqa, ‘allicuna rurepa esclabunmi’ tikrantsik.

5. ¿Imawantaq pelyaq cuenta këkantsik y imanir?

⁵ Tsënö kaptimpis, Jehoväta awnikunqantsikta cumplinanqa manam fäciltsu. Puntataqa, Pablu kënö ninqanwanmi pelyëkantsik: “Llapan shonqüwanmi Dios mandacushqan leycunata allapa cäsuquita munä. Y quiquïchomi mäquicä mana allicunata rurarnin, conträlla ruraquicanqäta. Peru tse mana alli rurenïcunam tsararäcaman mana allicunallata ruranäpaq” (Rom. 7:22, 23). Cada junaqmi mana alli munënintsikkunawan pelyaq cuenta këkantsik, jutsasapa karnin. Tsëmi apostul Pëdru consejamantsik: “Qamcunaqa cawacuyë libri nunacunano. Peru ama ‘librinam cä’ nir, llutancunata rurayëtsu. Sinoqa Diosnintsicpa sirweqnincunano cawacuyë” (1 Pëd. 2:16).

6, 7. ¿Imatataq Satanas ruran munduchö imëka kaqkunata allitanö rikätsikunampaq?

⁶ Ishkë kaqnam, kë munduwan imëka pelyëkaqnö këkantsik. Satanasqa imëkatam utilisan Jehovällapaq y Jesusllapaq kënintsikta ushakätsita munar. Esclävun kanatam munan, tsëmi imëka tentacionkunata churamun (leyi Efesius 6:11, 12). Juk kaq trampanqa, munduchö imëka kaqkunata imëka allitanö pasëpa munapätsikunqanmi. Tsëmi apostul Juan nirqan: “Sitsun pipis que munducho caqcunallata cuyanqa, manam Dios Yayataqa cuyantsu. Quecunam que munducho mana allicuna: etsantsicpa mana alli munenincuna, nawintsic ricanqanta codisyar munape, y imantsicpis capamanqantsicta galapäqui. Quecunaqa manam Dios Yayapitatsu, sinoqa que mundullapitam” (1 Juan 2:15, 16).

⁷ Kanan witsan nunakunaqa imëkayoq këtam mas munayan. Satanasmi creitsikun, atska qellëyoq karninraq kushishqa kawakuna kanqanta. Më tsëmanmi jatusaq tiendakunata churayan. Chaniyoq cösaskunata katsir-raq y kushikï cösaskunata rurar-raq alli kanqantsiktam pasëpa willakayämun. Pasëupa ëwayänampaq kaq agenciakunaqa, alläpa shumaq y chaniyoq sitiukunaman nunakunata apayänampaqmi pasëpa inkitayan, peru tsëchö ëwaq cristiänukunataqa Diospa kaqta mana respetaq nunakunawan juntarkurmi apan. Y “mas precisaq këta puëdinkim” neqtam mëchö tsëchöpis wiyantsik. Awmi, kë mundullapaqqa mas precisaq këta puëdiyanmi.

8, 9. ¿Imataq pasaramashwan y imanirtaq alläpa peligrösu kanman?

⁸ Mundu pensanqannö pensaq cristiänukunapaq parlarninmi Pëdru nirqan: “Junaq  patsapa melanepaq mana allicunata rurarirmi, tse nunacuna ä cushiquipaq canqanta churayan. Pecunam engañashqa car, penqaquipaq mana allicunata rurayan. Y tseno quecarmi, ellucayashqequicunacho miquicayan. [...] Pecunam alli cayashqanta galacuyan, mana caqcunata parlecarpis. Tsemi engañayan jutsapita tseraq raquicashqa nunacunatapis, puntatanolla quiquincunapa mana alli munenincunata yape ruracuyänanpaq. Tseno engañacurmi, ‘Librim cantsic’ nishpa, yachatsicuyan. Tseno nicarpis, esclabu cuentam diabluta sirwicayan. Porqui meqan nunapis mana alli rurenin bensiptenqa, jutsapa esclabunmi quecan” (2 Pëd. 2:13, 18, 19).

⁹ “Nawintsic ricanqanta” munaparnin ruranqantsikqa manam libramantsiktsu. Sinöqa, Satanaspa esclävunmanmi tikratsimantsik (1 Juan 5:19). Alleq mana cuidakurqa qellëpa y imëka cösaskunapa esclävunmi tikrarishwan, y tsëpita librakunapaqqa alläpa sasam.

10, 11. ¿Pikunatataq Satanasqa mas ishkitsita munan y imanirtaq alläpa problëmakunaman chäyanman jatusaq estudiukunaman ëwaqkunaqa?

¹⁰ Satanasqa Eden huertachö ruranqannöllam mana alläpa musyaqkunata y jövinkunata ishkitsita tïran. Pëqa manam munantsu juk jövin o juk mayor nuna Jehoväpa esclävun tikrananta. Jina Jehovällatana sirwinapaq awnikunqantsiktam ushakätsita munan.

¹¹ Libri këta mana munaq esclävupa rinrinta uchkuyanqanman yarpärishun. Uchkurapuyaptinqa nanatsikunqam, peru ichik tiempullachömi kachakärinqa, y tsëpita witsëpaqa imëyaqpis esclävu kanqantam señalnin rikätsikunqa. Jina tsënö sasachi juk jövinpaqpis kanqa yanaqinkunapita jukläya kawëta akranqanqa. Satanasqa creitsikun universidäkunaman estudiaq ëwar-raq kushishqa kanapaq kanqantam, peru cristiänukunaqa yarpänantsikmi tsëkunapita kushikïnintsik mana shamunqanta. Jesusqa nirqan, “kushishqam kayan Diosta wanar asheq kaqkuna, porqui pëkunapaqmi Diospa mandakïninqa këkan” (Mat. 5:3, NM). Cristiänukunaqa Diosta sirwinapaqmi kawantsik y manam Satanaspaqtsu. Jehoväpa Leynintam kuyantsik y paqasta junaqtam yachakunqantsikman yarpachakuntsik (leyi Salmu 1:1-3 *). Peru jatusaq estudiukunaman  ëwaqkunapaqa manam tiempunkuna tinkunnatsu Bibliata estudiayänampaq ni Biblia ninqanman yarpachakuyänampaq.

12. ¿Imatataq akrëta puëdiyan mëtsikaq jövinkuna?

¹² Corintiukunaman qellqanqanchömi Pablu nirqan: “Sitsun Dios qayayäshonqequi öra cayarqonqui sirwipacoq, tseno sirwipacoq cayanqequipita ama llaquicuyëtsu; peru sitsun manana sirwipacoq cayänequipaq pillapis yanapecuyäshunqui, tseqa allim canqa” (1 Cor. 7:21). Punta cristiänukunapa tiempunkunachöqa karqanmi patrunkuna esclävunkunata mana allipa trataqkuna. Tsënö tratayaptinqa esclävukunapaqqa libri ëwakïmi mas alliqa kaq. Kanan witsanchöqa atska nacionkunachömi obligayan wamrakuna ëka watayaqpis estudiayänampaq. Tsëpitanam jövinqa libri quedarin imatapis akrakunampaq, itsa tsëqa akranman llapan tiempunwan Jehoväpa kaqchö yanapakunampaq. Peru alli profesionyoq kanampaq estudiëta akraq jövinqa tsë libri kënintam oqrarinqa (leyi 1 Corintius 7:23 *). 

13. ¿Ima yachatsikïtaq Jehoväpa sirweqninkunapaqqa mas alli kaq?

¹³ Colosas cristiänukunatam Pablu nirqan: “¡Paqtataq, pipis mana allita creyitsiyäshurniqui, shumaq parleninwan llutanta yachatsiyäshunquiman! Tseno mandacur yachatsicuyanqanqa nunacunapa yarpenincunallam y costumbrincunallam, manam Jesucristupatsu” (Col. 2:8). Kanan witsan yachaq nunakunaqa yachatsikuyan, ‘nunacunapa yarpenincunallata y costumbrincunallatam’. Tsënö yachatsikïkunata chaskiyanqanqa jövinkunata yanapan profesionyoq kayanqanta niyänanllapaqmi, peru trabäjuta rurayänampaqqa manam alleqllaqa yachatsintsu. Peru cristiänukunaqa akrayan Jehoväpita shamoq yachatsikïtam, tsëmi yanapan sencïllulla kawakuyänampaq y shumaq sirwiyänampaq. Timoteuta Pablu kënö ninqantam wiyakuyan: “Musyantsicmi Dios munashqanno cawaqueqa biennintsicpaq canqanta, peru tsepaqqa capamanqantsicllawanmi conformi cawacushwan. [...] Tsemi micunantsicpaq y yacacunantsicpaq capamashqaqa, cushi cushi cawacushun” (1 Tim. 6:6-8). Diplömayoq y tïtuluyoq këllapaq yarparakunampa rantinmi juk cristiänuqa llapan tiempunwan yanapakun, nunakunata Jesuspa qateqnin kayänampaq yanaparnin (leyi 2 Corintius 3:1-3).

14. Filipensis 3:8 textu ninqannö, ¿imanötaq Pablu rikarqan Diospa y Cristupa esclävun kanqanta?

 ¹⁴ Apostul Pablutaqa yachatsirqan judïukunapa Leyninta alli yachaq Gamaliel nunam. Estudianqantaqa itsa igualaratsishwan kanan witsan universidächö estudiukunatawan. ¿Imanötaq rikarqan Diospa y Jesuspa esclävun kanqanwan igualaratsirqa? Kikinmi nin: “Tsëkunataqa mana väleqpaqnam churarirqö Señornï Cristu Jesuspita alläpa valoryoq yachatsikïta yachakunqarëkur. Përëkurmi imëkatapis jaqirqö y mana väleq poqi cuentatana churarqö, Cristuwan alli këta tarinärëkur” (Filip. 3:8, NM). Pablunölla pensayanqanmi jövinkunata yanapanqa estudiu asuntuta yachëwan akrayänampaq (rikäri dibüjukunata).

15, 16. ¿Ima yachatsikïkunatataq Jehoväpa markan qomantsik y imanir?

¹⁵ Universidäkunachöqa manam yamë kawakï kantsu y imawampis manam kushishqatsu kayan y polïtica asuntukunallapaq y jukwan jukwan patsäkïllapaqmi masqa kakuyan (Efes. 2:2). Peru Jehoväpa markanqa alli kaq yachatsikïkunatam qomantsik alli pasakïchö këkaq congregacionninchö. Cada sëmanam, Yachatsikunapaq Diospa Escuëlanchö yachatsimantsik. Jinamampis soltëru precursorkunapaqqa, Soltërukuna Bibliapita Yachakuyänampaq Escuëlam kan, y casädu precursorkunapaqnam, Casakushqakuna Bibliapita Yachakuyänampaq Escuëla kan. Tsë yachatsikïkunam yanapamantsik ciëluchö këkaq Patrunnintsikta wiyakunantsikpaq.

¹⁶ Jinamampis Índice de las publicaciones Watch Tower y Watchtower Library nishqankunachömi mas alli kaq yachatsikïkunata tarintsik. Këkunam yanapamantsik Jehoväta adoranapaq. Y Dioswan amishtayänampaq nunakunata yanapanapaqpis (2 Cor. 5:20). Y tsëpitam kë nunakunapis nuna mayinkunata yachatsita puëdiyan (2 Tim. 2:2).

17. ¿Ima bendicionkunatataq chaskiyan alli kaq yachatsikïta akraqkunaqa?

¹⁷ Jesus igualatsikïwan yachatsikunqanchömi, juk patrun ishkë esclävunkunata allitam rurarqunki nir alabapärirqan, y tsëpitam pëwan mas kushikuyänampaq mas cargukunata qorqan (leyi Mateu 25:21, 23). Kanampis alli kaq yachatsikïta akrashqaqa kushikïta y bendicionkunatam apamunqa. Rikärishun Michael jövin pasanqanta. Pëqa alli nötakunatam colegiunchö jorqarqan, tsëmi profesorninkuna juk reunionman invitayarqan universidäman estudiaq imanö yëkunampaq entienditsiyänanrëkur. Tsënö nikäyaptimpis, Michaelqa ichik tiempulla estudiana estudiukunatam akrarirqan. Kikinllana mantenikurmi precursor regular këman chärirqan. ¿Tsënö ruranqampita mana allitsuraq sientikurqan? Kikinmi willakun: “Precursornö yanapakunapaq y congregacionchö anciänunö sirwinäpaq yachatsiyämanqantaqa alläpam valurä. Bendicionkuna y congregacionchö yanapakunqäkunaqa, qellëta gananäpaq kaqpitapis mas valoryoqmi. ¡Alläpam kushikö universidäman estudiaq mana ëwanqäpita”!

18. ¿Imanirtaq nintsik Diospita yachakïqa mas alli kaq kanqanta?

¹⁸ Diospita yachakunqantsikmi alli kaq yachatsikïqa, y yanapamantsikmi Jehoväta esclävunnö sirwinapaq y munëninta musyanantsikpaqpis. Jinamampis awnimantsik mana allipa esclävun kanqantsikpita libramänantsikpaq y “wamrancunatawan juntu mana ushacäcoqta” tikratsimänantsikpaqmi (Rom. 8:21). Peru masqa yachatsimantsik Patrunnintsik Jehoväta kuyanqantsikta imanö rikätsikunapaqmi (Ex. 21:5).