¿Warë warätin alli kawakunëkipaqqa suertiyoqraqku kanëki?
Pï më nunakunam creiyan warë warätin alli kawakuyänampaqqa suertipitaraq kanqanta. Tsëmi alli kawakuyta munar suertinkuna kananrëkur imëkata rurayan.
¿IMAKUNATATAN RURAYAN?
HOROSCUPUTAM LEYIYAN. Mëtsikaqmi pensayan warë warantin imanö kawakuyänampaq kaqta horoscupuchö musyëta puëdiyanqanta. Tsëmi cada junaq horoscuputa leyiyan imata rurayänampaq o mana rurayänampaq kaqta musyayänampaq.
“SUERTI APAMOQ” CÖSASKUNAMANMI CREIYAN. Wakinnam creiyan alli suertiyoq kayänampaqqa wakin plantakuna o cösaskuna yanapakunqanta, tsëmi tsëkunata katsiyan. Hong Kong markachö täraq Lo Wing * jutiyoq nunam kënö nirqan: “Juk nunam nimarqan qellëta mas gananäpaqqa vidriupita rurashqa bölata tiendäman churanäpaq”.
WANUSHQAKUNAPAQMI IMËKATA RURAYAN. Wakinkunanam creiyan wanushqa kastankuna o santukuna mana allikunapita tsapanqanta y alli kawakuyänampaq yanapanqanta. Tsëmi vëlankuna churayan, rezapäyan, misatsiyan y mas costumbrikunata rurayan. Vietnam nacionpita Van jutiyoq warmim kënö nirqan: “Noqaqa pensarqä wanushqa kastäkunapaq imëkata rurarqa alli kawakunäpaq kaqta y wamräkunapis warë warätin alli kawakuyänampaq kaqtam”.
JUK VÏDA KANQANMANMI CREIYAN. Mëtsikaqmi creiyan kanan alli o mana alli kawakuyanqanqa unë vïdankunachö imanö kayanqampita kanqanta.
Peru mëtsikaqmi tsëkuna cuentulla kanqanta pensarpis “mä imash pasamanqa” nir horoscuputa leyiyan, chaqchatsikuyan, makinkunata y casïnupa cartankunata leyitsikuyan.
¿TSËKUNAMAN CREIYANQANQA YANAPASHQAKU?
Manam yanapashqatsu.
Rikärishun Vietnam nacionpita Hao jutiyoq nunata ima pasanqanta. Alli kawakuyta munarmi pëqa horoscupuman y suertipaq cösaskunaman alläpa creeq. Y wanushqa familiankunapaqmi imëkata ruratseq. Peru, ¿tsënö ruranqankunaqa yanaparqanku? Pëmi kënö willakun: “Negociüpis ushakärirqanmi, jaqam tikrarqä, familiäwampis manam allinatsu kawarqä y alläpam llakikurqä”.
Taiwan nacionpita Qiuming jutiyoq nunam creeq horoscupuman, destinashqa kanqantsikman, suertipaq cösaskunaman, wanushqa familiankunapaq imëkata rurayanqanman y allikunata rurar juk vïdachö alli kawakunampaq kaqman. Peru tsëkunapaq alli musyapakurirmi kënö nirqan: “Cuentatam qokurirqä tsë creenciakuna y costumbrikuna mana yanapakunqanta y pantatsikunqanta. Horoscupuchö ninqampis manam cumplikantsu. Y juk vïdachö kawar sïguirninqa yarpashwanchi imakunata ruranqantsikta, tsënöpa mas alliyänapaq. Peru tsëqa manam rasumpatsu”.
“Cuentatam qokurirqä tsë creenciakuna y costumbrikuna mana yanapakunqanta y pantatsikunqanta” (QIUMING, TAIWAN NACIONPITA)
Hao y Qiuming jutiyoq nunakunanöllam mëtsikaq nunakuna cuentata qokuyashqa, tsë llapan creenciakuna warë warätin alli kawakunapaq mana willakunqanta. Tsëqa, warë warätin imanö kawakunapaq kaqta, ¿manaku musyëta puëdintsik?
Mëtsikaqmi universidäkunachö estudiarnin y atska qellëyoq kar-raq warë warätin alli kawakuyänampaq kaqta pensayan. Peru, ¿rasuntsuraq tsëqa?
^ par. 5 Wakinkunapa jutinkunaqa jukmi.
^ par. 16 Tsëqa këkan Gälatas 6:7 Diospa Palabran Bibliachömi. Y Asiachö këkaq wakin nacionkunachömi kënö niyan: “Häbasta mururqa häbastam cosechantsik”.
Capaz këkunapis gustashunki
TÄPAKOQ
Astrologïawan y adivinacionwanqa ¿musyashwanku ima pasanampaq kaqta?
¿Confiakushwantsuraq tsëkunata rurarnin willakuyanqanman?
TÄPAKOQ
Biblia yachatsikunqan
Wanurishqaqa, ¿imallapis noqantsikchö kawar sïguintsuraq? ¿Mana wanoq almayoqku kantsik? ¿Mëchötaq wanushqakuna këkäyan?
