Teyta Diostaqa manam gustantsu cumpleäñukunata celebrayanqan, tsëmi Jehoväpa testïgunkunaqa celebrayätsu. Bibliachöqa manam cumpleäñu asuntupaq clärutsu parlan, peru rikätsimantsikmi Diospaqqa mana alli kanqanta, chuskullata rikärishun.

1.   Cumpleäñukunata celebrëqa mana alli religionkunapa costumbrinkunam. Juk diccionariuchömi willakun cumpleäñuta celebrë imanö qallanqanta. Tsëchömi nin: “Nunakunaqa creiyaq cumpleäñu celebraqta, mana alli espïritukuna mana alli rurëta munayanqantam, tsëmi pensayaq amïgunkunawan juntu kayanqan y imëka munanqampis alli yarqunampaq shumaq parlapäyanqan, tsë espïritukunapita tsapanqanta” (Funk & Wagnalls Standard Dictionary of Folklore, Mythology, and Legend). Juk libruchönam willakun, unë witsanchöpis wamrakuna yuriyanqan junaqta apuntayanqanta, tsënö apuntayanqanmi yanapaq estrëllakunata estudiaqkuna tsë nunapa vïdan imanö kanampaq kaqta “horoscopuchö” rikäyänampaq. Y tsë librullachömi kënö nin: “Mëtsikaqmi creiyan cumpleäñukunachö vëlata cendiyanqanqa imatapis munayanqanta mañakuyänampaq alläpa yanapakunqanta” (The Lore of Birthdays).

    Bibliachöqa nin magia rurë, suerti qati y brujerïa rurë mana alli kanqantam (Deuteronomiu 18:14; Gälatas 5:19-21). Teyta Diosqa, Babiloniachö nunakunatapis castigarqanmi ima pasanampaq kaqta musyëta munar brüjukunata tapukuyaptin (Isaïas 47:11-15). Jehoväpa testïgunkunaqa manam cada fiesta o costumbri mëpita kanqanta musyëta munar alläpa yarpachakuyätsu, tsënö kaptimpis Bibliachöqa nin, tsë fiestakuna mana alli kanqantam. Tsëtam Jehoväta sirweqkunaqa cäsukuyä.

2.   Punta cristiänukunaqa manam cumpleäñuta celebrayaqtsu. Juk libruchömi cristiänukunapaq parlar kënö nin: “Pëkunaqa niyaq cumpleäñuta celebrëqa mana alli costumbri kanqantam”, o mana alli religionkunalla rurayanqantam (The World Book Encyclopedia). Bibliachömi willakun kë patsachö Jesus këkar apostolninkunata y wakin nunakunata Diosta imanö sirwiyänampaq yachatsinqanta, tsëtam llapan cristiänukuna rurayänan (2 Tesalonicensis 3:6).

3.   Cristiänukunaqa Jesus wanunqantam o wañunqantam yarpäyänan karqan, y manam yurinqantaqa (Lücas 22:17-20). Tsëtaqa rurayan Bibliachö kënö niptinmi: “Yurikunqantsik junaqpitaqa, wanukunqantsik o wañukunqantsik junaqmi mas alliqa” (Eclesiastes 7:1). Jesusqa wanunqanyaqmi Teyta Diosta sirwirqan y Pëqa alläpam kushikurqan. Tsëmi yurinqanta yarpänantsikpa rantin, wanunqanta yarpänantsik mas alliqa (Hebrëus 1:4).

4.   Bibliachöqa manam nintsu Diospa sirweqninkuna cumpleäñuta celebrayanqanta. ¿Qonqëkuyarqantsuraq cumpleänu asuntupaq Bibliaman qellqëta? Manam. Bibliachöqa willakunmi, Diosta mana sirweq ishkaq nunakuna cumpleäñunkunata celebrayanqanta. Peru tsë cumpleäñuta celebrayanqanqa mana allichömi usharqan (Genesis 40:20-22; Marcus 6:21-29).

 Testïgukunaqa wamrankunata alläpam kuyayan. Tsëmi wamrankuna kushishqa kayänampaq watachö atska kuti regälunkuna qarayan y pukllar y tushur kayänampaqmi imëkata rurayan. Teyta Diosqa qarakoqmi, y pë ruranqannömi papä kaqkunapis wamrankunata imatapis seguïdu qarayan (Mateu 7:11). Tsëmi Testïgukunapa wamrankunaqa cumpleäñuta mana celebrarpis llakikuyantsu. Kikin wamrakuna niyanqanta rikärishun:

•   “Mana shuyaranqantsik höra imatapis qaramashqaqa mas kushikuypaqmi” (Tammy, 12 watayoq).

•   “Papänïkunaqa manam cumpleäñü junaqtsu regälü qarayäman, peru juk junaqkunam imëkata qarayäman. Tsënö mana shuyaranqä hörakuna qarayämanqanmi masqa gustaman” (Gregory, 11 watayoq).

•   “Cumpleäñukunachöqa tortallatam mikuyan y cantayanllam, tsëqa manam gustamantsu. Peru wayichö imëkata rurayämunqanmi masqa gustaman” (Eric, 6 watayoq).