Ri Jehová kuya tijonik che ri utinamit, rumal laʼ ri utinamit ubʼanom kʼi taq tijobʼal rech ketijox ri e qachalal rech qas utz kkibʼan che ri chak kyaʼ chke. Jun chke are ri Tijobʼal chke ri kkiya ubʼixik ri Ajawbʼal. Pa ri kʼisbʼal taq junabʼ, ri utinamit ri Jehová xaq xiw ta usukʼumam ri kbʼan che uyaʼik tijonik, xaneʼ usukʼumam ri ja che kyaʼ wi ri e tijonik riʼ. Kbʼan wariʼ rech utz kekʼojiʼ wi ri qachalal che kebʼe pa ri tijobʼal y ri kkiya tijonik. ¿Jas kbʼan che ukojik ri taq kuchuj rech ksukʼumax ri e ja riʼ?

 Pa kʼi taq junabʼ kanoq, waʼ taq tijobʼal riʼ kbʼan pa taq Ja rech Ajawbʼal y pa taq Ja re nimaʼq taq riqbʼal ibʼ. Are kʼu tajin kyak kʼakʼ taq ja o tajin ksukʼumax jujun taq ja rech xaq xiw chi chilaʼ kbʼan wi ri e tijobʼal. ¿Jasche? Chqilampeʼ oxibʼ rumal.

 Kajwataj e kʼi qachalal. Ri qachalal Christopher Mavor, tobʼanel re ri Comité de Servicio re ri Jupuq Ajkʼamal bʼe cho ronojel uwach Ulew, xubʼij: «Ri taq sucursales kibʼim lo chqe che kajwataj más qachalal achijabʼ ixoqibʼ rech ktzijox ri utzij ri Dios. Jun kʼutbʼal, pa ri junabʼ 2019 ri sucursal re Brasil xrilo che kajwataj weneʼ 7,600 qachalal che e kʼolinaq pa ri Tijobʼal chke ri kkiya ubʼixik ri Ajawbʼal pa ri tinamit che krilij wajun sucursal riʼ». Ri sucursal re Estados Unidos xuqujeʼ xrilo che rajawaxik e kʼi qachalal che e precursores rech kkitijoj e nikʼaj chik rech kkitzijoj ri utzij ri Dios pa taq áreas metropolitanas, pa taq ri lugar ri ketakʼiʼ wi ri barcos y pa taq cárceles. Xuqujeʼ kajwataj qachalal che ketobʼan pa ri Departamento Local re Diseño y Construcción y pa taq ri Comités che Ketzijon kukʼ ri Hospitales. Y ri qachalal che e kʼolinaq pa ri Tijobʼal chke ri kkiya ubʼixik ri Ajawbʼal kekun che ubʼanik waʼ taq chak riʼ.

 E kʼi qachalal kitaqom ri kisolicitud. Pa kʼi taq sucursales ri e qachalal kkiya kʼi solicitudes are kʼu kʼo ta chi lugar jawchiʼ ketijox wi. Jun kʼutbʼal, pa ri sucursal re Brasil xopan 2,500 solicitudes pa jun junabʼ. Are kʼu, xaq xiw xeʼukʼam 950 qachalal rumal che kʼo ta chi kʼolbʼal jawchiʼ ketijox wi.

 Kʼolbʼal che qas utz. Are chiʼ ri qachalal kebʼe pa ri tijobʼal che kbʼan pa ri Ja rech Ajawbʼal o pa ri Ja re nimaʼq taq riqbʼal ibʼ, pa taq ri kachoch ri qachalal kekanaj kan wi. Wariʼ ktobʼanik pa taq ri lugar jawchiʼ kbʼan xa jujun taq tijobʼal pa jun junabʼ. Are kʼu, pa ri lugares che kbʼan kʼi taq tijobʼal pa jun junabʼ, weneʼ ri qachalal kekun taj kkiya más tiempo ri kachoch chke ri keʼopan pa ri e tijobʼal. Rumal laʼ xebʼan kʼolbʼal chunaqaj ri lugar che kbʼan wi ri tijobʼal, xaq xiw ri qachalal che kebʼe pa ri tijobʼal kekʼojiʼ chilaʼ.

 Pa jujun taq tinamit kajwataj kʼi millones re dólares rech kʼo jun lugar che kuya kekʼojiʼ weneʼ 30 qachalal che kebʼe pa tijobʼal, jastaq che kajwataj chke y chke ri kkiya ri tijonik.

 Ri e ja ri keya wi ri tijonik amaqʼel e kʼo pa ri lugares che naj e kʼo wi che re ri tinamit, are kʼu xuqujeʼ keqʼatan camionetas rech kʼax ta kkiriqo keʼopanik. Más utz na we pa jun lugar riʼ e kʼo wi kʼi qachalal che kkiya ri kitobʼanik che uchajixik ri taq edificios y ri taq ri equipos che kkojik pa ri tijobʼal.

 Pa waʼ taq ja riʼ kʼo bibliotecas, kʼolbʼal ri kutijoj wi ribʼ jun utukel, computadoras, impresoras y nikʼaj chi jastaq. Xuqujeʼ kʼo jun kʼolbʼal jawiʼ kkitij kiwa ri tijoxelabʼ y ri ajtijabʼ. Y tasom kʼolbʼal rech kekunik kkibʼan ejercicios y etzʼanem.

 Are kʼu, ri más nim ubʼanik are ri lugar ri kyaʼ wi ri tijonik. Jun qachalal ubʼi Troy che kchakun pa ri Departamento Mundial re Diseño y Construcción pa Warwick (Nueva York), xubʼij: «Xqataʼ che ri Departamento re Tijobʼal Teocráticas che kkibʼij chqe jas ubʼanik ri ja ri kyaʼ wi ri tijonik rech ri qachalal ri kebʼe chilaʼ kkiriq utzilal pa ri tijobʼal. Xkibʼij chqe ri unimal y ri ubʼanik ri taq ja riʼ, ri jastaq che kkoj pa ri audio y video y rajawaxik che qʼequʼm ta más». Ri qachalal Zoltán, jun chke ri ajtij re ri Tijobʼal chke ri kkiya ubʼixik ri Ajawbʼal che xbʼan pa Hungría, xubʼij: «Nabʼe kanoq, rumal che kʼo ta micrófonos, kqabʼij chke ri qachalal che rajawaxik ko kechʼawik. Are kʼu, chanim riʼ kʼo chik jun micrófono para ronojel taq ri mesas..., ¡sibʼalaj utz wariʼ!».

 ¿Jas utzilal uyaʼom ronojel wariʼ chke ri qachalal ri e bʼenaq pa ri tijobʼal y ri ajtijabʼ? Ri qachalal Angela, che xbʼe pa ri Tijobʼal chke ri kkiya ubʼixik ri Ajawbʼal che xbʼan pa Palm Coast (Florida, Estados Unidos), xubʼij: «Sibʼalaj utz wajun lugar riʼ. Qas utz ri xbʼan che ubʼanik, xaq xiw ta ri ja ri kyaʼ wi tijonik, xaneʼ xuqujeʼ ri lugar ri kojkʼojiʼ wi. Je wariʼ are qas kojchoman chrij ri tijonik kyaʼ chqe y chrij ri kqetaʼmaj». Ri qachalal Csaba, jun chke ri ajtij re ri tijobʼal re Hungría, sibʼalaj utz krilo kutij uwa kukʼ ri qachalal re ri tijobʼal. Ri areʼ kubʼij: «Ri e qachalal riʼ más ketzijonik y kkibʼij ri kikʼulmam pa kikʼaslemal. Wariʼ kojutoʼ rech kqetaʼmaj más kiwach y are chiʼ kqaya ri clases kojkunik kojtzijon chrij ri kajwataj chke».

 Chkiwach ri e qachalal che kebʼe pa ri tijobʼal y ri qachalal che kkiya ri tijonik are jun tewchibʼal che uyaʼom ri Nimalaj Ajtij Jehová ronojel ri bʼanom che waʼ taq ja riʼ (Isaías 30:20, 21). Jun kʼutbʼal, pa Filipinas xsukʼumax jun edificio rech xkoj che tijobʼal. Y jun qachalal ixoq che xbʼe pa ri Tijobʼal chke ri kkiya ubʼixik ri Ajawbʼal xubʼij: «Ronojel ri ubʼanik ri ja xukʼut chqawach che xaq xiw ta oj aj tijoxelabʼ, xaneʼ xqilo che ri Jehová nim kojril wi. Ri areʼ kraj che are chiʼ kqatijoj qibʼ chrij ri Utzij qas kojchoman chrij y kqanimaj rukʼ kikotemal».

 Rumal ri kuchuj kuya kyakik, ksukʼumaxik y kchajix ri e ja ri kyaʼ wi tijonik. Kʼi chke ri e kuchuj riʼ kyaʼ pa donate.isa4310.com. ¡Sibʼalaj maltyox che ri ikuchuj che kiyaʼo!