¿Jas ubʼanik riʼ ri ucuerpo ri Jesús?
Ri kuya ubʼixik ri Biblia
Nijun etaʼmanaq jas qas ubʼanik ri ucuerpo ri Jesús, rumal che ri Biblia kubʼij taj. Wariʼ kukʼutu che rajawaxik taj kqetaʼmaj ri ubʼanik ri ucuerpo ri Jesús. Are kʼu ri Biblia kubʼij jujun jastaq chrij rech kchʼobʼ jubʼiqʼ chrij ri ubʼanik ri Jesús.
Ri ubʼanik: Ri Jesús are judío y weneʼ xrechbʼej jujun taq ubʼanik ri unan (Hebreos 7:14). Ri Jesús kjunamataj kukʼ ri nikʼaj chik, rumal che jumul are chiʼ xel bʼi pa Galilea rech kbʼe pa Jerusalén nijun xchʼobʼow uwach (Juan 7:10, 11). Xuqujeʼ man jalan ta ubʼanik kukʼ ri utijoxelabʼ. Chnaʼtaj chqe che ri Judas Iscariote xukʼut na jachin riʼ ri Jesús rech kchʼobʼotaj uwach y kchap bʼik (Mateo 26:47-49).
Ri uwiʼ: Ri Jesús man nimaʼq ta riʼ ri uwiʼ, rumal che ri Biblia kubʼij: «jun kʼixbʼal riʼ we ri achiʼ xaq jaʼe che kkʼiy ri uwiʼ» (1 Corintios 11:14).
Ri rismachiʼ: Ri Jesús xkʼojiʼ rismachiʼ. Ri areʼ xniman che ri taqanik judía che kubʼij che utz taj che ri achijabʼ kkesaj ri kismachiʼ (Levítico 19:27; Gálatas 4:4). Xuqujeʼ pa jun profecía re ri Biblia kchʼaw chrij ri rismachiʼ ri Jesús are chiʼ xuriq kʼax (Isaías 50:6).
Ri ucuerpo: Qas qʼalaj che ri Jesús kʼo nim uchuqʼabʼ, rumal che xbʼin kʼi kilómetros chiʼ xutzijoj ri utzij ri Dios (Mateo 9:35). Kamul xeresaj bʼi ri winaq che tajin kkibʼan kʼayij pa ri templo, xeʼukʼaq ri mesas y xeresaj ri awaj rukʼ asyar che e kʼo chilaʼ (Lucas 19:45, 46; Juan 2:14, 15). Jun wuj kubʼij: «Ronojel ri kuya ubʼixik chrij ri Jesús pa taq ri evangelios kukʼutu che qas kʼo uchuqʼabʼ ri Jesús y utz uwach» (Cyclopedia de M’Clintock y Strong, volumen IV, página 884).
Ri upalaj: Ri Jesús xukʼut loqʼoqʼebʼal xuqujeʼ toqʼobʼisabʼal wachaj y qas xqʼalajin riʼ che ri upalaj (Mateo 11:28, 29). Jalajoj taq kiwach winaq xkitzukuj rech kyaʼ kubʼsal kʼuʼx chke rumal y rech keʼutoʼ (Lucas 5:12, 13; 7:37, 38). Xuqujeʼ ri akʼalabʼ utz kkinaʼo kekʼojiʼ rukʼ (Mateo 19:13-15; Marcos 9:35-37).
Molom taq tzij che kbʼix chrij ri Jesús
Ri kkichomaj jujun winaq: Jujun winaq kkichomaj che qʼeq ri Jesús rumal che ri wuj Apocalipsis kubʼij che ri uwiʼ kjunamataj rukʼ ri lana y «ri e raqan cha ubʼanik chʼichʼ che bronce» (Apocalipsis 1:14, 15, La Biblia en Quiché de Joyabaj, ortografía actualizada).
Ri qastzij: Ri wuj rech Apocalipsis xa e kʼutbʼal kukojo (Apocalipsis 1:1). Waral xya ubʼixik chrij ri uwiʼ y ri raqan ri Jesús, are kʼu are kchʼaw chrij jujun ubʼantajik are chiʼ xwalajisaxik. Are ta tajin kchʼaw chrij ri ucuerpo ri Jesús are chiʼ xkʼojiʼ cho ri uwach Ulew. Are chiʼ Apocalipsis 1:14 kubʼij che «ri uwiʼ e saq nikinoj e jachaʼ ri rismal chij, je jas ri saqalaj tew» are tajin kchʼaw chrij jun color. Ri saqalaj wiʼaj kraj kubʼij ri nimalaj unojibʼal ri Jesús rumal che naj tiempo kʼaslik (Apocalipsis 3:14). Wajun versículo riʼ tajin ta kujunamaj ri uwiʼ ri Jesús rukʼ ri lana y ri saq tew.
Pa ri visión kyaʼ ubʼixik che «ri raqan e junam rukʼ ri qʼan chʼichʼ ri karepqʼunik, jetaneʼ kenikow pa jun horno» (Apocalipsis 1:15). Y kubʼij che «ri upalaj je jas ri qʼij are taq kjuluw rukʼ chuqʼabʼ» (Apocalipsis 1:16). Ri kyaʼ ubʼixik pa wajun visión riʼ are jun etal, rumal che nijun winaq kʼo utzʼumal junam rukʼ ri kyaʼ ubʼixik waral. Pa ri e versículos riʼ are tajin kchʼaw chrij ri Jesús are chiʼ xkʼasux chkixoʼl ri kaminaqibʼ rumal che ri areʼ kʼo pa jun saqil che kojkun taj kqilo (1 Timoteo 6:16).
Ri kkichomaj jujun winaq: Ri Jesús xkʼojiʼ ta uchuqʼabʼ.
Ri qastzij: Ri Jesús kʼo uchuqʼabʼ y xuxiʼj ta ribʼ. Jun kʼutbʼal, are chiʼ jun jupuq winaq xeʼopan che uchapik ri areʼ xuxiʼj ta ribʼ (Juan 18:4-8). Xuqujeʼ xajwataj chuqʼabʼ riʼ che ri Jesús rumal che are ajanel o carpintero (Marcos 6:3).
Are kʼu, ¿jasche xtoʼ ri Jesús are chiʼ xreqaj ri cheʼ? ¿Jasche are aninaq xkam chkiwach ri nikʼaj chik? (Lucas 23:26; Juan 19:31-33). Are chiʼ xa jubʼiqʼ kraj che kkamisaxik man kʼo ta chi uchuqʼabʼ ri ucuerpo. Rumal che xwar ta jun aqʼabʼ y xuriq kʼax (Lucas 22:42-44). Ri judíos junaqʼabʼ xkibʼan kʼax che y ri romanos xkichʼay pa ri ukabʼ qʼij (Mateo 26:67, 68; Juan 19:1-3). Weneʼ ronojel wariʼ xubʼano che aninaq xkamik.
Ri kkichomaj jujun winaq: Ri Jesús amaqʼel xbʼisonik.
Ri qastzij: Ri Jesús xresaj uwach ri uTat che ri Biblia kubʼij Dios re kikotemal che (1 Timoteo 1:11; Juan 14:9). Y ri Jesús xukʼut chkiwach nikʼaj chi winaq ri rajawaxik kkibʼano rech kekikotik (Mateo 5:3-9; Lucas 11:28). Rukʼ wariʼ kqachʼobʼo che amaqʼel xilitaj che ri upalaj che kkikotik.
Wene' xuquje' utz kawilo
ETA'MANIK RE RI BIBLIA CHE NIM KIB'ANIK
¿Jasche kqabʼij che ri kubʼij ri Biblia are ri qastzij?
Ri e chomanik kʼo pa ri Biblia rech ri Dios, rumal laʼ kʼo ta jun wuj kjunamataj rukʼ.
RI KQABʼANO
Chataʼ jun solinik
Chawetaʼmaj ri kubʼij ri Biblia o chawetaʼmaj más chkij ri testigos rech Jehová.