Jobqa Biblia nisqanman jina “cheqan sonqoyoj runa karqa, sajra ruwaymantataj” karunchasqa (Job 1:1). Lotpis “cheqan” runa karqa (2 Pedro 2:8). Davidtaj Diospa ñaupaqenpi “cheqan kajta” ruwarqa (1 Reyes 14:8). Kunanqa kay runaspa kausayninkumanta yachakuna. Jinamanta yachasun paykunapis pantasqankuta, ruwasqankutaj yanapawasqanchejta, chantá juchasapas kaspapis Diosta kusichiyta atisqanchejta.

Jobqa ashkha llakiykunapi rikukorqa, chaytaj reparasqanman jina mana allinchu karqa. Chayrayku kasukojtinpis manapis Diospajqa kikillan kasqanta nerqa, chayta yuyaspaqa pantasharqa (Job 9:20-22). Chantapis, Jobqa pay kʼacha kasqanta yacharqa. Chayrayku payta uyarejkunaqa yuyarqanku Diosmanta aswan cheqan kasqanta yuyakusqanta (Job 32:1, 2; 35:1, 2).

 Lotqa iskayrayarqa Diospa kamachisqanmanta. Sodomapi, Gomorrapi ima tiyakojkunaqa millay imasta ruwarqanku, Lottaj manaña chayta rikuyta munarqachu. Chantapis chayta rikuspa “sonqompi mayta llakikoj” (2 Pedro 2:8). Diosqa nerqa chaypi tiyakojkunata tukuyninta chinkachinanta, familian salvakunanpajtaj chaymanta llojsinankuta kamacherqa. Lotqa chayta kasukunanpacha karqa, jinapis mana munarqachu wasinta saqerayta. Chayrayku Diosqa angelesta kacharqa Lotta, familianta ima chay llajtamanta orqhonanpaj. Angelestaj makisninkumanta llajtamanta jawaman aysarqanku (Génesis 19:15, 16).

Davidqa sajra munayninwan atipachikuspa, casada warmiwan qhenchachakorqa. Chantapis chay warmej qosanta mana yachananpaj wañuchicherqa (2 Samuel, 11 capítulo). Bibliaqa nin, “chay jinata ruwasqanqa Tata Diospaj mana allinchu” kasqanta (2 Samuel 11:27).

Job, Lot, David imaqa, imaymana juchaspi urmarqanku. Jinapis paykunaqa Diosta kasukuyta munarqanku. Chantapis rikucherqanku pesachikusqankuta, kausayninkuta allinchayta munasqankutataj. Chaytaj Diosta kusicherqa. Chayrayku juchallikoj runas kajtinkupis, Bibliaqa creeyniyoj runas kasqankuta nin.

Tukuy runas pantanchejpuni (Romanos 3:23). Jinapis juchasninchejmanta pesachikusunman, Dioswan allinyakunapajtaj kallpachakusunman.

 ¿Imaynatá Job, Lot, David ima chayta ruwarqanku? Jobqa llampʼu sonqo karqa. Jobqa, Dios payta tʼukurichejtin, parlasqanmanta pesachikorqa, niñataj ñaupajta jinachu yuyarqa (Job 42:6). Lotqa, Sodomapi, Gomorrapi ima millay kausay kasqanta Dios jinallataj mana allinpajchu qhawarqa. Lotqa wasinta mana saqerayta munaspapis kasukorqa. Chaymanta ripuspataj niña ujtawan kutirikamorqachu. Davidtaj Diospa kamachiyninta pʼakispapis, Diosmanta tukuy sonqo pesachikuspa perdonananta mañakorqa (Salmo 51).

Diosqa yachan pantaj runas kasqanchejta. Chayrayku Jobta, Lotta, Davidta ima pantajtinkupis allillanpajpuni qhawarqa. Diosqa atisqallanchejta mañawanchej, “yachan imamantachus ruwasqa kasqanchejta; Pay yuyarikun ñutʼu jallpʼa kasqanchejta” (Salmo 103:14). Jina kajtin, ¿imatá ruwasunman?

Chaytaqa yachanchej David, wawanman kayta nisqanpi: “Qanrí, wawáy Salomón, tataykej Diosninta allinta kasuy, paytataj sirviy tukuy sonqowan” (1 Crónicas 28:9). Diosta tukuy sonqowan sirviyqa, niyta munan payta munakuy, rejsiyta munay, nisqantataj juntʼay. Chaytaj mana niyta munanchu ni imapi pantanata. Diosta tukuy sonqo sirvejqa kasukuyta munan, kʼamisqankutataj llampʼu sonqowan kasukun. Chayrayku Diosqa Jobta “cheqan sonqoyoj runa”, “sajra ruwaymantataj karunchakoj” kasqanta nerqa. Lottataj nerqa “cheqan runa” kasqanta. Davidtatajrí nerqa “cheqan kajta” ruwaj kasqanta. Paykunaqa pantaj runas kaspapis, Diosta kusicherqanku.

Yuyayninchejman mana allin yuyaykuna jamuwanchej chay, imallatapis nirpanchej chayri ruwarpanchej chaymantaraj reparanchej mana allinchu kasqanta chayqa, mana anchata llakikunachu. Jobmanta, Lotmanta, Davidmanta ima yuyarikuna. Diosqa yachan imallapipis pantarpananchejta. Jinapis tukuy sonqo munakunanchejta, kasukunapajtaj kallpachakunanchejta munan. Ajinata ruwajtinchejqa Dios mayta kusikonqa.