Jairoqa cuadriplejía espástica nisqa onqoyniyoj nacekorqa, chay onqoytaj parálisis cerebral nisqa onqoy jina. * Ñojtun mana allin kasqanraykutaj cuerponta mana allinta apaykachayta atinchu, chantapis chakisnin makisnin sinchʼita kʼuyukunku. Jairoqa wakin kuti ujllata thalakuyta qallarin nanaykuchikuntaj. Ladonpi kajkunatapis mana reparakojtinkoqa takarpanman. Chayrayku sapa kuti makisninta, chakisnintawan wataykuyku ruedasniyoj sillanman, mana imanarpakunanpaj.

Jairotaqa wiñasqanman jina ukhun sinchʼita nanarqa. Kinsa killitanmantapacha thalakuyta qallarerqa, chaytaj wañusqata jina saqej. Mamayqa ashkha kutispi usqhayllata ichuriykukuspa hospitalman apaj, wañusqa kashasqanta yuyaspa.

Jairoj tullusnenqa wistʼuyararqa. Chantá 16 watayoj kashajtintaj cadera tullun llojserparqa, chayrayku operananku karqa. Yuyarikullanipuni Jairo chaymanta allinyakushaspa maytapuni nanaywan qhaparisqan tutasmanta.

Hermanoyqa ni imata ruwayta atisqanrayku, wajkunaj yanapantapuni necesitan mikhunanpaj, pʼachallikunanpaj chayri puñuykunanpaj. Tataywan mamaywan payta yanapanku. Tatasneyqa yuyarichinkupuni mana paykunaj yanapaynillantachu necesitasqanta, manaqa Jehová Diospatapis.

Tatasneyqa Jehovaj testigosnin kanku, Bibliamantataj leeripunkupuni Jairo uña wawita kasqanmantapacha. Reparankutaj Dios amigonchej kajtenqa aswan kusisqa kausakusqanchejta. Chantapis yacharqanku Jairoj cuerpon mana kallpayoj kajtinpis, sumaj kausayta suyakunanpaj yanapanankuta. Jinapis mana yacharqankuchu, Bibliaj yachachisqanta entiendesqantachus manachus.

Uj pʼunchay Jairo wawallaraj kashajtin, tatay nerqa: “¡Jairo parlariway ari! Munakuwaspaqa  parlariwankiman”. Chay ratopacha Jairoqa waqay ñawilla kasharqa. Imatachus sientesqanta parlayta munarqa, jinapis chhichiy jinalla uyarikorqa. Tatayqa sonqo nanasqa kasharqa waqachisqanmanta. Chaywanpis Jairoqa mana parlaspapis, imatachus nisqankuta entiendesqanta rikucherqa.

Chaymantataj tatasniy repararqanku Jairo wakin kuti ñawisninta usqhayllata kuyuchisqanta; imatachus sientesqanta, yuyasqanta ima ñawisninwanpis nishanman jina. Mana entiendechikuspaqa, ni imanakuyta atejchu. Jairoqa kusirikoj, ñawisninta kuyuchispa imatachus niyta munasqanta tatasniy entiendejtinku. Ajinamanta agradecekusqanta rikuchej.

Uj doctora niwasqaykuman jina, hermanoytaqa tapoj kayku arí chayri mana nispa kutichinallanpaj, makisniykutataj ñaupaqenman churaj kayku. Ajinamanta Jairoqa paña makita qhawanan karqa arí ninanpaj, lloqʼe makitataj mana ninanpaj.

Watapi kinsa kutita Jehovaj testigosnenqa, Jatun tantakuykunata ruwanku, mayqenmanchus may chhika runas rinku. Jairoqa bautizakojkunapaj umallirichiyta uyarispa mayta kusikoj. Uj pʼunchay Jairo 16 watayoj kashajtin, tatay taporqa: “¿Jairo, qanpis bautizakuyta munankichu?” Chay ratopacha tataypa paña makinta qhawarerqa. Chantá taporqa: “¿Diosmanta mañakunkiñachu wiñaypajtaj sirvinaykita ninkiñachu?” Watejmanta tataypa paña makinta qhawarerqa. Arí, Jairoqa Jehovaman paypaj kausananta nisqaña.

Ashkha kutista Bibliawan parlarispa, Jairoqa entienderqa bautizakunapuni kasqanta. Kay 2004 watapitaj kayta taporqanku: “¿Jehovaman qokunkichu paypa munayninta juntʼanaykipaj?”. Jairoqa kuticherqa patata qhawarispa, imajtinchus arí ninanpaj jinata kutichinanta nerqanku. Hermanoyqa 17 watayoj kashaspa bautizakorqa, Jehovaj testigontaj karqa.

Jairoqa 2011 watapi uj computadorayoj karqa, chaytataj ñawillanwan funcionachej, pantallapi kaj dibujitustataj kichariyta atin. Chay computadorapeqa uj dibujitota jina qhawaspa chayri chʼirmispa imatachus qhawayta munasqanta kicharin. Jairopajqa wajkunawan parlarinanpaj  computadoranpa pantallanpi ashkha dibujosta jina churaporqanku. Chay computadorapeqa ujnin dibujituta qhawaspa chʼirmejtin imachus qhelqasqa kasqan, parlashanmanpis jina uyarikun.

Jairoqa astawan Bibliamanta entienderqa, wajkunamanpis yachakusqanta yachachiyta munarqa. Familiapi Bibliata estudiashajtiyku Jairoqa noqata qhawariwan, computadorantataj. Ajinamanta nishawan qhelqapunayta, chaytataj tantakuykunasniykupi tapukusqanman kutichiyta atin.

Tantakuypiña kaspataj, Jairoqa imamantachus parlariyta munasqanta ujnin dibujitupi jina kicharin. Ajinamanta tukuy uyariyta atinku computadoran parlasqanta. Jairoqa asirinpuni chaywantaj tukuy hermanosta kallpachan. Alex pichus ujnin amigon nin: “Jairo imallatapis Bibliamanta parlarisqan tʼukuchiwan”.

Jairoqa ñawisnillanwantaj runaman creesqanmanta willarin. Chaypajtaj computadoranpi paraisomanta dibujituta jina chʼirmispa kicharin. Computadorapitaj uyarikun: “Bibliaqa nin Jallpʼa paraíso kananta maypichus mana onqoy nitaj wañuy kanqachu; Apocalipsis 21:4”. Runas astawan yachakuyta munajtinkoqa computadoranta qhawaspa chʼirmin, chaypitaj uyarikun: “¿Munawajchu Bibliamanta astawan yachakuyta?”. Abueloytaj yachakuyta munarqa. May sumaj karqa Jairo, abueloyman Bibliamanta yachachisqanqa. Chaytataj pisimanta pisi waj hermanoj yanapayninwan ruwarqa. Abueloyqa ujnin jatun tantakuyniykupi Madrid llajtapi bautizakorqa 2014 watapi, agosto killapi. ¡Tukuy kusisqa kasharqayku!

Jairo creeyniyoj kasqantaqa colegiopi profesoresninpis reparallankutaj. Ujnin profesoran Rosario sutiyoj nerqa: “Maykʼajllapis uj religionmanta kayta munaspaqa Jehovaj testigon kayman. Jairoqa kausayllatapuni munan, sinchʼi onqosqa kaspapis”.

Jairoqa sapa kuti Bibliapi kayta leeripojtiy kusirikun: “Cojosqa tarukas jina phinkiykachanqanku; opapis kusiywan takirenqa” (Isaías 35:6). Jairoqa wakin kuti llakikuspapis, astawanqa kusisqapuni kashan Diosta sirvisqanrayku amigosniyoj kasqanraykutaj. Jairo kusisqa kasqan, sinchʼi creeyniyoj kasqantaj rikuchin imayna llakiyniyoj kaspapis Jehovata sirvispaqa, kausayllatapuni munasqanchejta.