CHOONG KEON, warmin Juliewan 35 watasniyoj jina kanku. Pasaj 5 watas ñaupajta Sydney (Australia) llajtapi precursores regulares jina llankʼarqanku. Choong Keon nin: “Khuskan pʼunchayllata llankʼaspapis, allinta tiyakoj kayku. Llajtaykoqa qʼoñisito, kʼachitutaj. Familiaykoj, amigosniykoj qayllanpi kaspataj kusisqas kasharqayku”, nispa. Jinapis paykunaqa mana sonqo juntʼasqachu kasharqanku. ¿Imaraykú? Imaraykuchus Diospaj astawan llankʼayta atispapis, mana chayta ruwasharqankuchu.

Kay 2009 watapi uj jatun tantakuypi, uj umallirichiyta uyarisqanku sonqonkuman chayarqa. Imaraykuchus umallirichejqa Diospaj astawan llankʼayta atejkunamanta parlarqa. Nerqataj: “Autota apaykachajqa, autota purichisparaj pañaman chayri lloqʼeman qʼewiyta atin, ¿icharí? Jinallatataj Jesusqa, Diospaj astawan llankʼanapaj kallpachakushasqanchejta rikusparaj, imatachus ruwanata rikuchiwasunman”, nispa. * Chay qhariwarmeqa chay umallirichiy paykunapajpuni kasqanta yuyarqa. Chay tantakuyllapitaj uj qhariwarmi misionerosta umallirichej tapurerqa. Chay misionerosqa Taiwanpi sirvisharqanku. Chayrayku Taiwanpi willaspa kusisqas kashasqankuta, mayraj willana kasqanta ima nerqanku. Choong Keon, warmin Juliewan chayta uyarispa watejmanta yuyarqanku paykunapajpuni chay kasqanta.

Julie nin: “Jatun tantakuy tukukusqantawan, Jehovamanta mañakorqayku Taiwanman ripunaykupaj kallpata qonawaykuta”, nispa. Paykunaqa waj suyuman ripuyta manchachikorqanku. Manchachikuyninkuta atipanankupajtaj Eclesiastés 11:4 versiculoj nisqan yanaparqa. Chaypi nin: “Wayrata qhawajqa mana tarpunchu, phuyusta qhawajpis mana cosechanchu”, nispa. Choong Keon nin: “Wayrata ‘qhawanaykumantaqa, tarpuyta’  munarqayku, chantá ‘cosechayta’”, nispa. ¿Imatá ruwarqanku? Kutin kutita Diosmanta mañakorqanku, publicacionesninchejpi misionerospa kausayninkumanta leerqanku, Taiwanman ripoj hermanosman correosta apacherqanku, autosninkuta, waj imasninkuta ima venderqanku. Kinsa killanmantaj Taiwanpiña kasharqanku.

Taiwanpeqa pachajmanta astawan hermanos, pisi willajkunalla kanku chaypi yanapakushanku. Paykunataj Australia, Canadá, Corea, España, Estados Unidos, Francia, Gran Bretaña, Japón suyumanta ima kanku. Chay hermanosqa 21 watayojmanta 73 watayojkama kanku, 50 kurajtaj solteras kanku. ¿Imaraykutaj chay hermanos riporqanku?

Canadamanta uj soltera hermana Laura sutiyoj, Taiwanpa inti yaykuynej ladopi precursora jina llankʼashan. Payqa chunka watas ñaupajta willaypi mana kusiyta tarejchu. Pay nin: “Pisillata willayman llojsej kani, chayraykutaj kusiyta mana tarejchu kani”, nispa. Uj kuti Canadamanta wakin amigosnin, Mexicoman uj killata paykunawan willaj rinanpaj wajyarisqanku. Laura nin: “Chay kutipiraj ashkha tiempota willaypi karqani. Chaytaj, ¡may sumaj karqa!”, nispa.

Chayrayku payqa Canadaman kutiytawan, waj qallupi kaj qotuchakuyta yanapaj ripuypi tʼukurerqa. Chaypajtaj chino qalluta yachakorqa, chay qallupi kaj qotitumantaj uj tiempota rerqa. Taiwanman ripuypitaj tʼukurerqa, 2008 wata septiembre killapitaj Taiwanman riporqa. Pay nin: “Uj watapi jinapuni Taiwán suyuman yachaykukorqani. Kunantaj Canadaman kutiyta ni yuyallanipischu”, nispa. ¿Willaspa kusiyta tarinchu? Pay nin: “Mayta gustawan. Runas Jehovata rejsispa kausayninta tijrachejta rikoyqa, ni imawan kikinchakunchu. Kaypitaj chayta ashkha kutispi rikuni”, nispa.

Brian, warmin Michelle imaqa, 35 watasniyoj jina kanku. Estados Unidosmanta, Taiwanman ripusqankutaj pusaj watas jinaña kashan. Taiwanman chayaytawan willaypi mana anchata yanapakushasqankuta yuyarqanku. Unaytaña llankʼaj misionero, paykunaman nisqa: “Uj tratadollapis runaman saqespa, kayta yuyarikuychej: ichapis ñaupaj kutirayku chay runa Jehovamanta parlajta uyarishan. Chayrayku kaypi yanapakushasqaykichejqa, ¡may allinpuni!”, nispa. Chay misioneroj nisqan Brianta, Michelletawan kallpachakunallankupajpuni yanaparqa. Waj hermanotaj paykunaman nisqa: “Chino qalluta yachakuspa mana saykʼunaykichejpajqa, uj jatun tantakuymanta waj jatun tantakuykama mashkhatachus yachakusqaykichejta qhawaychej, amataj sapa pʼunchay yachakusqaykichejtaqa”, nispa. Paykunaqa chayta ruwarqanku. Kunantaj precursores jina sumajta llankʼashanku.

¿Imataj yanapasonqa waj qalluta yachakuyta munanaykipaj? Chaypajqa maymanchus ripuyta munanki chay suyuta waturej riwaj. Chay suyupitaj tantakuykunaman riy, hermanoswan kay, paykunawantaj willaj llojsiy. Brian nin: “Runas Bibliamanta yachakuyta munasqankuta, hermanospa munakuyninkuta rikuspa imaqa, chay suyuman ripuyta munanki”, nispa.

Taiwanman ripoj wakin precursoresqa, inglesta yachachispa llankʼanku. Kristin, Michellewan challwasta vendespa llankʼanku. Kristin nin: “Ni jaykʼajpis challwasta venderqanichu, jinapis kay llankʼayqa kaypi kanallaykupajpuni yanapawayku”, nispa. Tiemponmanqa ashkha caserosniyoj karqa. Necesitasqallankupaj llankʼasqankurayku, iskayninku Diosmanta willayta ñaupajman churanku runa japʼej challwiri jina llankʼaspa, nisunman precursores kaspa.

Williamwan Jenniferwanqa Estados Unidosmanta kanku. Qanchis watastañataj Taiwanpi kashanku. William nin: “Waj qalluta yachakuspa, precursor kaspa, qotuchakuyta qhawaspa, necesitasqanchejpaj llankʼaspa imaqa saykʼusunman”, nispa. ¿Imaynatá chaykunata ruwaspapis kusisqallapuni karqanku? Imatachus ruwayta atisqallankuta ruwaspa. Sutʼincharinapaj chino qalluta yachakushaspa tukuy atisqallankuta ruwarqanku. Chayraykutaj mana yachakushasqankuta reparaspa, yachakunankupaj kallpachakullarqankupuni.

Williamqa uj waturej hermanoj yuyaychasqanta yuyarikun. Chay hermanoqa, qotuchakuypi ima llankʼayllatapis japʼiyta munanchej chayqa, chayta japʼinapaj kusiywan kallpachakuna kasqanta yuyaychasqa. Williamqa hermanoj nisqan yachaykukunanpaj, qotuchakuyta ñaupajman apaj hermanospa yuyaychasqankuman jina ruwananpaj, chay suyullapipuni qhepakunanpaj ruwaykunata waj jinamanta ruwananpaj ima yanapasqanta yuyarikun. William nin: “Chay hermano yuyaychariwasqaykoqa, kay llajtapi kaj kʼachitu lugaresman tiempochakuspa rinaykupajpis yanapallawarqaykutaj”, nispa.

Estados Unidosmanta uj soltera precursora Megan sutiyoj, chino qalluta sumajta parlananpaj mayta kallpachakushan. William, Jennifer jinallataj waj suyupi willaspa kusiyta tarin. Sapa semana tukukuytataj ashkha willajkunawan barco sayana Kaohsiung cheqaman willaj rin. Kaohsiungtaj Taiwanpi tarikun, Taiwanpi kaj barco sayanasmantataj aswan jatun. Meganqa barcomanta barco willaspa, Bangladés, Filipinas, India, Indonesia Tailandia, Vanuatu suyusmanta challwa japʼejkunaman willarqa. Pay nin: “Challwata japʼejkuna mana unaytachu qhepakusqankurayku, kikin barconkupi Bibliamanta yachachiyku. Tukuy runasman yachachinaypajtaj, ashkha kutispi  ujllapi tawa chayri phishqa runasman yachachini”, nispa. ¿Chino qalluta sumajtañachu parlashan? Pay nin: “Usqhayllata yachakuyta munaspapis, uj hermanoj niwasqanta yuyarikullanipuni, pay niwarqa: ‘Tukuy atisqanchejta ruwajtinchej, Jehová yanapawasunpuni’”, nispa.

Cathyqa Gran Bretañamanta waj suyuman manaraj ripushaspa, ima suyuspichu soltera hermanas Diosta sirviyta atillasqankuta sumajta qhawarerqa. Chayraykutaj Diosmanta mañakuytawan, ashkha sucursalesman qhelqayta qallarerqa. Sucursales kutichimusqankupi tʼukuriytawan, Taiwanman ripuyta ajllarqa.

Cathyqa 31 watayoj kashaspa 2004 watapi Taiwanman riporqa, kapusqallanwantaj kausakun. Pay nin: “Hermanosta tapurerqani maypichus frutas, verduras ima barato kasqanta. Ajinamantataj qolqesituy mana usqhayllata tukukorqachu”, nispa. ¿Imataj yanaparqa kapusqallanwan kausakunanpaj? Pay nin: “Diosmanta mañakuni, kapuwasqallanta mikhuspa, kapuwasqan pʼachallawan kaspa kusisqa kanaypaj. Jehovataj mañakuyniyta uyariwan. Yanapawantaj kapuwasqallanwan kusisqa kausakunaypaj, mana tukuy imayoj kaspapis. Chaytaj gustawan, imaraykuchus ajinamanta astawan Diospaj llankʼayta atini”, nispa.

Kapusqallanwan kausakuspapis, mana llakisqachu kausakun. Cathy nin: “Kaypeqa ashkha runas willayninchejta uyarinku, chaytaj kusichiwan”, nispa. Pay precursora jina llankʼayta qallarerqa chay llajtapeqa chino parlaypi iskay qotuchakuylla karqa, kunantaj 7 qotuchakuykunaña tiyan. Cathy nillanpuni: “Ashkha runas Diospa llajtanman yaykushasqankuta rikuy, chaypitaj yanapakushasqay imaqa, kusisqallapuni kanaypaj yanapawan”, nispa.

¿Imaynataj Choong Keonta, Julientawan Taiwanpi rerqa? Choong Keonqa Taiwanman chayaytawan qotuchakuyta mana anchata yanapananta yuyarqa, chinota mana allintachu parlasqanrayku. Taiwanmanta hermanostaj, mana pay jinachu yuyarqanku. Pay nin: “Qotuchakuyniyku tʼaqakojtin, siervo ministerial kasqayrayku ashkha ruwaykunata qowarqanku. Chay kutipiraj yanapata astawan necesitakun chaypi llankʼashasqayta repararqani”, nispa. Kusiywantaj nillanpuni: “Noqapis yanapakusqayta yachaspa, nitaj qhasillachu kashasqayta yachaspa mayta kallpachakorqani”, nispa. Choong Keonqa, anciano jinaña llankʼashan. ¿Ima nintaj warmin? Pay nin: “Kunantaj ni jaykʼaj jina sonqo juntʼasqas kashayku. Yanapakushasqaykuta reparayku, kusisqastaj kayku. Yanapakoj jamojtiykupis, hermanos noqaykuta astawan yanapawayku. Chaytaj mayta kusichiwayku. Mayta Jehovaman agradecekuyku kaypi llankʼajta saqewasqaykumanta”, nispa.

Yachaywasipi yachakuyta, ¿tukuchashankiñachu? ¿Imatachus kausayniykiwan ruwanaykipichu tʼukurishanki? Soltero chayri soltera kasqaykirayku, ¿Diospa llajtanpi astawan yanapakuyta munawajchu? ¿Munawajchu familiayki Diospaj astawan llankʼasqaykimanta kusiywan yuyarikunankuta? Jubilasqaña kanki chay, ¿munawajchu Diospaj astawan llankʼaspa, imastachus yachasqaykiwan ima waj hermanosta yanapayta? Ashkha lugarespiraj willanapaj yanapa necesitakun. Diospaj astawan llankʼayta ajllanki chay, waj lugarmantaj ripunki chay, ama iskayrayaychu ashkha bendicionesta japʼinaykimanta.