LUZIAQA LLOQʼE CHAKINMANTA COJITA. Payqa juchʼuyllaraj kashaspa uj onqoyta chimpaykuchikusqanrayku cojitaman tukusqa. Luzia 16 watayoj kashajtin, patronan payman nisqa: “Nichá mamaykita kasukorqankichu, machu machuchus karqanki. Chayraykuchá Dios castigasunki”, nispa. Chay nisqanqa Luziaj sonqonta mayta nanacherqa, kunankamataj yuyarikullanpuni.

DAMARISMAN UMANPI CANCERNIYOJ KASQANTA WILLAJTINKU, tatanqa payman nisqa: “Ima juchatachá ruwarqanki. Chantachá Dios castigashasunki”, nispa. Tatan chayta nisqanrayku, Damarisqa qʼala sonqo pʼakisqa karqa.

Runasqa unaymantapachaña yuyanku, Diosninchej runasta onqoykunawan castigasqanta. Jesuspa tiemponmanta parlaj libro nin: “Uj runa onqoykojtin, runasqa yuyaj kanku chay runata Dios castigashasqanta. Chay castigotataj juchanmanta chayri mayqen familianpa juchanmanta japʼisqanta”, nispa. Jesús wañupusqanmanta ashkha watasninman, runasqa kikillantataj yuyaj kanku. Chay tiempomanta parlaj libro nin: “Wakin runasqa yuyaj kanku, wañuchej onqoykunaqa runas juchallisqankurayku kasqanta”, nispa. ¿Jinachu kanman? 1301-1400 wata chaynejpi ashkha runasta wañuchej onqoy, ¿Diospa castigonchu karqa? Chayri, ¿doctores ninku jinachu jukʼuchasnejta runasman chimpaykorqa? ¿Ciertopunichu Dios runasta onqoykunawan castigan? *

TʼUKURINA: Diosninchej runasta onqoykunawan chayri waj llakiykunawan castigan chayqa, Jesusqa nichá onqosqasta sanoyachinmanchu karqa. Imajtinchus chayta ruwaspaqa, Dioswan churanakushanman karqa (Mateo 4:23, 24). Jesustajrí ni jaykʼaj Diospa contranpi churakorqachu. Payllataj nerqa: “Noqaqa imatachus munasqantapuni ruwani”, nispa. Chantá nillarqataj: “Imaynatachus Tatay kamachiwarqa ruwanayta, ajinata ruwashani”, nispa (Juan 8:29; 14:31).

Bibliaqa Jehová Diosmanta nin: “Payqa cheqanmin, cheqa kajta ruwajtaj”, nispa (Deuteronomio 32:4). Kaypi piensarina. ¿Diosninchej ashkha pasajerosniyoj avionta urmachinmanchu, uj sajra runata wañuchinanpaj? Mana. Diospa kamachin Abrahán nerqa: ‘Diosqa ni jaykʼaj cheqan runasta juchasapastawan khuska tukuchinchu’, nispa. Jehová Diosqa ni yuyallanpischu chayta ruwayta (Génesis 18:23, 25). Biblia nin: ‘Diosqa mana ima sajratapis ruwanchu, nitaj ima mana cheqan kajtapis’, nispa (Job 34:10-12).

¿Dios juchanchejmanta castigawaschejraykuchu onqonchej? Mana. Jesús chayta yachachiwanchej. Uj kutipi, Jesusqa yachachisqasninwan purishaspa uj runata rikorqa. Chay runaqa nacekusqanmantapacha ciego karqa. Yachachisqasnintaj Jesusta taporqanku: “Yachachejníy, ¿pitaj juchallikorqa kay runa ciego nacekunanpaj? ¿Paychu? ¿Tatasninchu?”, nispa. Jesustaj kuticherqa: “Mana paychu, nitaj tatasninchu juchallikorqanku”, nispa (Juan 9:1-3).

Jesuspa yachachisqasnenqa, chayta uyarispa maytachá tʼukorqanku. Imajtinchus chay tiempomanta runasqa, yuyaj kanku Dios runata onqoykunawan castigasqanta. Jesusqa chay cieguitota sanoyachispa, pantasqata yuyasqankuta  rikucherqa (Juan 9:6, 7). Diosninchejqa mana runasta onqoykunawan castiganchu. Sinchʼi onqoyniyoj kajkunaqa, chayta yachaspa maytachá sonqochakunku.

Biblia niwanchej

• “Diosqa mana sajra imaswan pruebaman churasqa kayta atinchu, nitaj payqa pitapis sajra imaswan pruebaman churanchu” (SANTIAGO 1:13). May chhika unaytaña onqoykunawan, nanaywan, wañuywan ima ñakʼarishanchej. Diosninchejtaj chay tukuy llakiykunata pisimantawan chinkachenqa.

• Jesucristoqa “tukuy onqosqastapis sanoyacherqa” (MATEO 8:16). Jesusqa Diospa Gobiernonpi kamachishajtin, chayllatataj ruwanqa.

• “Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis. Chay ñaupaj kaj imasqa chinkapunña” (APOCALIPSIS 21:3-5).

Mana Dioschu castigashawanchej chay, ¿imajtintaj kay mundopi chay chhika llakiykuna kan? Runasqa unayña chayta yachayta munanku. Chanta, ¿pitaj juchayoj llakiykuna kananpaj? Qhepan yachaqanapi chaymanta parlarisun.