Diospa sutin. Pay nin: “Ñoka Jehová cani, chayka sutiymin”, nispa (Isaías 42:8, Biblia Quechua de Cuzce [QC]). Bibliapi Diospa sutenqa 7.000 kutismanta astawan rikhurin. Chaywanpis wakin Bibliaspeqa Diospa sutinta churanankumantaqa Señor nispa churaykunku. Diosqa amigonchej kayta munan, sutintataj oqharinanchejta munan (Salmo 105:1).

¿Imastawantaj Biblia oqharin? Bibliapeqa Jehovata nikun: Dios, Tukuy Atiyniyoj, tukuy imata Ruwaj, Dios Tata, Señor ima. Ñaupa tiempopi Diospa kamachisnenqa paymanta mañakuspa sutinta oqharej kanku chayri Tata Dios, Señor nej kanku (Daniel 9:4).

¿Imaynataj Dios? Diosqa mana rikukoj cuerpoyoj (Juan 4:24). Bibliaqa nin: “Diostaqa  ni jaykʼaj pi runapis rikorqachu”, nispa (Juan 1:18). Bibliaqa nillantaj Dios kusikusqanta llakikusqantataj. Chayrayku ruwasqasninchejwanqa llakichisunman chayri kusichisunman (Salmo 78:40, 41; Proverbios 11:20).

Imayna Dioschus kasqan. Diosqa tukuy runasta uj rejllata qhawan ima llajtamanta kajtinkupis (Hechos 10:34, 35). Chantapis Diosqa khuyakuyniyoj, kʼacha sonqoyoj, pacienciayoj, mana llullakunchu nitaj kamachisninta saqerparinchu (Éxodo 34:6, 7). Chaywanpis Diosqa astawan rikuchin atiyninta, yachayninta, cheqan kayninta, munakuynintataj.

Atiynin. Diosqa “Tukuy Atiyniyoj”. Atiynenqa mana tukukuyniyoj chayrayku tukuy ima nisqanta juntʼanpuni (Génesis 17:1).

Yachaynin. Diosqa tukuymanta nisqa aswan yachayniyoj. Chayrayku paymanta Biblia nin: “Dioslla tukuy yachayniyojqa”, nispa (Romanos 16:27).

Cheqan kaynin. Jehová Diosqa cheqanpuni. “Ruwasqasnenqa may sumajpuni”, “mana jaykʼajpis pantanchu” (Deuteronomio 32:4).

Munakuynin. Biblia nin: “Diosqa munakuymin”, nispa (1 Juan 4:8). Diosqa mana munakullawanchejchu, manaqa paypuni munakuy. Mayta munakuwasqanchejraykutaj tukuy imata ruwan, chaytaj allinninchejpaj.

Runasqa amigosnin kayta atinkuman. Diosqa cielopi kashaj Tatanchej (Mateo 6:9). Paypi creespaqa amigosnin kayta atisunman (Salmo 25:14). Payqa noqanchejmanta llakikun, chayrayku mañakuspa payman qayllaykunanchejta munan. Problemasninchejtapis makisninman saqenanchejta munan (Santiago 4:8; 1 Pedro 5:7).

Jesusqa mana Dioschu. Jesusqa kʼata, Diospuni payta ruwasqanrayku. Chayrayku Bibliaqa nin Diospa Wawan kasqanta (Juan 1:14). Diosqa Jesusta tukuy imamanta ñaupajta ruwarqa. Diostaj Jesusta churarqa tukuy imata ruwaysinanpaj, cielopi kaj imasta kay jallpʼapi kaj imastapis (Proverbios 8:30, 31; Colosenses 1:15, 16).

 Jesusqa ni jaykʼaj nerqachu pay Dios kasqanta. Astawanpis nerqa: “Paypa sutinpi jamuni, Paytaj kachamuwan”, nispa (Juan 7:29). Jesusqa María Magdalenawan parlashaspa Jehová Diosmanta parlaspa nerqa: ‘Tatayqa Tataykichej, Diosneyqa Diosniykichej’, nispa (Juan 20:17). Diosqa Jesusta wañuchejtinku kausarichimorqa cielopi kausananpaj, paña ladonman tiyaykucherqa, tukuy atiytataj qorqa (Mateo 28:18; Hechos 2:32, 33).

Jesucristoqa Diosman qayllaykunapaj yanapawasunman

Jesusqa jallpʼaman Tatanmanta yachachej jamorqa. Jehová Diosqa Jesusmanta nerqa: “Kaymin munasqa Wawayqa. Payta uyariychej”, nispa (Marcos 9:7). Jesusqa Diosta sumajta rejsin. Pay nerqa: “Manallataj pipis Tatayta rejsinchu, manachayqa noqalla, chantá pimanchus noqa rejsichiyta munani, chaypis rejsillantaj”, nispa (Lucas 10:22).

Diosman tukuy imapi rijchʼakorqa. Jesusqa Tatan jinapuni tukuy imata ruwarqa. Chayrayku pay nerqa: “Noqata rikuwajqa Tataytapis rikullantaj”, nispa (Juan 14:9). Jesusqa runasta yanaparqa Diosman qayllaykunankupaj. Imaraykuchus payqa rikucherqa parlasqanwan, ruwasqanwan ima Tatan runasta munakusqanta. Jesús nerqa: “Noqa ñan kani, cheqa kajtaj, kausaytaj. Mana pipis Tatayman chayayta atinchu, mana noqanejtaqa”, nispa (Juan 14:6). Nillarqataj: “Cheqa yupaychajkunaqa Tata Diosta yupaychanqanku paypa atiyninman jina, cheqa kajman jinataj. Tata Diosqa chay jina yupaychajkunata maskʼashan payta yupaychanankupaj”, nispa (Juan 4:23). Jehová Diosqa paymanta yachakuyta munajkunata maskʼashan.