34 YACHAQANA

¿Bibliap yuyaychasqanta kasukunaypunichu tiyan?

Colegioykipiqa, iskay compañerasniykiwan mikhuchkaspa, colegioykiman kunallanraq jamuq waynata rikunkichik.

—Sergioqa manchayta munakusunki, chaytaq sutʼita rikukun. Qhawariy. ¡Qamllata qhawachkasunki! —nispa juknin compañerayki nisunki.

—Payqa, mana piwanpis riqsinakuchkanchu —nispataq juknin compañeraykiñataq chhichiykuspalla nisunki.

Qamqa, Sergio paypaq qhawakuchkasusqanta reparankiña, ¡chay juk pʼunchaylla wasinman juk raymiman  waqyarisurqa! Qamtaq mana nirqanki, chaywanpis, imaynachus risunanmanta iskaychasqa qhipakurqanki.

Ñawpaq kaq sipasqa, mana tʼukuriqtapis saqisuspa, nisunki:

—Manachus juk waynawan riqsinakuchkayman chayqa, mana iskaychakuspa paywan riqsinakuyta qallariyman.

Chaymanta tʼukulla qhawasunki, yachankitaq imatachus tapusunanta:

—¿Qamri? ¿Imaraykutaq mana piwanpis riqsinakuchkankichu?

Imatachus tapusunanta yuyachkarqanki, chaytapuni tapurisunki. Qamtaqrí juk waynawan riqsinakuyta munanki, chaywanpis tatasniykiqa, casarakunaykipaq wakichisqa kanaykikama mana piwanpis riqsinakunaykita nisunku. Manachus kanman...

—Religionniykirayku mana piwanpis riqsinakuchkankichu, ¿icharí? —nispa juknin compañerayki nisunki.

“¿Imaynamantá imatachus yuyachkasqayta yachan?”, nispa tʼukurinki.

—¡Ay qamqa! Bibliallawanpuni —nispa asipayasunki—. Wakin kutillapis kusirikunaykipaq, ¿manachu imatapis ruwawaq? —nispa nillasunkitaq.

¿MAYKʼAQLLAPIS Bibliap nisqanmanjina kawsachkasqaykimanta asipayasurqankuchu? Jina kaptin, ichá Bibliap kamachisqan kusisqa kawsaqta mana saqichkasusqanta yuyarqanki. Dorispis jinata yuyarqa, nintaq: “Bibliap kamachisqan ni imata ruwaqta saqiwasqanta yuyarqani. Compañerasniy munasqankumanjina kawsasqankurayku, ñuqapis paykunajina kawsayta munarqani”.

Bibliap kamachisqan allinniykipaq kasqanta reparay

Mana llakiypi kachkasparaqchu, imachus allin kasqanta yachananchik tiyan. Bibliaqa, wakkunap pantasqankumanta yachakunanchikta yuyaychawanchik. Salmos libromanta juknin qillqaq Asaf sutiyuq, ajinata ruwarqa. Payqa, Bibliap kamachisqan ni imata ruwaqta saqisqanta yuyarqa. Chaywanpis  Diosmanta karunchakuqkunata imaynatachus kawsachkasqankuta rikuspa, ‘lluskʼanankupaqjinaña’ kachkasqankuta repararqa (Salmo 73:18).

Kay nisqanchikpi tʼukurispa, imatachus wakin waynas chayri sipaskuna nisqankuta qhawariy, paykunaqa, juk tiempo, Bibliap nisqanta qhisachaspa, khuchichakuypi urmarqanku.

● ¿Imataq Bibliap nisqanmanjina manaña kawsanaykipaq tanqasurqa?

Doris: “Colegioypi tukuypis juk waynawan chayri juk sipaswan riqsinakuchkarqanku, may kusisqasjinataq kachkarqanku. Paykunata muchʼanakuqta, uqllanakuqta ima rikuspa, sapitay sientekuq kani, paykunajinataq puriyta munaq kani. Achkha horasta gustawasqan waynapi yuyasqayraykutaq, sapa pʼunchay astawan paywan kayta munaq kani”.

Miguel: “Qhariwarmijina puñuykuymanta revistasta ñawiriq kani, peliculastapis qhawaq kani. Amigosniywan chayllamanta parlasqayraykutaq, qhariwarmijina puñuykuy imaynachus kasqanta mayta yachayta munaq kani. Chantá juk sipaswan sapallayku kachkaspa, khuchichakuypi mana urmaspa payta muchʼaykuyta, llamkhaykuyta ima atisqayta yuyaq kani”.

Andrés: “Qʼala runasmanta fotosta Internetpi qhawaq kani. Alcoholtapis ukyaq kani, Bibliap nisqanmanjina mana kawsayta munaqkuna waynaswantaq fiestasman riq kani”.

Teresa: “Mana casarakuspa qhariwarmijina puñuykuy jucha kasqanta yachaspapis, sunquypi mana juchapunichu kasqanta yuyarqani. Mana piwanpis qhariwarmijina puñuykuyta munarqanichu, chaywanpis aychap munayninwan atipachikurqani. Sunqu yuyayniy thalluyasqa kasqanraykutaq, chay ruwasqaymanta manaña juchachawaqchu”.

 ● ¿Diosmanta karunchakuspa kusisqachu kawsarqanki?

Doris: “Qallariypiqa, munasqaymanjina kawsachkasqaymanta, compañerosniy amigankupaq qhawawasqankumanta ima, may kusisqa kachkarqani. Chaywanpis chayqa, pisi tiempollapaq karqa, imaraykuchus ruwasqaymanta chʼichichasqajina sientekuyta qallarirqani. Mana casarakuspalla juk waynawan qhariwarmijina puñuykusqaymanta, mayta llakikurqani”.

Andrés: “Aychap saqra munayninta mana atipayta atillaqchu kani. Chaywanpis sunqu yuyayniyqa, aychap munayninwan atipachikusqaymanta mayta juchachawaq”.

Teresa: “Khuchichakusqayqa, kusiyniyta chinkachirqa. Munakusqay waynawan kusisqa kanayta yuyarqani. Chaywanpis, mana ajinachu karqa. Imaraykuchus khuchichakuspaqa, mayta sunquykuta nanachinakurqayku. Sapa tutataq camaypi mayta waqaq kani, Jehovap kamachisqanta pʼakisqayrayku”.

Miguel: “Manaña ñawpaqtajinachu kusisqa karqani. Ruwasqaywan wakkunata ñakʼarichichkasqaypi mana tʼukuriyta munaspapis, chaypi tʼukuriq kani. Aychap munaynillanta ruwasqaywan wakkunata ñakʼarichichkasqaymanta, mayta llakikuq kani”.

● Juk wayna Bibliap kamachisqan ni imata ruwaqta saqisqanta nisuptin, ¿imatá niwaq?

Teresa: “Jehovap nisqanmanjina kawsallaypuni, kamachiykunasninta jatunpaq qhawaqkunawantaq puriy. Jinamanta kusisqa kawsanki”.

Doris: “Mana ñuqallanchikpichu yuyana, nitaq munasqallanchiktachu ruwana. Imaraykuchus  ruwasqanchikqa, wakkunata llakichinman. Diosta mana kasukuspataq, mana kusisqachu kawsakusunchik”.

Andrés: “Imachus allin kaqta mana reparayta yachaspaqa, amigosniyki munasqankuta ruwaspa kusisqas kawsachkasqankuta yuyanki. Paykunajinataq ruwayta qallarinki. Chayrayku allin amigosta akllay, kusisqa kanaykipaqtaq Diospi atienekuy”.

Miguel: “Diosqa, jatunpaq qhawasqa kayta, llimphu kawsayniyuq kayta ima, sumaq regalostajina quwanchik. Khuchichakuypi urmaspa kaykunata chinkachiyqa, pʼinqaypi rikuchiwanchik. Chayrayku, ima chʼampayniykitapis tatasniykiman, chayri juk wakichisqa cristianoman usqhayllata willay, chʼampayniykita allinchanaykipaq. Jehovata kasukuspaqa, sunqu tiyasqa kawsakunki”.

 Bibliap nisqan: ¿llakiykunamanta jarkʼasunanpaqchu, chayri wataykusqatajina japʼisunanpaqchu?

Jehovaqa, ‘kusikuq Dios’, kusisqa kanaykitataq munan (Salmo 104:31; Eclesiastés 11:9). Bibliap yuyaychasqan mana wataykusqatajina japʼisunanpaqchu manaqa juk cinturón de seguridadjina jarkʼasunanpaq.

Chayrayku Bibliap nisqanpi atienekuy. Jehovap munasqanmanjina ruwallaspapuniqa, payta kusichinki, achkha bendicionestataq japʼinki (Isaías 48:17).

QHIPAN YACHAQANAPI

Qamqa, Diospa amigon kayta atinki. ¿Imaynamantá?

BIBLIAMANTA

“Noqamin Señorniyki Tata Dios kani; noqa yachachiyki imachus qampaj allin kasqanta.” (Isaías 48:17)

JUK YUYAYCHANA

¿Sullkʼa hermanoyki kapusunkichu? Jina kaptin, Bibliap nisqanmanjina kawsay may allin kasqanta imaynatachus sutʼinchanaykipi tʼukuriy. Sutʼinchaptiykitaq imapichus creesqaykiqa, sunquykipi qhipakunqa.

¿YACHARQANKICHU?

Ima juchapipis urmaspaqa, Jehovamanta juk ratollapi karunchakuwaq, payman watiqmanta qayllaykunaykipaqtaq, ichá watas pasanan kanqa.

¡RUAYTA QALLARIY!

Bibliap nisqan, imaraykuchus allinniypaq kasqanta entiendenaypaq, kayta ruwasaq... ․․․․․

Dios kamachisqanmanjina kawsay allin kasqanmanta iskachakuspaqa, kayta ruwasaq... ․․․․․

Kay yachaqanamanta, ¿imatá tatayta chayri mamayta tapuyta munani? ․․․․․

QHAWASQAYKIMANJINA

● Llakiypi kachkasparaq Diosta kasukuy may allin kasqanta yachay, ¿imaraykutaq mana allinchu?

● Doris, Miguel, Andrés, Teresa ima nisqankumanta, ¿imatá yachakunki?

● ¿Imaraykutaq wakinkuna Bibliap nisqan mana imatapis ruwaqta saqiwasqanchikta yuyanku? Chantá, ¿imaraykutaq pantasqapi kachkasqankuta niwaq?

[285 paginapi sutʼinchaynin]

Jumchallikusqaykimanta kʼamisuptinkuqa llakikunki, chaywanpis ruwasqaykita pakaptiykiqa astawanraq llakikunki.” (Sandra)

[288 paginapi dibujos/fotos]

Bibliap yuyaychaykunasninqa, mana wataykusqajina sientekunaykipaqchu manaqa llakiykunamanta jarkʼasunanpaq