¿Imayna rijchʼayniyojtaj Jesús karqa?
Biblia nin
Bibliaqa mana willawanchejchu, imayna rijchʼayniyojpunichus Jesús kasqanta. Chayqa rikuchiwanchej Jesuspa rijchʼayninta yachayqa, ni imapi yanapawasqanchejta. Jinapis Bibliaqa Jesusmanta wakin imasta willawanchej, ajinamanta imaynachus kasqanta tumpallatapis yachananchejpaj.
Rijchʼaynin: Jesuspa mamanqa judía karqa. Chayrayku Jesusqa paymanchá rijchʼakorqa (Hebreos 7:14). Jesusqa waj judíos jinallatajchá karqa. Imaraykuchus Galileamanta Jerusalenman rejtin, runasqa payta mana rejsiyta atillarqankuchu (Juan 7:10, 11). Chantapis nisina discipulosninmantapis uj jinachu karqa. Chayrayku Jesusta presochaj ashkha runas espadasniyoj, kʼaspisniyojtaj jamojtinku, Judas Iscariote payta rejsichinan karqa (Mateo 26:47-49).
Chujchan: Jesusqa manasina jatun chujchayojchu karqa. Imaraykuchus Bibliaqa nin: ‘Qharipajqa jatun chujchayoj kayqa pʼenqay kasqanta’ (1 Corintios 11:14).
Barban: Jesusqa barbayoj karqa. Judiospa leyninkuman jina qharisqa barbayojpuni kananku karqa. Jesustaj chay leyta kasukorqa (Levítico 19:27; Gálatas 4:4). Chantapis Jesusmanta uj profecía payta ñakʼarichishajtinku ‘barbanmanta tʼiranankuta’ nerqa (Isaías 50:6).
Cuerpon: Jesusqa kallpayoj runapuni karqa. Payqa Diosmanta willananpaj may karusta purerqa (Mateo 9:35). Chantapis templopi vendejkunata iskay kutipi qharqorqa. Mesasninkuta tijrarparqa, ovejasninkuta wakasninkutapis seqʼonawan qharqorqa (Lucas 19:45, 46; Juan 2:14, 15). Uj libro nin: “Tawantin evangelios rikuchiwanchej, Jesusqa allin wapitu kasqanta” (Cyclopedia de M’Clintock y Strong, volumen IV, página 884).
Uyan: Jesusqa mana phiña uyachu karqa. Payqa manchay munakuyniyoj khuyakuyniyojtaj karqa. Chaytaj sutʼichá uyanpi rikukorqa (Mateo 11:28, 29). Chantapis tukuy clase runas payta maskʼaj kanku, sonqochakunankupaj, yanapata mañakunankupaj ima (Lucas 5:12, 13; 7:37, 38). Wawaspis mana manchachikojchu kanku payman qayllaykuyta (Mateo 19:13-15; Marcos 9:35-37).
Jesuspa rijchʼayninmanta pantasqa yuyaykuna
Wakin runas ninku: “Jesús yana runita kasqanta. Imaraykuchus Apocalipsis libropeqa, chujchanta millmawan kikinchan, chakisnintataj ‘lluskʼachasqa broncewan’”, nispa (Apocalipsis 1:14, 15, Mosoj Testamento 1985).
¿Jinapunichu? Mana. Apocalipsis libroqa kikinchaykunawan qhelqasqa kashan (Apocalipsis 1:1). Chayrayku Jesuspa chujchanmanta, chakisninmantawan parlaspaqa, mana kay jallpʼapi imayna rijchʼayniyoj kasqanmantachu parlashan. Manaqa cieloman kutipuspa imaynachus kashasqanmanta parlashan. Apocalipsis 1:14 versículo Jesusmanta nin: “Umanpis chujchanpis yuraj karqa, yuraj millma jina, ritʼi jina”, nispa. Chay versiculoqa, mana nishanchu Jesuspa chujchan millma kikin kasqanta. Nillataj nishanchu ritʼi kikin kasqanta. Astawanpis Jesús yuraj chujchayoj kasqanta nispaqa, nishan Jesús manchay unayta kausasqanrayku, may yachayniyoj kasqanta (Apocalipsis 3:14).
Apóstol Juanqa mosqoypi jina rikusqanpi nerqa: “Chakisnenqa chʼuwachasqa cobre jina lliphipirisharqa, hornopi unuyachisqa cobre jina”, nispa (Apocalipsis 1:15). Chantá nillarqataj, ‘uyanqa mayta kʼancharej inti jina kasqanta’ (Apocalipsis 1:16). Chaywan rikuchiwanchej, Juanpa mosqoypi jina rikusqanqa kikinchaykunalla kasqanta. Imaraykuchus kay jallpʼapi ni mayqen runapis Juanpa rikusqanman rijchʼakunchu. Chay versiculosqa Jesús kausarimusqanmanta qhepaman imaynachus kashasqanmanta parlashan. Imaraykuchus kunan payqa, ‘mana taripay atina kʼanchaypi tiyakun’ (1 Timoteo 6:16).
Wakin runas ninku: “Jesusqa pisi kallpa karqa”, nispa.
¿Jinapunichu? Jesusqa mana pisi kallpachu karqa. Astawanpis may kallpayoj, waputaj karqa. Chayrayku payta presochaj rejtinku, Jesusqa mana manchachikuspa pichus kasqanta nerqa (Juan 18:4-8). Chantapis Jesusqa carpintero karqa. Chaypajtaj kallpayojpuni kanan karqa (Marcos 6:3).
Chantá, ¿imaraykutaj Jesuspa ñakʼarinan kʼaspinta wajwan qʼepicherqanku? ¿Imaraykutaj Jesús paywan khuska warkhusqa suwasmanta ñaupajta wañorqa? (Lucas 23:26; Juan 19:31-33). Imaraykuchus Jesusqa wañupunan qayllata manaña kallpanpichu kasharqa. Chantapis llakisqa kasqanrayku, waj imasrayku ima tutantin mana puñorqachu (Lucas 22:42-44). Chantapis judiosqa, tutantin mayta sufricherqanku. Qʼayantintaj romanosñataj maqarqanku, seqʼorqanku, uyanpi laqʼarqanku ima (Mateo 26:67, 68; Juan 19:1-3). Ichapis chayrayku Jesusqa ratolla wañuporqa.
Wakin runas ninku: “Jesusqa llakisqalla, umphulla karqa”, nispa.
¿Jinapunichu? Mana. Imaraykuchus Jesusqa, Tatan Jehovaman tukuy imapi rijchʼakorqa. Bibliataj Jehovamanta nin, ‘kusikuyniyoj Dios kasqanta’ (1 Timoteo 1:11; Juan 14:9). Chantapis Jesusqa, runasman yachacherqa imatachus ruwanankuta kusisqa kausakunankupaj (Mateo 5:3-9; Lucas 11:28). Chayrayku nisunman Jesusqa kusisqa kasqanta, manataj llakiy uyallachu purisqanta.
Kaykunatapis qhawaykurillawajtaj
BIBLIAMANTA SUMAJ YACHACHIYKUNA
Bibliaqa cheqata parlan
Diospuni Bibliata qhelqacherqa chayqa, mana mayqen libro jinallachu kanan tiyan.
