Mesen nting pahieu pwukat ni lokaiahn Ipru יהוה, me kin wehwehki mwaren Koht, kin pwarada kereniong pak 7,000 nan Palien Paipel ni Lokaiahn Ipru. New World Translation kin kawehwehdi mesen nting pahieu pwukat, me adaneki Tetragrammaton, “Siohwa.” Mwar wet me keieu kalapw pwarada nan Paipel. Ni ahnsou me sounnting en Paipel kan kin koasoia duwen Koht, re kin doadoahngki lengileng kan me duwehte “Wasa Lapalahpie,” “Me keieu Lapalap,” oh “Kauno,” ahpw Tetragrammaton me iei ihte mwar me re kin doadoahngki pwehn kasalehda uhdahn mwaren Koht.​—Kilang Senesis 2:4, nting tikitik me mi pah.

Pein Siohwa Koht me ketin kamwakid sounnting en Paipel kan en doadoahngki mware. Karasepe, e ketin doadoahngki soukohp Soel en ntingihedi: “Koaros me kin likweriong mwaren Siohwa pahn mourla.” (Soel 2:32, NW) Oh Koht ketin doadoahngki emen sounmelkahka en ntingihedi: “Pwe aramas akan en esehla me komwi, me mwarenki Siohwa, komwi kelehpw me Keieu Lapalap pohn sampah koaros.” (Melkahka 83:18, NW) Ni mehlel, mwaren Koht pwarada mpen pak 700 nan pwuhken Melkahka kelehpw—pwuhken mahsen kaselel kan me sapwellimen Koht aramas akan pahn kin koulki oh wadek. Ahpw, dahme kahrehda mwaren Koht sohte mi nan kawehwehn Paipel tohto? Dahme kahrehda New World Translation kin doadoahngki mwar wet “Siohwa”? Oh ia wehwehn mwar wet Siohwa?

Dahme kahrehda mwar wet sohte mi nan kawehwehn Paipel tohto? Kahrepe kan wekpeseng. Ekei kin medewe me Koht Wasa Lapalahpie sohte anahne mwar tohrohr ehu pwehn kasalehda duwen ih. A ong ekei, e kin mwomwen me re kin wia met pwehki arail kin idawehn tiahk en mehn Suhs kan en dehr doadoahngki mwar wet, ele pwehki re masak re de kasouwahwihala mwar wet. Pil ekei kamehlele  me pwehki sohte me uhdahn ese ngoaren mwaren Koht, e mwahu en doadoahngkihte lengileng kan me duwehte “Kauno” de “Koht.” Ahpw kaidehn kahrepe mwahu kei met. Dahme sansalda pah pahn kawehwehda kahrepen met:

• Irail kan me kin akupwungki me Koht Wasa Lapalahpie sohte anahne mwar tohrohr ehu kin pohnsehsehla mehn kadehde kan me pelien nting en mahs kan en sapwellime Mahsen, iangahki me nekinekla mwohn mwehin Krais, kin kolokol mwaren Koht. Nin duwen me kitail koasoiahier mwoweo, Koht ketin kaweid sounnting en Paipel kan en ntingihedi mware nan sapwellime Mahsen mpen pak 7,000. E sansal me e kupwurki kitail en esehla oh doadoahngki mwareo.

• Sounkawehwe kan me kihsang mwaro kin idawehn en mehn Suhs kan ar madamadau ong ire wet, sohte kin pohnese ire mehlel ehu me inenen kesempwal. Mendahki ekei sounnting kan en mehn Suhs sohte nda mwar wet, ahpw re sohte kihsang mwar wet nan neirail Paipel. Ekei pwuhken Paipel en mahs dierek nan Qumran, me karanih Sehd en Mehla. Mwar wet kin kileldi wasa tohto nan pwuhk pwukat. Ekei sounkawehwehn Paipel kan kin mwomwen kasalehda me mwaren Koht pwarada nan tepin nting kan en Paipel en mahs sang ni arail ale oh wiliankihdi lengileng wet “KAUNO” ni mesen nting laud kan. Ahpw peideko duduwehte, Dahme kahrehda sounkawehwe pwukat medewe me re ahneki saledek en wiliandi de kihsang mwaren Koht nan Paipel ni arail esehier me mwaren Koht dierek nan Paipel pahn pak kid kei? Ihs me re kamehlele me kihong irail pwuhng en wiahda soangen wekidekla wet? Irail kelehpw me kak nda.

• Irail kan me kin nda me e sohte konehng kitail en doadoahngki mwaren Koht pwehki e sohte nohn sansal ia duwen atail pahn nda mwar wet kin doadoahngki mwaren Sises ni saledek. Ahpw, mwomwen tepin sapwellimen Sises tohnpadahk ko ar kin nda mwareo uhdahn weksang mwomwen Kristian en rahnpwukat kin nda mwareo. Ong Kristian en mehn Suhs kan, mwein re kin nda mwaren Sises Ye·shuʹa‛. Oh lengileng wet “Krais” iei Ma·shiʹach de “Mesaia.” Kristian kan me kin lokaiahn Krihk kin ekerkin ih I·e·sousʹ Khri·stosʹ, oh Kristian kan me kin lokaiahn Latin kin ekerkin ih Ieʹsus Chriʹstus. Pahn sapwellimen Koht kaweid, kawehwehn Krihk ong mwareo kileldi nan Paipel. Met kasalehda me tepin Kristian kan ni loalokong kin doadoahngki mwar wet ni ahl me aramas kin ahn doadoahngki ni arail lokaia. Pil duwehte, Pwihn me kawehwehdi New World Translation pehm me e konehng en doadoahngki mwaro “Siohwa,” mendahki kaidehn ih uhdahn mwomwen ngoaren mwaren Koht ni lokaiahn Ipru en mahs.

 Dahme kahrehda New World Translation kin doadoahngki mwar wet “Siohwa”? Ni lokaiahn Wai, mesen nting pahieu YHWH kin wiliandi mesen nting pahieu Tetragrammaton (יהוה). Ni ahnsou me aramas ntingihedi lepin nting kan ni lokaiahn Ipru en mahs, iangahki Tetragrammaton, re sohte kin doadoahngki mesen nting pwukat a, e, i, o, u. Ahpw, aramas kin ese mwomwen arail pahn ndahla lepin lokaia pwukat pwehki re kin doadoahngki rahn koaros.

Mpen sounpar kid mwurin Palien Paipel ni Lokaiahn Ipru eh wiawihda, mehn Suhs tohto ahneki madamadau ehu me dene e sapwung en nda mwaren Koht oh ahnsou koaros me re wadek mwaren Koht, re kin wekidohng mwomwen ar kin nda mwaro ong lengileng kan duwehte “Kauno.” Eri rahnwet kitail sohte ese ia duwen sapwellimen Koht aramas akan mahs ar kin nda mwaren Koht. (Senesis 13:4; Eksodus 3:15) Ekei me samanih Paipel medewe me mwomwen arail kin nda mwar wet “Yahweh,” ah ekei kin nda me mwein mwomwen arail kin nda mwar wet iei Iae, I·a·beʹ, oh I·a·ou·eʹ. Mendahki kitail sohte uhdahn ese ia duwen arail kin nda mwar wet ni lokaiahn Ipru mahs, ahpw kitail ese me re kin doadoahngki mwar wet ni arail kin koasoiong meteikan oh ni arail kin patohong Koht.​—Eksodus 6:2; 1 Nanmwarki 8:23; Melkahka 99:9.

Ahpw, dahme kahrehda New World Translation doadoahngki mwar wet “Siohwa”? E kohsang ehu ngoaren mwaren Koht “Jehovah” me kin mi ni lokaiahn wai sangete mahs.

Tepin kawehwehn mwaren Koht ni lokaiahn wai pwarada nan nein William Tyndale kawehwehn pwuhken Pentateuch (Tepin pwuhk limau kan nan Paipel) nan pahr 1530. E doadoahngki nan nah Paipelo mwar wet “Iehouah.” Kedekedeo lokaiahn wai ekis wekila, oh mwomwen ar kin ntingihdi mwaren Koht rahnpwukat wekila. Karasepe, nan pahr 1612, Henry Ainsworth doadoahngki mwar wet “Iehovah” nan nah kawehwehn pwuhken Melkahka. Nan pahr 1639, ahnsou me  e kamwahwihala kawehwehn Paipel wet oh kapatahiong kawehwehn pwuhken Pentateuch, mwar wet “Jehovah” me e doadoahngki. Nan pahr 1901, sounkawehwe kan wiahda American Standard Version oh doadoahngki mwar wet “Jehovah” ni wasa kan me mwaren Koht pwarada nan Paipel ni lokaiahn Ipru.

Nan pahr 1911, emen me samanih Paipel Joseph Bryant Rotherham, kawehwehda nan nah pwuhk Studies in the Psalms dahme kahrehda e doadoahngki “Jehovah” a kaidehn “Yahweh.” E nda me e men doadoahngki “mwaro me aramas tohto me kin wadek Paipel ahn rong (ahpw me koaros kak pwungki).” Nan pahr 1930, A. F. Kirkpatrick, emen ohl me kin samanih Paipel koasoia mehkot me pil duwehte met duwen doadoahngki mwar wet “Jehovah.” E nda: “Irail me samanih koasoandi en lokaia kan rahnpwukat akupwungki me kitail en wadek ni mwomw wet, Yahveh de Yahaveh; ahpw JEHOVAH me mwomwen miher ni lokaiahn wai, oh ire me keieu kesempwal iei kaidehn ia duwen atail pahn ndahla ni pwung, ahpw en sansal me ih Pein Mwaren Koht met, ah kaidehn lengileng kan me duwehte ‘Kauno.’”

Ia wehwehn mwar wet Siohwa? Ni lokaiahn Ipru, mwar wet Siohwa kohsang lepin lokaia wet me wehwehki “en wiahla.” Ihme kahrehda Pwihn me Kawehwehdi New World Translation wehwehki me wehwehn mwaren Koht iei “E Kahrehiong en Wiahla.” Irail me samanih Paipel kan ahneki madamadau me wekpeseng, eri kitail sohte kak ngihtehtehki duwen met. Ahpw wehwehn mwar wet pahrekiong pwukoa me Siohwa kin ketin wia nin duwen Sounkapikadahn mehkoaros oh me kin Kapwaiada kupwure. E sohte ihte ketin wiahda lahng oh sampah oh tohnleng kan oh aramas akan en mie, ahpw e ketin pousehlahte kahrehiong kupwure en pweida.

Ihme kahrehda, wehwehn mwar wet Siohwa sohte wehwehkihte lepin mahsen me dierek nan Eksodus 3:14 (NW) me mahsanih: “I Pahn Wiahla Dahme I Pilada en Wiahla.” Lepin mahsen pwukat sohte kawehwehda mwaren Koht ni unsek. Ahpw, re kin kawehwehda ehu kisehn irair kaselel en Koht, me kasalehda duwen eh kin ketin wiahla dahme anahn nan soangsoangen irair kan pwehn kapwaiada kupwure. Mendahki wehwehn mwaren Siohwa kak pidada ire wet, ahpw e sohte ihte wehwehkiong dahme e ketin pilada en wiahla. E pil kin pidada dahme e ketin kahrehda en wiawi me pid duwen sapwellime kepikipik kan oh pwehn kapwaiada kupwure.