PAIPEL SAPENGKI: “Ahnsou ehu pahn kohdo me irail koaros me mihmi nan sousou kan pahn rong [Sises], oh re pahn pedoisang nan arail sousou kan.”​—Sohn 5:28, 29.

Sises ketin kohpadahr duwen ahnsou kohkohdo me, pahn kaundahn sapwellime Wehi, nan Sousou sohla pahn mie kanenge. Fernando, me kitail koasoiapenehr nan oaralap en mwoweo, nda: “I pwuriamweikihla ni ei tepin wadek Sohn 5:28, 29. E kihong ie koapworopwor mehlel, oh met I kin perenki kasikasik ahnsou kohkohdo.”

Mahsie, ohl lelepeko Sohp kasik me mwurin eh mehla Koht pahn ketin komourada ih. Sohp nda: “Ma aramas emen pahn mehla, e kak pwurehng mourda?” Ih eri sapeng ni likilik: “I pahn awiawihete ahnsou mwahu sang met, oh kasikasik ahnsou apwal wet [ahnsou nan Sousou] lao sohrala. Eri, ahnsowo, komw pahn ketin malipe ie, I ahpw pahn patohwan sapeng.”​—Sohp 14:14, 15.

Kaiasada kaidehn mehkot kapw ong rien Lasarus liho Marda. Mwurin Lasarus mehla, Sises ketin mahsanihong Marda: “Riomw ohlo pahn pwurehng mourda.” Marda sapengki: “I patohwan ese me e pahn pwurehng mourda ni rahnen neko.” Sises eri mahsanihong ih: “Ngehi me mour sapahl oh Sounkomour. Mehmen me pwoson ie, mehnda ma e pahn mehla, ahpw e pahn mour [“mourda,” NW].” (Sohn 11:23-25) Ahnsowohte Sises ketin kaiasada Lasarus! Koasoipen Paipel kaperen wet kin kasalehiong kitail soahng kaselel kan me pahn wiawi ni ahnsou kohkohdo. Medewehla soangen kaiasada pwukat ar pahn wiawi nan sampah pwon!

PAIPEL SAPENGKI: Mahsen en Koht kasalehda me sapwellimen Sises iasada weksang iasadahn meh welimen teiko me kileldi nan Paipel. Irail meh welimen pwukat pwurehng mourda nin sampah. Ahpw duwen sapwellimen Sises iasada, kitail wadek: “Sises Krais, me ketidalahngehr nanleng oh ketidiongehr ni palimaun en Koht.” (1 Piter 3:21, 22) Ia duwe, Sises kelehpw me pahn ketin iasadahng nanleng? Sises ketin padahkihong sapwellime wahnpoaron ko: “I lao kohla oh kaunopada deumwail, I ahpw pahn pwurodo oh kahreikumwaildohng ie, pwe kumwail en mi wasa me I kin mi ie.”​—Sohn 14:3.

Krais ketidahla nanleng oh ketin kaunopada ong ekei sapwellime tohnpadahk ko ar pahn kohdahla. Nempehn irail kan me iasadahng nanleng pahn kedekedeo lella meh 144,000. (Kaudiahl 14:1, 3) Ahpw dahme sapwellimen Sises tohnpadahk ko pahn wia wasao?

 Irail uhdahn pahn soupisek! Paipel mahsanihong kitail: “Meid pai mehlel irail kan me pahn iang iasada keieu wet. Mehla keriau solahr ahneki manaman pohrail, pwe re pahn wiahla samworo en Koht oh Krais, oh re pahn iang kakaun erein pahr kido.” (Kaudiahl 20:6) Irail kan me iasadahng nanleng pahn iang Krais ketin kakaun sampah nin duwen nanmwarki oh samworo kei.

PAIPEL SAPENGKI: Paipel kilelehdi padahk wet me wahnpoaron Pohl kasalehda: “I koapworopworki Koht, duwen me pein ohl pwukat kin koapworopworki, me aramas koaros, me mwahu oh suwed, pahn iasada sang mehla.”​—Wiewia 24:15.

Ihs irail kan me Pohl kahdaneki “me mwahu”? Medewehla ehu karasepe. Tohnleng men padahkihong Daniel mwohn eh pahn kereniong mehla: “Ke pahn mehla, ahpw ke pahn pwurehng iasada pwe ke en ale ketingpomw ni imwilahn ahnsowo.” (Daniel 12:13) Ia wasa me Daniel pahn pirida ie sang mehla? Paipel mahsanih: “Me pwung kan pahn koukousoan nan sahpwo [“sampah,” NW] oh re pahn sapwenikihla kohkohlahte.” (Melkahka 37:29) Oh Sises ketin kohpada: “Meid pai me nan kapehd opampap akan; pwe re pahn sohsohki sampah.” (Madiu 5:5, NW) Daniel oh ohl oh lih lelepek teikan pahn iasada pwehn pwurehng mour nin sampah, pil kohkohlahte.

Ihs irail kan me Pohl kahdaneki me “suwed”? Iei irail meh lik lik kei me melahr, tohto me saikinte ahneki ahnsou mwahu en wehwehki oh kapwaiada padahk mehlel kan en Paipel. Mwurin arail iasada, re pahn kak esehla oh kalahnganki Siohwa * oh Sises. (Sohn 17:3) Irail kan koaros me pilada en papah Koht pahn ahneki koapworopwor en mour kohkohlahte duwehte Siohwa.

PAIPEL SAPENGKI: Koht “pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) “Aramas akan pahn kauwada imwarail kan oh kousoanla loale . . . Re pahn wiahda ar mwetuwel en wain oh pahn kin nsenamwahuki wahn wain kan.”​—Aiseia 65:21.

Medewehla mour pahn soangen irair pwukat rehn irail kan me ke poakohng me iasada! Ahpw miehte peidek ehu, Ia duwen omw kak uhdahn kamehlele me kaiasada pahn wiawi?