E pahn mengei en nda me Sehdan, me kitail kin wadek nan Paipel, kin wiahte kilelepen soahng suwed koaros. Ahpw ia duwe, ih met me Paipel uhdahn kin padahngki? Ma ei, dahme kahrehda Paipel kasalehda me Sehdan koasoakoasoiong Sises Krais oh pil Koht Wasa Lapalahpie? Tehk duwen koasoakoasoipene riau pwukat.

Ni Sises eh ketin tapiada sapwellime doadoahk en kalohk, Tepilo song en kasongehki ih kasongosong siluh. Keieu, Sehdan nantihong en kasonge Sises en doadoahngki ni elen roporop manaman me Koht ketikihong ih pwe en kaitarala eh men mwenge. Keriau, Tepilo pil kasonge Sises en ketin kahrehiong eh mour en mihla nan keper pwehn ihte kasalehda uwen eh kesempwal. Kesiluh, Sehdan kasongehki Sises manaman en kaunda wehi koaros en sampah ma Sises ketin poaridi oh pwongih ih. Sises ketin soikala kasongosong widing siluh pwukat oh ketin doadoahngki iren Paipel kan pwehn sapengala ehuehu kasongosong ko.​—Madiu 4:1-11; Luk 4:1-13.

Ihs me Sises ketin mahmahsaniong? E mahmahsaniong irair suwed ehu me pein ih sapwellimanki? Nin duwen me Paipel kasalehda, Sises “ketin iang ale songosong ni soahng koaros duwehte kitail,  ahpw ihte, e sohte ketin wiahda dihp.” (Ipru 4:15) Paipel pil mahsanih: “Sohte sapwung ehu mie rehn Krais; sohte mwahn mahsen widing de likamw ehu me aramas rongasang nin silangi.” (1 Piter 2:22) Sises ketin unsek oh kolokolte sapwellime lelepek. E sohte ketin mweidohng irair suwed ehu en kekeirda reh. E sansal me Sises sohte ketin mahmahsaniong irair suwed ehu me pein ih sapwellimanki. E ketin mahmahsaniong emen me uhdahn mie.

Koasoakoasoipene wet kasalehda pil ekei mehn kadehde me Sehdan uhdahn mie.

• Taman me Tepilo kasongehki Sises manaman en kaunda sampah pwon ma Sises ketin poaridi oh kaudokiong ih. (Madiu 4:8, 9) Ma Sehdan sohte uhdahn mie, kasongosong wet sohte pahn mie katepe. Patehng met, Sises sohte ketin peidengki ma Sehdan ahneki soangen manamano.

• Mwurin Sises ketin soikala kasongosong pwukat, Tepilo “ahpw kamoadolonla ekis ahnsou.” (Luk 4:13) Ia duwe, Sehdan wiahte irair suwed ehu, de ih imwintihti men me kin ngihtehte oh sohte men uhdi?

• Tehk me “tohnleng kei ahpw pwarodo oh sewese” Sises. (Madiu 4:11) Ia duwe, tohnleng pwukat me kangoange oh sewese Sises uhdahn mie? Ei, uhdahn. Eri, ia kahrepen kitail en medewe me Sehdan wiahte irair suwed ehu ahpw kaidehn ngehn emen me uhdahn mie?

Pil ehu ahnsou iei me pidada ohl lelepeko Sohp. Paipel kasalehda me koasoakoasoipene me wiawi nanpwungen Tepilo oh Koht wiawi pak riau. Nan koasoakoasoipene pwukat, Koht ketin kapinga Sohp pwehki eh lelepek. Sehdan nda me Sohp kin papahte Koht pwehki eh ineng en roporop oh dene Koht kin ketin kapaiahte Sohp pwe Sohp en lelepek ong ih. Ni Tepilo eh nda met, e kin kose me e ese Sohp laudsang en Koht eh ketin mwahngih duwen Sohp. Siohwa ketin mweidohng Sehdan en kihsang ahn Sohp kepwe koaros, nah seri ko, oh pil eh roson en paliwar. * Kedekedeo, e sansalda me dahme Siohwa ketin mahsanihki Sohp kin pwung, oh Sehdan me likamw. Koht ketin kapaiada Sohp pwehki eh lelepek.​—Sohp 1:6-12; 2:1-7.

Nan koasoakoasoipene ko me wiawi nanpwungen Koht oh Sehdan, Siohwa sohte ketin mahmahsanihong irair suwed ehu me pein ih sapwellimanki. Paipel mahsanih: “KAUN-O iei silepamwail me manaman, sapwellime wiewia kan me unsek oh pwung.” (Deuderonomi 32:4) E pil mahsanih: “Sarawi, sarawi, sarawi, iei komwi at Kaun, Koht, Wasa Lapalahpie.” (Kaudiahl 4:8) Sarawi kin wehwehki mwakelekel oh tohrohr sang dihp. Siohwa ketin unsek oh sohte mehkot sapwung mi reh. Uhdahn e sohte kak sapwellimanki irair suwed ehu.

Ahpw miehte ekei me ele pahn akupwungki me Sohp sohte uhdahn mie oh koasoakoasoipene pwukat wiahte soai kei. Ahpw ia duwe, e pwung? Ekei iren Paipel kan kasalehda me Sohp uhdahn mie. Karasepe, nan Seims 5:7-11, kitail kilang me Sohp wia mehn kahlemeng mwahu pwehn kamwakid Kristian kan ren dadaur pahn ahnsou apwal akan. E pil kin katamankihong kitail me Siohwa kin ketin katingih irail kan me kin kasalehda soangen lelepekohte. Ma Sohp sohte uhdahn mie oh ma kasongosong kan sang Sehdan sohte wiawi, ahn Sohp mehn kahlemengo sohte kak kamwakid aramas akan. Pil ehu, Esekiel 14:14, 20 kasalehda me Sohp iangete Noha oh Daniel wia ohl pwung kei. Duwehte Noha oh Daniel, Sohp uhdahn mie oh e ahneki pwoson laud. Ma Sohp uhdahn mie, eri me uhwongadao oh kahrehiong ih lokolok laud pil pahn uhdahn mie.

E sansal me Paipel kin kasalehda Sehdan nin duwen ngehn emen me uhdahn mie. Ahpw ele ke pahn medewe, ‘Nan sampah ahnsou wet, Sehdan kin keper ong ie oh pil ei peneinei?’

Medewehla ma pwihn en aramas mwersuwed ehu wiahkintehieu kohdo nan omw wasao. Ke pahn kak kilang me onepek mwahu oh soahng mwahu kan en omw wasao pahn tikitikla. Nna medewehla met: Sehdan oh nah ngehn saut ko​—me uhwongada Koht duwehte Sehdan—wiahkinteieu mihla sampah. Ia pahn imwilahn met? Medewehla soahng kan me ke kin kilang nan nuhs en omw wasao oh pil nan sampah pwon:

• Ke kin kilang lalaudlahn tiahk lemei kan me kin wiawi mendahki mie irail kan nan sampah pwon me kin nannanti en kauhdi?

•   Ke kin kilang mehn kamweit kan me pidada wunahni ar kin tohtohla, mendahki pahpa nohno kan uhdahn sapwungki mehn kamweit pwukat?

• Ke kin kilang ekei ar kaukauwehla wasahn kousoan kan, nan pihl oh nansed mendahki meteikan kin nannanti pere wasa pwukat?

• Ia duwe, e mwomwen me mie mehkot uhdahn sapwung rehn aramas, de mie mehkot me kin kahkahrelahng aramas akan nan apwal laud?

Tehk ihs me Paipel mahsanih me kin kahrehda kahpwal kan ahnsou pwukat: “Drakon kalaimwuno eri pisikensang nanleng. Eri, iei ih serpent en mahso, me adaneki Tepil de Sehdan, me kin pitipitih sampah pwon, oh me pisikendiongehr sampah iangahki ienge tohnleng kan koaros. . . . Meid suwediong sampah oh madau! Pwe Tepilo leledohr rehmwa, oh e inenen lingeringer kowahlap pwehki eh ese me eh ahnsou mwotomwotalahr.” (Kaudiahl 12:9, 12) Mwurin arail kilang mehn kadehde kan, aramas tohto kamehlele me Sehdan iei ngehn keper men me kin wie kamwakamwakid sampah wet.

Ele ke kin medemedewe ia duwen omw kak diar perepomw. Met uhdahn kesempwal. Oaralap en mwuhr pahn kihda iren sawas kei.