“Sounkadehde ko sohte kin kadek ongete aramas, ahpw re pil kin kadek ong nei kidi ko. Ehu rahno, Elaine, me kesihnen limwahn deupen pwuhk kadahro, kihong kenen nei kidi riemeno kirahka. Mwurin mwo, ahnsou koaros me se kin kerenlahng deupen pwuhk kadahro, kidi ko kin tang oh waikielahng rehn Sounkadehde ko ‘wasahn ale kanara kirahka.’

“Sounpwong kei douwehr powe, kidi ko kin perenki kanara kirahka ko, oh I pil kin perenki koasoiong Sounkadehde ko. Ahpw I sohte men kin koasoiong irail ahnsou reirei. I dauliher sounpar 70, oh I sohte nohn ese dahme Sounkadehde kan kin kamehlele. Pwehki I uhdahn nsensuwedkihla dahme pelien lamalam tohto kin wia, I medewe me e pahn mwahu ien pein onopki Paipel.

“Erein ahnsou ko, I pil kin kilang Sounkadehde teikan nan ekei wasa en kahnimwo, oh irail kin kesihnen limwahn neirail deupen pwuhk kadahr kan. Irail pil kin ahnsou koaros kadek ong aramas akan. Irail kin ahnsou koaros doadoahngki Paipel pwehn sapengala ei peidek kan oh met kalaudehla ei likih irail.

“Ehu rahno, Elaine idek rehi, ‘Ke kamehlele me mahn akan iei kisakis ehu sang rehn Koht?’ I sapengki, ‘Ei uhdahn!’ Elaine eri wadek ong ie Aiseia 11:6-9. Sang ahnsowo, I men sukuhlki Paipel, ahpw I saikinte men ale neirail pwuhk kan.

“Sang ahnsowo kohla, I kin perenki ni ngehi, Elaine, oh eh pwoudo Brent at kin koasoiapene ni mwotomwot ekei oaralap kan me I uhdahn perenki rong. Ira kangoange ie en wadek sang pwuhken Madiu lel pwuhken Wiewia pwe ien wehwehkihla ia wehwehn en wia Kristian mehlel men. Eri ih met me I wia. Sohte pwand mwurin mwo, I pwungki me Brent oh Elaine en onop Paipel rehi. Ahnsowo iei nan werengen pahr 2016.

“I kin kasikasik ei onop en Paipel kan oh pil towehda mihting kan nan Wasahn Kaudok wihk koaros. I uhdahn perenki ei sukusukuhlki dahme Paipel uhdahn mahsanih. Sounpar ehu mwuri, I papidaisla. Met I sounpar 79, oh I uhdahn kalahnganki ei diarada kaudok mehlel. Siohwa uhdahn ketin kapaiehda sang ni eh ketin mweidohng ie en wiahla kisehn sapwellime peneinei nan sampah pwon.”