Koht sohte kin ketin lipilipilki aramas oh ketin kupwurki kapaiahda aramas koaros.

Koht ketin inoukihong Eipraam me “Wehi koaros en sampah pahn peki rehi I en kapaiairailda duwehte ei kapaiaiukadahr.”​—Senesis 12:3.

Dahme Kitail Sukuhlki? Koht uhdahn ketin poakohng kitail oh ketin kupwurki kapaiahda peneinei koaros—ohl akan, lih akan, oh seri kan—me kin peikiong ih.

Koht me mahk kalahngan oh kin ketin kapaia irail kan me kin nantihong en esehla ih.

Koht me Keieu Manaman ketikihong soukohp Moses kehl en wiahda manaman kapwuriamwei kan. Ahpw Moses kapakapki: “Komwi en ketin kasalehiong ie kupwuromwien, pwe I en dadaurete ei kin papah komwi oh kin kaparanda kupwuromwi.” (Eksodus 33:13) Koht ketin kupwurperenki en Moses pekipeko oh ketin kapaiahkihda en ahpwte loalokongkihla oh wehwehkihla Sapwellime ahl akan oh irair kan. Karasepe, Moses esehla me Sounkapikadao iei “Koht emen me diren kalahngan oh kadek.”​—Eksodus 34:6, 7.

Dahme kitail sukuhlki? Koht ketin kupwurki kapaiahda kitail koaros​—ohl, lih oh seri kan—​ma kitail kin nantihong en esehla mwahu ih. E ketin kasalehiong kitail nan Paipel ia duwen atail pahn kaudokiong ih, me e ketin kupwurkin kitail oh ketin kupwurki kapaikitailda.

Kitail kak ahneki sapwellimen Koht kapai poatopoat kan ma kitail sukuhlki duwen Sises oh dahme e ketin wiahda oh padahngki.

Kitail kak sukuhlki soahng tohto sang nan Paipel duwen sapwellimen Sises mour oh padahk kan. Koht ketikihong Sises kehl pwehn ketin wiahda manaman kapwuriamwei tohto, me duwehte kamwahwihala me maskun, me salengepon, oh me kin alu suwed. E pil ketin komourada me melahr akan. Eri Sises ketin kasalehda kapai kan me Koht pahn ketikihong aramas koaros ni ahnsou kohkohdo. E ketin kawehwehda ia duwen emenemen kitail kak paiekihda kapai pwukat ni eh mahsanih: “Met wehwehki mour soutuk, arail pahn eseikomwihla, me komwihte me Koht mehlel, oh Sises Krais me komw ketin poaronehdo.”​—Sohn 17:3.

Sises ketin kasalehda pepehm en poakehla, nsenoh laud oh kadek. Ohl oh lih akan, me pwulopwul oh mah kin patohla reh ni ar mwekidki sapwellime luhk limpoako: “Ale ei mehn wisik oh padahngki sang ie, pwe I me opampap oh mohngiong karakarahk, kumwail ahpw pahn diar nsenamwahu.” (Madiu 11:29) Sises kin ketin kadekohng oh wauneki lih akan, e sohte duwehte irail kan me kin wiakauwe irail.

Dahme kitail sukuhlki? Sises ketin kasalehda limpoak laud ong aramas, oh ketikihda mehn kahlemeng mwahu ehu duwen atail wiewia ong emenemen.

Paipel kin padahngki me “rehtail Koht tehmen mie” oh me Sises Krais iei sapwellimen Koht meninkeder aktikitik men. (1 Korint 8:6) Sises mahsanih ni sansal me Koht ketin lapalap sang ih oh me Koht ketin poaronehdo ih nin sampah.​—Sohn 11:41, 42; 14:28. *