1.‏ اِک مثال دے کے دَسو کہ سانوں یہوواہ دی رہنمائی تے کیوں چلنا چاہی دا اے؟‏

 فرض کرو کہ تُسی اِک جنگل چ گواچ گئے او تے تواڈے آلے دَوالے خطرہ ای خطرہ اے۔ اوتھے جنگلی جانور، زہریلے کیڑے مکوڑے تے ایہدے نال نال کھڈے وی نیں جنہاں چ تُسی ڈِگ سکدے او۔ پر ذرا سوچو کہ جے تواڈے نال کوئی ایہو جیہا بندہ ہوئے جنہوں ایہناں خطریاں بارے پتہ ہوئے تے اوہ توانوں ایہناں خطریاں توں بچا سکے تے توانوں کِنّی تسلی ملے گی۔ ایہہ دُنیا وی اِک جنگل وانگوں اے۔ایہہ ایہو جہے خطریاں نال بھری ہوئی اے جیہڑے یہوواہ نال ساڈی دوستی نُوں برباد کر سکدے نیں۔ پر ساڈے کول سب توں ودھیا رہنما اے یعنی یہوواہ۔ اوہ سانوں خطریاں توں بچاندا اے تے سانوں ساڈی منزل یعنی نوِیں دُنیا تک لے جاندا اے جتھے اَسی ہمیشاں تک زندہ رہواں گے۔‏

2.‏ یہوواہ ساڈی رہنمائی کیویں کردا اے؟‏

² یہوواہ اپنے کلام بائبل دے ذریعے ساڈی رہنمائی کردا اے۔ پر اوہ ساڈی رہنمائی کرن لئی کجھ انساناں نُوں استمال کردا اے۔ مثال لئی، اوہ وفادار تے سمجھ‌دار غلام دے ذریعے ساڈے لئی ایہو جہیاں کتاباں، رسالے تے ویڈیوز تیار کراندا اے جنہاں توں اوہدے نال ساڈا رشتہ مضبوط ہوندا اے تے اَسی چنگے فیصلے کر پانے آں۔ (‏متی 24:‏45‏)‏ یہوواہ کجھ ہور قابل بھراواں دے ذریعے وی ساڈی رہنمائی کردا اے۔ مثال لئی، حلقے دے نگہبان تے کلیسیا دے بزرگ ساڈا حوصلہ ودھاندے نیں تے سانوں کجھ ایہو جہیاں ہدیتاں دیندے نیں جنہاں دے ذریعے اَسی مشکلاں دا سامنا کر پانے آں۔ اَسی یہوواہ دے بڑے شکرگزار آں کہ اوہ آخری دِناں چ اینے چنگے طریقے نال ساڈی رہنمائی کر رہیا اے۔ ایس رہنمائی دی وجہ توں یہوواہ نال ساڈی دوستی قائم رہندی اے تے اَسی زندگی دی راہ تے چلدے رہنے آں۔‏

3.‏ ایس مضمون چ اَسی کیس بارے گل کراں گے؟‏

³ پر کدی کدار ساڈے لئی یہوواہ دی رہنمائی تے چلنا مشکل ہو سکدا اے، خاص کر اوہدوں جدوں سانوں عیب‌دار انساناں وَلّوں ہدیتاں مِلدیاں نیں۔ پر کیوں؟ کیونکہ ہو سکدا اے کہ اوہ سانوں جیہڑیاں ہدیتاں دین اوہ سانوں پسند نہ آن۔ یاں شاید سانوں لگے کہ ایہہ ہدیت اینی فائدہ‌مند نئیں اے تے اَسی  سوچن لگ پئیے کہ ایہہ یہوواہ وَلّوں نئیں اے۔ ایہو جہے موقعیاں تے سانوں خاص طور تے ایس گل تے اپنے بھروسے نُوں ودھانا پووے گا کہ یہوواہ اپنے بندیاں دی رہنمائی کر رہیا اے تے اوہدی رہنمائی تے چلن نال سانوں بوہت فائدہ ہو سکدا اے۔ اپنے ایس بھروسے نُوں ودھان لئی اَسی ایس مضمون چ ایہناں تِن گلاں تے غور کراں گے:‏ (‏1)‏یہوواہ نے پرانے زمانے چ اپنے بندیاں دی رہنمائی کیویں کیتی، (‏2)‏اوہ اَج ساڈی رہنمائی کیویں کر رہیا اے تے (‏3)‏اوہدی رہنمائی تے چلن نال سانوں کیویں فائدہ ہوندا اے۔‏

یہوواہ نے اِسرائیلیاں دی رہنمائی کیویں کیتی؟‏

4، 5.‏ یہوواہ نے ایہہ کیویں ثابت کیتا کہ اوہ موسیٰ دے ذریعے بنی‌اِسرائیل دی رہنمائی کر رہیا سی؟ (‏پہلے صفحے دی تصویر نُوں ویکھو۔)‏

⁴ یہوواہ نے اِسرائیلیاں نُوں مصر چوں کڈھن لئی موسیٰ نُوں چُنیا تے یہوواہ نے اوہناں نُوں ثبوت دِتے کہ اوہ موسیٰ دے ذریعے اوہناں دی رہنمائی کر رہیا اے۔ مثال لئی، یہوواہ نے اوہناں نُوں دن چ رستہ وکھان لئی بدّل دے ستون تے رات چ رستہ وکھان لئی اَگ دے ستون دا بندوبست کیتا۔ (‏خروج 13:‏21‏)‏ موسیٰ ایہناں ستوناں دے پچھے پچھے ٹُریا تے اوہ تے بنی‌اِسرائیل بحیرۂ احمر دے کول پونچ گئے۔ جدوں لوکاں نُوں لگن لگ پیا کہ اوہ پھس گئے نیں تے اوہ بوہت ڈر گئے کیونکہ اَگے سمندر سی تے پچھے مصریاں دی فوج۔ اوہ ایہہ سوچن لگ پئے کہ موسیٰ نے سانوں ایتھے لیا کے غلطی کیتی اے۔ پر ایہہ کوئی غلطی نئیں سی کیونکہ یہوواہ سوچ سمجھ کے اوہناں نُوں موسیٰ دے ذریعے ایتھے لیایا سی۔ (‏خروج 14:‏2‏)‏ ایہدے بعد خدا نے بڑے زبردست طریقے نال اپنی قوم نُوں مصریاں توں نجات دَوائی۔—‏خروج 14:‏26-‏28‏۔‏

⁵ ایہدے بعد اگلے 40 سالاں تک موسیٰ بدّل دے اوس ستون تے بھروسا کردا رہیا کہ اوہ ویرانے چ خدا دے لوکاں دی رہنمائی کرے۔‏ a کجھ وقت لئی یہوواہ نے موسیٰ دے خیمے اُتے بدّل دا ستون ٹھہرا دِتا تے اِسرائیلی اوہنوں ویکھ سکدے سن۔ (‏خروج 33:‏7،‏ 9، 10‏)‏ یہوواہ ایس ستون دے ذریعے موسیٰ نال گل کردا سی تے موسیٰ اوہدیاں ہدیتاں پوری قوم نُوں دَسدا سی۔ (‏زبور 99:‏7‏)‏ اِسرائیلی ایہہ صاف صاف ویکھ سکدے سن کہ یہوواہ موسیٰ دے ذریعے اوہناں دی رہنمائی کر رہیا اے۔‏

6.‏ اِسرائیلیاں نے یہوواہ دی رہنمائی لئی کیہو جیہا رویہ ظاہر کیتا؟ (‏گنتی 14:‏2،‏ 10‏،  11)‏

⁶ افسوس دی گل اے کہ اِسرائیلیاں وچوں زیادہ‌تر نے ایس گل دے ثبوتاں نُوں رَد کر دِتا کہ یہوواہ موسیٰ دے ذریعے اوہناں دی رہنمائی کر رہیا اے۔ ‏(‏گنتی 14:‏2،‏ 10، 11 نُوں پڑھو۔)‏ اوہناں نے وار وار ایس گل نُوں منن توں اِنکار کیتا کہ موسیٰ دا اِک بڑا اہم کردار اے۔ ایس لئی اِسرائیلیاں دی اِک پوری نسل اوس ملک چ نئیں جا سکی جنہوں دین دا وعدہ یہوواہ نے اوہناں نال کیتا سی۔—‏گنتی 14:‏30‏۔‏

7.‏ کجھ ایہو جہے لوکاں دِیاں مثالاں دَوو جیہڑے یہوواہ دی رہنمائی تے چلے۔ (‏گنتی 14:‏24‏)‏ (‏تصویر نُوں وی ویکھو۔)‏

⁷ پر اِسرائیلیاں وچوں کجھ نے یہوواہ دی رہنمائی نُوں قبول کیتا۔ مثال لئی، یہوواہ نے کہیا:‏ کالب نے میری پوری پیروی کیتی اے۔ ‏(‏گنتی 14:‏24 نُوں پڑھو۔)‏ یہوواہ نے کالب نُوں ایہدا اَجر دِتا نالے اوہنوں ایہہ موقع دِتا کہ اوہ ملک کنعان چ اوہ جگہ آپ چُنے جتھے اوہ رہنا چاہندا اے۔ (‏یشوع 14:‏12-‏14‏)‏ اِسرائیلیاں دی اگلی نسل نے وی یہوواہ دی رہنمائی تے چلن چ چنگی مثال قائم کیتی۔ موسیٰ توں بعد جدوں یشوع نے اِسرائیلیاں دی پیشوائی کرنی شروع کیتی تے اِسرائیلی پوری زندگی اوہدا احترام کردے رہے۔ (‏یشوع 4:‏14‏)‏ ایس وجہ توں یہوواہ نے اوہناں نُوں برکت دِتی تے اوس ملک چ وی اوہناں نُوں لے کے گیا جنہوں دین دا اوہنے وعدہ کیتا سی۔—‏یشوع 21:‏43، 44‏۔‏

8.‏ دَسو کہ یہوواہ نے بادشاہواں دے دَور چ اپنے بندیاں دی رہنمائی کیویں کیتی۔ (‏تصویر نُوں وی ویکھو۔)‏

⁸ کجھ سالاں بعد یہوواہ نے اپنے لوکاں دی رہنمائی کرن لئی قاضیاں نُوں مقرر کیتا۔ فیر ایس توں بعد بادشاہواں دے زمانے چ یہوواہ نے  نبیاں دے ذریعے اپنے لوکاں دی رہنمائی کیتی۔ جیہڑے بادشاہ یہوواہ دے وفادار سن، اوہناں نے یہوواہ دِیاں اوہناں ہدیتاں نُوں منیا جیہڑیاں اوہنے نبیاں دے ذریعے دِتیاں سن۔ مثال لئی، بادشاہ داؤد نے بڑی خاکساری نال ناتن نبی وَلّوں مِلن والی اِصلاح نُوں قبول کیتا۔ (‏2-‏سموئیل 12:‏7،‏ 13؛‏ 1-‏تواریخ 17:‏3، 4‏)‏ بادشاہ یہوسفط نے یحزی‌ایل نبی وَلّوں مِلن والیاں ہدیتاں تے بھروسا رکھیا تے لوکاں نُوں کہیا کہ اوہ یہوواہ دے نبیاں تے یقین کرن۔ (‏2-‏تواریخ 20:‏14، 15،‏ 20‏)‏ جدوں بادشاہ حزقیاہ بڑا پریشان سی تے اوہنے یسعیاہ نبی کولوں مدد منگی۔ (‏یسعیاہ 37:‏1-‏6‏)‏ جدوں وی کوئی بادشاہ یہوواہ دی رہنمائی نُوں قبول کردا سی، اوہنوں برکت مِلدی سی تے اوہدی قوم محفوظ رہندی سی۔ (‏2-‏تواریخ 20:‏29، 30؛‏ 32:‏22‏)‏ لوکاں نُوں ایہہ گل سمجھنی چاہی دی سی کہ یہوواہ اپنے نبیاں دے ذریعے اوہناں دی رہنمائی کر رہیا اے۔ پر بوہت سارے بادشاہواں تے لوکاں نے وی یہوواہ دے نبیاں دی گل نئیں سُنی۔—‏یرمیاہ 35:‏12-‏15‏۔‏

یہوواہ نے پہلی صدی دے مسیحیاں دی رہنمائی کیویں کیتی؟‏

9.‏ یہوواہ نے پہلی صدی دے مسیحیاں دی رہنمائی کرن لئی کنہاں نُوں استمال کیتا؟ (‏تصویر نُوں وی ویکھو۔)‏

⁹ یہوواہ نے پہلی صدی چ مسیحی کلیسیا نُوں قائم کیتا۔ اوہنے پہلی صدی دے مسیحیاں دی رہنمائی کیویں کیتی؟ اوہنے یسوع نُوں کلیسیا دا سربراہ مقرر کیتا۔ (‏اِفِسیوں 5:‏23)‏ پر یسوع آپ آ کے ہر شاگرد نُوں نئیں دَسدا سی کہ اوہنوں کیہہ کرنا چاہی دا اے۔ یسوع مسیح یروشلم دے رسولاں تے بزرگاں دے ذریعے اوہناں دی پیشوائی کردا سی۔ (‏اعمال 15:‏1، 2‏)‏ ایہدے علاوہ کلیسیاواں دی رہنمائی کرن لئی بزرگاں نُوں مقرر کیتا گیا۔—‏1-‏تھسلُنیکیوں 5:‏12؛‏ طِطُس 1:‏5‏۔‏

10.‏ (‏الف)‏پہلی صدی دے مسیحیاں نے اوس رہنمائی لئی کیہو جیہا رویہ ظاہر کیتا جیہڑی اوہناں نُوں مل رہی سی؟ (‏اعمال 15:‏30، 31‏)‏ (‏ب)‏پرانے زمانے چ کجھ لوکاں نے اوہناں لوکاں دی گل کیوں نئیں سُنی جنہاں دے ذریعے یہوواہ اوہناں دی رہنمائی کر رہیا سی؟ (‏بکس ‏”‏ کجھ لوکاں نے ثبوتاں نُوں نظرانداز کیوں کر دِتا اے؟‏‏“‏ نُوں ویکھو۔)‏

¹⁰ پہلی صدی دے مسیحیاں نے اوس رہنمائی نُوں کیہو جیہا خیال کیتا جیہڑی اوہناں نُوں مل رہی سی؟ زیادہ‌تر نے دلوں ایہنوں قبول کیتا، ایتھوں تک کہ اوہ حوصلہ ودھان والیاں گلاں توں بوہت خوش ہوئے۔ ‏(‏اعمال 15:‏30، 31 نُوں پڑھو۔)‏ پر یہوواہ اَج ساڈے زمانے چ اپنے بندیاں دی رہنمائی کیویں کر رہیا اے؟‏

یہوواہ اَج ساڈی رہنمائی کیویں کر رہیا اے؟‏

11.‏ اِک مثال دے کے دَسو کہ یہوواہ اوہناں بھراواں دی رہنمائی کر رہیا اے جیہڑے ساڈی پیشوائی کر رہے نیں۔‏

¹¹ یہوواہ اَج وی اپنے کلام تے اپنے پُتر یسوع مسیح دے ذریعے  جیہڑا کلیسیا دا سربراہ اے، اپنے لوکاں دی رہنمائی کر رہیا اے۔ کیہہ اَسی ایس گل دے ثبوت ویکھ سکنے‌آں کہ اَج یہوواہ کجھ لوکاں دے ذریعے ساڈی رہنمائی کر رہیا اے؟ جی بالکل۔ مثال لئی، ذرا ایس بارے سوچو کہ 1870 دے بعد کیہہ ہویا۔ بھرا چارلس ٹیز رسل ایہہ گل سمجھ گیا سی کہ 1914 دا سال خدا دی بادشاہی لئی بڑا خاص ثابت ہوئے گا۔ (‏دانی‌ایل 4:‏25، 26‏)‏ ایس گل نُوں سمجھن لئی اوہنے بائبل چوں تحقیق کیتی تے ایس گل تے بھروسا رکھیا کہ اوہ ایہدے چ لکھیاں ہوئیاں پیشین‌گوئیاں نُوں پورا ہوندیاں ویکھے گا۔ کیہہ یہوواہ بائبل چوں تحقیق کرن چ اوہدی رہنمائی کر رہیا سی؟ جی ہاں، اوہ بالکل اِنج کر رہیا سی۔ 1914 چ دُنیا چ جو کجھ ہویا، اوہدے توں ایہہ گل ثابت ہو گئی کہ خدا دی بادشاہی نے حکمرانی شروع کر دِتی اے۔ مثال لئی، پہلی عالمی جنگ شروع ہو گئی، بیماریاں پھیلن لگ پئیاں، زلزلے آنے شروع ہو گئے تے کھان پین دِیاں شیواں دی کمی ہون لگ پئی۔ (‏لُوقا 21:‏10، 11‏)‏ ایہدے چ کوئی شک نئیں کہ یہوواہ ایہناں خاکسار لوکاں دے ذریعے اپنے بندیاں دی رہنمائی کر رہیا سی۔‏

12، 13.‏ دُوجی عالمی جنگ دے دوران مُنادی تے تلیم دین دے کم نُوں ودھان لئی کیہڑے بندوبست کیتے گئے؟‏

¹² ذرا ایس گل تے غور کرو کہ دُوجی عالمی جنگ دے دوران کیہہ ہویا۔ ساڈے ہیڈکوارٹر چ پیشوائی کرن والے بھراواں نے مُکاشفہ 17:‏8 نُوں پڑھن تے ایہدے تے تحقیق کرن توں بعد ایہہ گل سمجھ لئی کہ دُوجی عالمی جنگ دی وجہ توں ہرمجدون دی جنگ شروع نئیں ہوئے گی۔ اوہ جان‌دے سن کہ اَگے اِک ایہو جیہا امن دا دَور آن والا اے جدے چ یہوواہ دے گواہ زیادہ توں زیادہ لوکاں نُوں مُنادی کر سکن گے۔ ایس لئی یہوواہ دی تنظیم نے گلئیڈ سکول دا بندوبست کیتا، بھانویں کہ اوس ویلے ایہہ فیصلہ ایناں فائدہ‌مند نئیں لگ رہیا سی۔ پر اوہناں نے ایہہ فیصلہ ایس لئی کیتا تاکہ پوری دُنیا چ مُنادی کرن لئی تے تلیم دین لئی مشنریاں نُوں تربیت دِتی جا سکے۔ جنگ دے دوران وی مشنریاں نُوں فرق فرق تھانواں تے گھلیا گیا۔ ایہدے علاوہ وفادار غلام نے مسیحی خدمتی کورس b دا بندوبست کیتا تاکہ کلیسیا دے بھین بھراواں نُوں تربیت دِتی جاسکے تے اوہ چنگی طرحاں مُنادی کر سکن تے تلیم دے سکن۔ ایس طرحاں خدا دے بندیاں نے زیادہ توں زیادہ لوکاں نُوں مُنادی کرن لئی اپنے آپ نُوں تیار کیتا۔‏

¹³ اَسی ایہہ گل صاف طور تے ویکھ سکنے آں کہ یہوواہ مشکل ویلے چ اپنے لوکاں دی رہنمائی کردا اے۔ دُوجی عالمی جنگ دے بعد توں یہوواہ دے بندے بوہت سارے مُلکاں چ کسے حد تک آزادی نال مُنادی کر رہے نیں، ایتھوں تک کہ ایہہ کم پوری دُنیا چ ہو رہیا اے۔‏

14.‏ اَسی یہوواہ دی تنظیم تے بزرگاں وَلّوں مِلن والیاں ہدیتاں تے کیوں بھروسا کر سکنے آں؟ (‏مُکاشفہ 2:‏1‏)‏ (‏تصویر نُوں وی ویکھو۔)‏

 ¹⁴ اَج گورننگ باڈی دے ممبر مسیح وَلوں مِلن والی رہنمائی تے بھروسا رکھدے نیں۔ اوہ چاہندے نیں کہ اوہ بھین بھراواں نُوں جیہڑیاں ہدیتاں دین، اوہناں توں پتہ چلے کہ ایہہ ہدیتاں یہوواہ وَلّوں نیں۔ فیر اوہ حلقے دے نگہبان تے بزرگاں دے ذریعے ایہہ ہدیتاں بھین بھراواں تک پونچاندے نیں۔‏ c ایہہ روح نال مسح ہوئے بزرگ یسوع دے سجے ہتھ چ نیں۔ ‏(‏مُکاشفہ 2:‏1 نُوں پڑھو۔)‏ ظاہری جہی گل اے کہ ایہہ بزرگ عیب‌دار نیں ایس لئی اوہناں کولوں وی غلطیاں ہوندیاں نیں۔ کجھ موقعیاں تے موسیٰ تے یشوع کولوں وی غلطیاں ہوئیاں تے بعد چ رسولاں کولوں وی ہوئیاں۔ (‏گنتی 20:‏12؛‏ یشوع 9:‏14، 15؛‏ رومیوں 3:‏23‏)‏ پر یسوع مسیح بڑے دھیان نال وفادار غلام تے کلیسیا دے بزرگاں دی رہنمائی کردا اے تے اوہ دُنیا دے آخری زمانے تک اِنج کردا رہوے گا۔ (‏متی 28:‏20‏)‏ ایس لئی سانوں اوس رہنمائی تے پورا بھروسا رکھنا چاہی دا اے جیہڑی یسوع مسیح پیشوائی کرن والے بھراواں دے ذریعے سانوں دے رہیا اے۔‏

یہوواہ دی رہنمائی تے چلن نال سانوں فائدہ ہوندا اے

15، 16.‏ تُسی اوہناں لوکاں دِیاں مثالاں توں کیہہ سکھیا اے جیہڑے یہوواہ دی رہنمائی تے چلے؟‏

¹⁵ جدوں اَسی یہوواہ دی رہنمائی تے چلنے آں تے سانوں اَج وی بوہت ساریاں برکتاں مِلدیاں نیں۔ مثال لئی، بھرا اینڈی تے اوہدی بیوی رُوبین نے وفادار غلام دی رہنمائی تے عمل کردے ہوئے اپنی زندگی نُوں سادہ بنایا۔ (‏متی 6:‏22‏)‏ ایس وجہ توں اوہ ساڈی تنظیم دے تعمیر دے منصوبیاں چ کم کر سکے۔ بھین رُوبین نے کہیا:‏ ”‏کدی کدار سانوں کافی چھوٹے گھراں چ رہنا پیندا سی جتھے ساڈے کول کچن وی نئیں ہوندا سی۔ مینوں تصویراں کِھچن دا بڑا شوق اے پر اپنی زندگی نُوں سادہ بنان لئی مَیں اپنے سارے کیمرے ویچ دِتے۔ جدوں مَیں اِنج کیتا تے میریاں اَکھاں چ آنسو آ گئے پر ابراہام دی بیوی سارہ وانگوں مَیں عزم کیتا سی کہ مَیں پچھے مُڑ کے نئیں ویکھاں گی۔“‏ (‏عبرانیوں 11:‏15‏)‏ ایس جوڑے نُوں اپنی زندگی نُوں سادہ بنان توں کیہہ فائدہ ہویا؟ بھین رُوبین نے کہیا:‏ ”‏اَسی ایس گل توں بڑے خوش آں کہ اَسی یہوواہ نُوں اپنا سب کجھ دے رہے آں۔ جدوں اَسی تنظیم دے تعمیر دے منصوبیاں چ کم کرنے آں تے سانوں اندازہ ہوندا اے کہ نوِیں دُنیا چ زندگی کیہو جہی ہوئے گی۔“‏ اینڈی وی اِنج ای سوچدا اے تے اوہنے کہیا:‏ ”‏اَسی ایس گل توں بڑے خوش آں کہ اَسی یہوواہ دے کم لئی اپنا وقت تے طاقت لا رہے آں۔“‏

¹⁶ یہوواہ دی رہنمائی تے چلن نال سانوں ہور کیہہ فائدہ ہوندا اے؟ بھین مارسیا دی ایہہ خواہش سی کہ اوہ اپنے کالج دی پڑھائی نُوں ختم کرن  توں بعد پہل‌کار بنے جیویں کہ تنظیم ساڈا حوصلہ ودھاندی اے۔ (‏متی 6:‏33؛‏ رومیوں 12:‏11‏)‏ اوہ کہندی اے:‏ ”‏مینوں یونیورسٹی چ چار سال تک پڑھائی کرن لئی وظیفہ مِلیا۔ پر مَیں یہوواہ دی خدمت چ اپنا منصوبہ پورا کرنا چاہنی ساں۔ ایس لئی مَیں اِک ایہو جیہا ہنر سکھیا جدے ذریعے مَیں اینے پیسے کما سکاں کہ مَیں پہل‌کار بنن دے نال نال اپنیاں ضرورتاں نُوں وی پورا کر سکاں۔ میرا ایہہ فیصلہ میری زندگی دا سب توں چنگا فیصلہ سی۔ ہُن مَیں اِک پہل‌کار آں تے ہنر سکھن دی وجہ توں مَیں اپنی مرضی دے وقت تے کم کر سکنی آں۔ نالے مَیں بیت‌ایل چ کم کر سکنی آں تے یہوواہ دی خدمت چ ہور وی بوہت کجھ کر سکنی آں۔“‏

17.‏ یہوواہ دی رہنمائی تے چلن نال سانوں ہور کیہڑے فائدے ہوندے نیں؟ (‏یسعیاہ 48:‏17، 18‏)‏

¹⁷ کدی کدار سانوں تنظیم وَلّوں ایہو جہیاں ہدیتاں مِلدیاں نیں جنہاں دے ذریعے اَسی محفوظ رہ پانے آں۔ مثال لئی، سانوں دُنیا دِیاں آسائشاں نال پیار کرن تے ایہو جہے کماں توں آگاہ کیتا جاندا اے جنہاں دی وجہ توں اَسی یہوواہ دے اصول توڑن دے خطرے چ ہُنے آں۔ ایہناں معاملیاں چ وی یہوواہ دی رہنمائی تے چلن نال سانوں بڑا فائدہ ہوندا اے۔ ساڈا ضمیر صاف رہندا اے تے اَسی ہور وی کئی پریشانیاں توں بچ جانے آں۔ (‏1-‏تیمُتھیُس 6:‏9، 10‏)‏ اِنج اَسی پورے دل نال یہوواہ دی عبادت کر پانے آں جدی وجہ توں سانوں دلی سکون، اِطمینان تے خوشی مِلدی اے۔‏‏—‏یسعیاہ 48:‏17، 18 نُوں پڑھو۔‏

18.‏ تُسی یہوواہ دی رہنمائی تے چلن دا عزم کیوں کیتا اے؟‏

¹⁸ ایہدے چ کوئی شک نئیں کہ یہوواہ وڈی مصیبت دے دوران تے مسیح دی ہزار سالہ حکمرانی چ کجھ لوکاں دے ذریعے سانوں ہدیتاں دیندا رہوے گا۔ (‏زبور 45:‏16‏)‏ کیہہ اَسی اوس ویلے وی اوہناں ہدیتاں تے عمل کراں گے جیہڑیاں سانوں پسند نئیں ہون گیاں؟ جے اَج اَسی یہوواہ دِیاں ہدیتاں نُوں مننے آں تے فیر ساڈے لئی اوس ویلے وی اِنج کرنا اسان ہوئے گا۔ ایس لئی آؤ، یہوواہ وَلّوں مِلن والی رہنمائی تے چلدے رہیے تے اوہناں ہدیتاں تے بھروسا رکھئے جیہڑیاں سانوں اوہناں بھراواں وَلّوں مِلدیاں نیں جنہاں نُوں یہوواہ نے ساڈی دیکھ‌بھال کرن لئی مقرر کیتا اے۔ (‏یسعیاہ 32:‏1، 2؛‏ عبرانیوں 13:‏17‏)‏ اَسی اپنے رہنما یہوواہ تے پورا بھروسا کر سکنے آں کیونکہ اوہ سانوں ہر ایہو جہی چیز توں دُور رکھے گا جدی وجہ توں اوہدے نال ساڈی دوستی تباہ ہو سکدی اے تے سانوں ساڈی منزل یعنی نوِیں دُنیا چ لے جاوے گا۔‏