ہر سال بوہت سارے نوجوان جنہاں نے اپنے ماں پیو کولوں سچائی سکھی اے، یہوواہ دے گواہواں دے طور تے بپتسمہ لیندے نیں۔ کیہہ تُسی وی بپتسمہ لین بارے سوچ رہے او؟ جے ہاں تے فیر توانوں پہلاں ایہہ سمجھن دی لوڑ اے کہ اپنی زندگی یہوواہ دے ناں کرن تے بپتسمہ لین دا کیہہ مطلب اے۔‏

•  بپتسمہ لین دا کیہہ مطلب اے؟‏

•  اپنی زندگی یہوواہ دے ناں کرن دا کیہہ مطلب اے؟‏

•  بپتسمہ لینا ضروری کیوں اے؟‏

•  دُوجے نوجواناں دی رائے

•  غلط نظریے تے سچائی

 بائبل دے مطابق بپتسمہ لین دا مطلب صرف اپنے تے پانی چھڑکنا نئیں اے سگوں پانی دے اندر پوری طرحاں ڈُبکی لینا اے۔ تے ایہہ بڑے ای خاص کم وَل اشارہ کردا اے۔‏

•   پانی چ ڈُبکی لے کے تُسی ساریاں دے سامنے ایہہ ظاہر کردے او کہ ہُن تُسی اپنی زندگی اپنی مرضی مطابق نئیں جیو گے۔‏

•   جدوں تُسی پانی توں باہر آندے او تے ایہدے توں ظاہر ہوندا اے کہ ہُن تواڈی نوِیں زندگی شروع ہو رہی اے جیہڑی تُسی خدا دی مرضی مطابق گزارو گے۔

 بپتسمہ لے کے تُسی ساریاں دے سامنے ایہہ تسلیم کر رہے ہوندے او کہ صرف یہوواہ نُوں ای صحی تے غلط بارے معیار بنان دا حق اے۔ نالے تُسی ایہہ وعدہ وی کر رہے ہوندے او کہ تُسی خوشی نال اوہدی مرضی تے چلو گے۔‏

 ایس بارے سوچو:‏ سانوں ساریاں دے سامنے ایہہ وعدہ کرن دی لوڑ کیوں اے کہ اَسی اپنی ساری زندگی یہوواہ دے فرمانبردار رہواں گے؟ 1-‏یوحنا 4:‏19 تے مُکاشفہ 4:‏11 نُوں ویکھو۔‏

 بپتسمہ لین توں پہلاں توانوں اپنی زندگی یہوواہ دے ناں کرن دی لوڑ اے۔ پر کیویں؟

 اِنج کرن لئی تُسی اپنی ذاتی دُعا چ یہوواہ نال وعدہ کر سکدے او کہ تُسی ساری زندگی اوہدی خدمت کرو گے تے صرف اوہدی مرضی تے چلو گے، فیر بھانویں جیہڑی وی مشکل آئے یاں دُوجے جو وی کرن۔‏

 فیر جدوں تُسی بپتسمہ لوو گے تے ساریاں دے سامنے ایہہ ظاہر ہو جائے گا کہ تُسی اپنی زندگی یہوواہ دے ناں کیتی اے۔ ایہدے توں دُوجیاں نُوں پتہ لگے گا کہ تُسی اپنے لئی جینا چھڈ دِتا اے تے ہُن توں تُسی یہوواہ لئی جیو گے۔—‏متی 16:‏24‏۔‏

 ایس بارے سوچو:‏ بپتسمہ لے کے تواڈی زندگی بہتر کیوں ہو جائے گی؟ یسعیاہ 48:‏17، 18 تے عبرانیوں 11:‏6 نُوں ویکھو۔‏

 یسوع نے دَسیا کہ جے کوئی اوہدا شاگرد بننا چاہندا اے تے اوہنوں بپتسمہ لین دی لوڑ اے۔ (‏متی 28:‏19، 20‏)‏ ایس لئی اَج وی بپتسمہ لینا ضروری اے۔ اصل چ بائبل چ دَسیا گیا اے کہ بپتسمہ لین توں بغیر کوئی وی بندہ نجات حاصل نئیں کر سکدا۔—‏1-‏پطرس 3:‏21‏۔‏

 پر توانوں بپتسمہ ایس لئی لینا چاہی دا اے کہ تُسی یہوواہ نُوں پیار کردے او تے اوہدے نال اپنی دوستی نُوں مضبوط کرنا چاہندے او۔ تواڈی سوچ وی بالکل زبور لکھن والے ورگی ہونی چاہی دی اے جنہے لکھیا:‏ یہوواہ نے مینوں جِنّیاں نعمتاں دِتیاں نیں، اوہناں دے بدلے مَیں اوہنوں کیہہ دواں؟ مَیں اوہنوں پکاراں گا۔ مَیں یہوواہ دے سامنے جیہڑیاں منتاں منیاں نیں، اوہناں نُوں پورا کراں گا۔—‏زبور 116:‏12-‏14‏۔‏

 ایس بارے سوچو:‏ یہوواہ نے تواڈے لئی کیہہ کیتا اے تے تُسی ایہدے بدلے کیہہ کر سکدے او؟ اِستثنا 10:‏12، 13 تے رومیوں 12:‏1 نُوں ویکھو۔‏