Een Wieedbuak sajcht, daut Metjefeel waut es, “daut eena vestonen kaun, woo een aundra sikj feelt ooda waut dee beläft haft, doaderch, daut eena sikj en dänjanjen siene Städ stalt.” Dr. Rick Hanson, dee äwa de Menschen äa Vehoolen studieet, sajcht, “daut ons daut Metjefeel enjebuaren es.”

DENKJ MOL ÄWA NO: Wuarom es daut soo, daut Metjefeel mieeschtens bie ons Menschen to beoobachten es? De Schreft lieet, daut Gott ons soo muak, daut wie am likjnen (1. Mose 1:26). Daut bediet, daut wie daut nodoonen kjennen, woo hee es, un daut bie ons waut von siene goode Ieejenschoften to moakjen sent. Doawäajen kjenn wie sajen, daut wan wäm daut äwa eenen aundren jaumat un dän halpt, dan wiest dee krakjt daut Metjefeel, waut uk ons metfeelenda Schepfa Jehova Gott haft (Spricha 14:31, JHF).

Gott feelt met ons met un hee jleicht daut nuscht, wan wie lieden motten. Aus hee sach, woo daut Volkj Israel en Ägipten aus Sklowen schlajcht behaundelt wort, un 40 Joa en de Wiltnis sennen must, sajcht de Schreft: “Hee [rad] an en aul äare schwoare Tieden” (Jesaja 63:8-9). Gott sach nich mau bloos, waut fa schwoaret see derchmuaken, oba hee feeld met. Hee säd je: “Mie besorcht daut, daut see soo lieden” (2. Mose 3:7). Un hee sajcht uk: “Een Volkj, daut junt auntukst, puakst mie em Uag” (Sacharja 2:12). Aun dit kjenn wie seenen, daut hee daut späat, wan aundre ons waut aundoonen.

Wan wie uk jleewen, daut wie daut nich mol wieet sent, daut Gott met ons metfeelt, sajcht de Schreft oba: “Gott [es] jrata aus ons Hoat un weet, woo daut met aules steit” (1. Johanes 3:19-20). Gott kjant ons bäta aus wie selfst. Hee weet doa om, waut wie derchmoaken, waut wie denkjen un woo wie ons feelen. Hee feelt werkjlich met ons met.

 De Schreft sajcht ons

• “Dan woa jie aunroopen, un de HAR woat siene Auntwuat jäwen, jie woaren schrieen, un hee woat sajen: Ekj sie hia.” (JESAJA 58:9)

• “Ekj hab daut goot äwajedocht, sajcht de HAR, un waut ekj fa junt jeplont hab, es Fräd un Erfolch, un nich Schoden. Ekj well junt eene Tookunft un Hopninj jäwen. Dan woa jie mie aunbäden, un jie woaren komen un mie froagen, un ekj woa no junt horchen.” (JEREMIA 29:11-12)

• “Saumel miene Tronen en dien Kruckje. Hast du dee nich opp diene Räakjnunk?” (PSALM 56:9)

Kaun ons daut halpen met Schwierichkjeiten foadich to woaren, to weeten, daut Gott met ons metfeelt? See wie mol, waut Maria beläwd.

“Mie späad sikj soo, daut daut Läwen ojjerajcht wia, aus ekj beläwen must, woo mien 18-joascha Sän twee Joa aun Kjräft lieden must un dan storf. Ekj wia doll äwa Jehova, daut hee doa nuscht met deed un dän nich heeld.

Sas Joa lota kunn ekj mie to eene leeftolje un metfeelende Frindin enne Vesaumlunk utschedden. Ekj säd ar, daut ekj jleewd, daut Jehova mie nich leewd. See horcht mie stundenlank bloos too un dan räd see von eenen Varsch, waut mie sea to Hoaten jinkj. Daut wia 1. Johanes 3:19-20, wua daut sajcht: ‘Gott [es] jrata aus ons Hoat un weet, woo daut met aules steit.’ See muak mie dietlich, daut Jehova daut vesteit, waut wie derchmoaken.

Oba doch wia mie daut schwoa von mienen Oaja loostoloten. Dan läsd ekj Psalm 94:19, wua daut sajcht: ‘Aus ekj ennalich sea beduat wia, freid miene Seel sikj to dienen Troost.’ Mie späad sikj soo, dis Varsch wia fa mie jeschräwen! Daut wia een groota Troost fa mie to weeten, daut Jehova no mie horcht, daut ekj am aules sajen kunn, woo ekj mie feel, un daut hee daut vesteit.”

To weeten, daut Gott met ons metfeelt un ons vesteit, es een groota Troost! Oba wuarom jeft daut dan soo väl lieden? Es daut, wäajen Gott ons stroft? Woat Gott noch mol met aul daut Lieden een Enj moaken? Dise Froagen woaren en de näakjste Artikjels beauntwuat.