Gott haft ons jemoakt un es leeftolich om ons bekjemmat. Hee weet väl mea aus wie, un hee well uk nich, daut wie onen am läwen sellen (Jesaja 29:16). Soo aus Kjinja daut fält, daut äare Elren an aunleiden, soo fält ons daut, daut ons himlischa Voda ons aunleit (Jesaja 48:17-18). Daut deit hee derch de Gruntsauzen en de Schreft. Dee sent soo aus een Jeschenkj von am. Läs 2. Timotäus 3:16.

Wäa sikj aun Jehova siene Jesazen un Gruntsauzen helt, kaun nu aul daut baste Läwen haben, waut daut jeft, un woat noch mol fa eewich jesäajent woaren. Un wiels Gott ons jemoakt haft, sull wie reed sennen, ons von am leiden to loten. Läs Psalm 19:8, 12; Openboarunk 4:11.

Biblische Gruntsauzen sent Woarheiten, wua eena sikj fa veschiedne Loagen eene Lia rutnämen kaun. Jesazen sent jeweenlich bloos fa eene jewesse Loag jedocht (5. Mose 22:8). Daut eena eenen Gruntsauz rajcht brucken kaun, mott eena selfst nodenkjen (Spricha 2:10-12). De Schreft lieet biejlikj, daut daut Läwen een Jeschenkj von Gott es. Wan wie äwa disen Gruntsauz nodenkjen, woa wie tus, bie de Oabeit un opp Reisen emma väabedocht sennen. Läs Aposteljeschicht 17:28.

Jesus räd von twee besonda wichtje Gruntsauzen. De ieeschta haundelt sikj doavon, daut wie Gott kjanen lieren, am leewen un tru deenen sellen. Daut  es, wuatoo wie aum läwen sent. Aun disen Gruntsauz sell wie emma denkjen, ea wie irjentwaut entscheiden (Spricha 3:6). Soo kaun eena Gott sien Frint sennen, woare Freid finjen un noch mol fa emma läwen. Läs Matäus 22:36-38.

De tweeda Gruntsauz halpt ons, met aundre frädlich tooptoläwen (1. Korinta 13:4-7). Wan wie dän em Denkj hoolen, woa wie met aundre soo omgonen, aus Gott daut deit. Läs Matäus 7:12; 22:39-40.

Biblische Gruntsauzen halpen Famieljes, en Leew tooptoschaufen (Kolossa 3:12-14). Gott sien Wuat lieet uk, daut de Ehebunt fa daut gaunze Läwen es, un daut schizt de Famielje, daut dee nich uteneen brakjt. Läs 1. Mose 2:24.

Wan wie no Gott sien Wuat läwen, jeit ons daut ennalich un uk em tieteljen bäta. Biejlikj kaun daut leichta sennen, eene Oabeit to kjrieen, wan eena no biblische Gruntsauzen läft un flietich un opprechtich es (Spricha 10:4, 26; Hebräa 13:18). De Schreft lieet ons, met daut tofräd to sennen, waut wie toom läwen brucken, un daut daut wichtja es, Gott sien Frint to sennen, aus no irdische Sachen to sträwen. Läs Matäus 6:24-25, 33; 1. Timotäus 6:8-10.

No Gott sien Wuat to läwen es uk goot fa de Jesuntheit (Spricha 14:30; 22:24-25). Biejlikj sajcht Gott sien Jesaz, eena saul nich supen. Daut es een Schutz fa schlemme Krankheiten un Ojjlekjs (Spricha 23:20). Jehova jeft ons de Frieheit, stoakjet to drinkjen, oba daut saul met Mot (Psalm 104:15; 1. Korinta 6:10). Gott siene Gruntsauzen sent ons toom gooden, wiels dee ons lieren, doano to kjikjen, waut wie doonen un uk waut wie denkjen (Psalm 119:97-100). Woare Christen hoolen sikj oba nich bloos aun dise Gruntsauzen, wiels dee eenen Nutzen doavon haben. Dee wellen Jehova ieren. Läs Matäus 5:14-16.