Woo sach Jesus?
Waut de Schreft doatoo sajcht
Kjeena weet krakjt, woo Jesus sach, wäajen de Schreft daut nich sajcht. Daut wiest, daut et nich soo wichtich es, woo Jesus von buten leet. Oba wie kjennen eenjet von de Schreft lieren, woo am kunn jeloten haben.
Woo am sach: Jesus wia een Jud un doawäajen likjend hee secha siene Mame (Hebräa 7:14). Daut späat sikj soo, daut am nich väl aundasch leet aus de aundre Menschen. Eemol reisd hee von Galiläa no Jerusalem, onen daut de aundre Menschen daut oppfoll (Johanes 7:10-11). Un hee tieekjend uk nich ut mank siene Jinja. Wiels wan wie doaraun denkjen, aus de Häad Menschen Jesus wull faustnämen, must Judas Iskariot dee een Tieekjen jäwen toom dee wiesen, woont Jesus wia (Matäus 26:47-49).
Woo lank siene Hoa wieren: Siene Hoa kjennen nich sennen lank jewast, wiels de Schreft sajcht, daut et “fa eenen Maun kjeene Iea es, wan hee lange Hoa haft” (1. Korinta 11:14, PB).
Boat: Jesus haud eenen Boat, wiels hee kjeem daut judische Jesaz no, waut doa säd, daut de Mana äaren Boat nich sullen kort schnieden (3. Mose 19:27; Galata 4:4). Un en eene biblische Profezeiunk, wua daut om Jesus sien Lieden jinkj, wort uk jesajcht, daut hee wudd eenen Boat haben (Jesaja 50:6).
Kjarpa: Daut diet aula doano han, daut Jesus mott sennen forsch jewast, wiels en sienen Deenst jinkj hee väle Kilomeeta (Matäus 9:35). Hee reinicht dän judischen Tempel tweemol un schmeet de Jeltwakjsla äare Deschen om un juach uk de Tieren met eene Pitsch doarut (Lukas 19:45-46; Johanes 2:14-15). Een Buak sajcht: “Aules, waut wie en de Evangelien [von Jesus] läsen, diet doano han, daut hee kjarpalich stoakj un jesunt wia” (McClintock un Strong, Cyclopedia, Buak 4, Sied 884).
Woo sien Jesecht leet: Jesus wia frintlich un metfeelent, un daut mott secha sennen aun sien Jesecht to seenen jewast (Matäus 11:28-29). Aule Sorten Menschen sochten sikj am opp, om Help un Troost to kjrieen (Lukas 5:12-13; 7:37-38). Mau rajcht de Kjinja jleichten daut, met am toop to sennen (Matäus 19:13-15; Markus 9:35-37).
Waut eenje orrajcht jleewen äwa woo Jesus sach
Waut eenje jleewen: Eenje sajen, daut Jesus von Afrika aufstaumd, wäajen daut Buak Openboarunk siene Hoa met Woll vejlikjt un siene Feet met “blankem Koppa” (Openboarunk 1:14-15, JHF).
Woo daut es: Daut Buak Openboarunk deit “derch Tieekjen” räden (Openboarunk 1:1, JHF). Daut, waut Openboarunk äwa Jesus siene Hoa un Feet sajcht, es een Jlikjnis von woo Jesus wia no sien oppjestonen vom Doot. Daut rät nich doavon, woo am von buten leet, aus hee oppe Ieed wia. Openboarunk 1:14 (PB) sajcht: “Siene Hoa opp däm Kopp wieren aus witte Woll, witt aus Schnee”. Meent daut dan, daut siene Hoa sikj soo aus Woll späaden? Nä, daut jeit doa om de Kalia von siene Hoa. De Kalia stalt de Weisheit väa, waut hee haud, wäajen hee aul soo väl Joaren jeläft haud (Openboarunk 3:14, JHF). Dis Varsch sajcht nich, daut Jesus siene Hoa sikj no Woll späaden, krakjt soo aus dee uk nich sajcht, daut dee sikj no Schnee späaden.
Jesus “siene Feet [wieren] ut blankem Koppa, aus jläje see em Owen” (Openboarunk 1:15, JHF). Un “sien Jesecht wia soo aus wan de Sonn en volle Krauft schient” (Openboarunk 1:16, PB). Wäajen kjeene Menschen soo lat, aus dise Varzhen sajen, mott dise Vision sennen een Jlikjnis jewast, waut wiest, woo Jesus leet, aus hee ieescht vom Doot oppjestonen wia un nich mea oppe Ieed wia. Daut sajcht, daut Jesus “en een Licht wont, wua kjeena hankomen kaun” (1. Timotäus 6:16, PB).
Waut eenje jleewen: Jesus wia schwak.
Woo daut es: Jesus wia een browa Maun. Biejlikj aus de Soldoten am wullen faustnämen, säd hee gaunz brow, daut hee dee wia, no wäm see sochten (Johanes 18:4-8). Jesus mott uk sennen kjarpalich stoakj jewast, wiels hee ea een Descha wia un brukt Hauntjereetschoft toom schaufen (Markus 6:3).
Wuarom fäld Jesus daut dan aun Help, sienen Liedenspol to droagen? Un woosoo storf hee ea aus de aundre, waut met am toop omjebrocht wort? (Lukas 23:26; Johanes 19:31-33). Een Stootje ea se Jesus ombrochten, wort sien Kjarpa sea toojesat. Hee wia aul de gaunze Nacht opp jewast un haud daut ennalich uk sea schwoa jehaut (Lukas 22:42-44). Un de Juden hauden je am siene latste Nacht sea schlajcht behaundelt un dän Zemorjes doano kjwälden de Reema am (Matäus 26:67-68; Johanes 19:1-3). Aul daut muak daut, daut hee haustja storf.
Waut eenje jleewen: Jesus wia emma truarich un bedrekjt.
Woo daut es: Jesus deed krakjt sienen himlischen Voda Jehova no un von dän sajcht de Schreft, daut daut een schaftja Gott es (1. Timotäus 1:11, NW; Johanes 14:9). Jesus lieed aundre mau rajcht, woo dee kunnen schaftich sennen (Matäus 5:3-9, NW; Lukas 11:28, NW). Aul dit wiest, daut Jesus foaken schaftich leet.
Veleicht jleichst du uk dit
WICHTJE BIBLISCHE LIEREN
Wuarom kaun eena daut jleewen, waut de Schreft sajcht?
Wan de Schreft von Gott kjemt, dan mott daut een sea besondret Buak sennen.
MEA ÄWA ONS
West du met ons räden?
Räd äwa eene biblische Froag ooda lia mea äwa Jehova siene Zeijen.