Waut de Schreft doatoo sajcht

 Sikj deepen loten meent, daut een Mensch sikj gaunz unja Wota dukt. a En de Schreft läs wie mieremol doavon, daut sikj doa wäa deepen leet (Aposteljeschicht 2:41). Biejlikj leet sikj Jesus em Jordan-Riefa deepen (Matäus 3:13, 16). Een poa Joa lota leet sikj een ätiopischa Maun en “een Wota” deepen, waut doa biesied dän Wajch wia, wua hee reisd (Aposteljeschicht 8:36-40, PB).

 Jesus lieed, daut siene Nofolja sikj motten deepen loten (Matäus 28:19-20). De Apostel Petrus schreef lota uk noch mol, daut daut needich es (1. Petrus 3:21).

Waut wie en disen Artikjel seenen woaren

•  Waut bediet de Doop?

•  Lieet de Schreft, daut Bäbes mott jedeept woaren?

•  Waut bediet daut, wäm en dän Voda sienen Nomen, en dän Sän sienen Nomen un en dän heiljen Jeist sienen Nomen to deepen?

•  Es twee mol deepen eene Sind?

•  Aundre Sorten Doop, wua de Schreft von rät

•  Waut eenje orrajcht jleewen äwa de christelje Doop

 Waut bediet de Doop?

 Wan eena sikj deepen lat, dan wiest eena aulemaun, daut eenem siene Sinden leet sent un daut eena Gott vesproaken haft, emma sienen Wellen to doonen. Doa es met en, daut eena dan sien Läwen lank Gott un Jesus jehorcht. Wäa sikj deepen lat, es oppem Wajch no daut eewje Läwen.

 De Doop es een feinet Bilt doafäa, daut een Mensch sien Läwen jeendat haft. Wuarom? De Schreft vejlikjt deepen met begrowen (Reema 6:4; Kolossa 2:12). Wan een Mensch sikj em Wota gaunz unjadukt, dan wiest dee, daut dee daut Läwen, waut dee bat dan jefieet haft, begroft. Wan dee utem Wota rutkjemt, dan fangt dee een nieet Läwen aun aus een Christ, waut sikj Gott hanjejäft haft.

 Lieet de Schreft, daut Bäbes mott jedeept woaren?

 De Schreft lieet nich, daut Bäbes jedeept sellen. b Dee lieet, daut een Mensch, waut sikj well deepen loten, jewesse Bedinjungen erfellen mott. Dee mott biejlikj de Gruntlieren ut Gott sien Wuat vestonen un doano läwen. Dän motten uk siene Sinden leet sennen. Un dee mott sikj en een Jebäd Gott hanjäwen (Aposteljeschicht 2:38, 41; 8:12). Aul dit kaun een Bäbe noch nich doonen.

 Waut bediet daut, wäm en dän Voda sienen Nomen, en dän Sän sienen Nomen un en dän heiljen Jeist sienen Nomen to deepen?

 Jesus säd to siene Jinja, see sullen Menschen lieren, am notofoljen un aules notokomen, waut hee äant oppjejäft haft, un dee “en dän Voda sienen Nomen, en dän Sän sienen Nomen un en dän heiljen Jeist sienen Nomen” deepen (Matäus 28:19-20, NW). “En dän … sienen Nomen” bediet, daut dee, waut sikj deepen lat, dän Voda un dän Sän äare Macht un Stalunk aunerkjant un uk aunerkjant, woo de heilja Jeist halpt. Hia es een Biespel: De Apostel Petrus säd to eenen Maun, waut von Jeburt aun lom wia: “En Jesus Christus von Nazaret sien Nomen sto opp un go!” (Aposteljeschicht 3:6, PB). Daut es dietlich, waut daut bediet: Petrus wull sajen, daut hee dän Christus siene Macht kjand un daut hee am de Iea fa dit Wunda jeef.

•   De “Voda” es Jehowa c Gott. Hee es de Hechsta äwa aules, wiels hee de aulmajchtja Gott un de Schepfa es, dee aulem daut Läwen jejäft haft (1. Mose 17:1; Openboarunk 4:11).

•   De “Sän” es Jesus Christus. Hee jeef sien Läwen fa ons han (Reema 6:23). Wie kjennen mau dan jerat woaren, wan wie daut aunerkjanen un wieetschazen, waut Jesus doafäa jedonen haft, daut Gott sien Väanämen fa de Menschheit sikj erfelt (Johanes 14:6; 20:31; Aposteljeschicht 4:8-12).

•   De “heilja Jeist” es Gott siene Krauft, met dee hee Sachen bewirkjt. d Gott haft sienen heiljen Jeist jebrukt, om de Schepfunk to moaken, om Läwen to jäwen, om siene Profeeten un aundre Norechten tookomen to loten un om Menschen de Krauft to jäwen, sienen Wellen to doonen (1. Mose 1:2; Hiob 33:4; Reema 15:18-19). Gott haft sienen Jeist uk jebrukt, om siene Jedanken de Bibelschriewa entojäwen, daut see dee oppschriewen kunnen (2. Petrus 1:21).

 Es twee mol deepen eene Sind?

 Doa es ieremol wäa, waut eenen nieen Gloowen aunnemt. Waut es, wan deejanja aul en siene oole Kjoakj jedeept wort? Wudd daut eene Sind senn, wan dee sikj noch eemol wudd deepen loten? Eenje haben daut soo tohoolen, daut daut eene Sind es, un stetten sikj opp Efeesa 4:5 (PB), wua daut sajcht: “Daut jeft uk mau eenen Harn, eenen Gloowen un eene Doop.” Oba dis Varsch bediet nich, daut eena sikj nich noch eemol kaun deepen loten. Wuarom nich?

 Von waut daut doa rät. En de Varzhen ver un no Efeesa 4:5 sajcht de Apostel Paulus, daut woare Christen motten em Gloowen un en de Lia veeent sennen (Efeesa 4:1-3, 16). Dise Eenichkjeit kunnen dee bloos dan haben, wan dee dänselwjen Harn, Jesus Christus, nofoljen deeden, wan see dänselwjen Gloowen hauden, aulsoo de biblische Lieren äwareen vestunden, un wan see sikj aula aun deeselwje biblische Bedinjungen fa de Doop hilden.

 De Apostel Paulus selfst rod mol jewesse Menschen too, sikj noch eemol deepen to loten. Daut wia, wäajen dee de christelje Lieren noch nich gaunz vestonen hauden, aus dee daut ieeschte mol jedeept worden (Aposteljeschicht 19:1-5).

 Opp waut de Doop sikj stett. Daut eene Doop bie Gott waut talt, mott dee sikj krakjt opp de Woarheit ut de Schreft stetten (1. Timotäus 2:3-4). Wan een Mensch en eenen Gloowen jedeept wort, waut nich met de Schreft stemt, dan es dän siene Doop bie Gott nuscht wieet (Johanes 4:23-24). Dee Mensch wia veleicht opprechtich, “oba nich no Erkjantnis” (Reema 10:2, JHF). Daut Gott dän aunnämen kaun, mott dee ieescht de Woarheit ut de Schreft lieren, dan doano läwen, sikj Gott hanjäwen un noch eemol jedeept woaren. En däm Faul es daut kjeene Sind, wan dee sikj noch eemol deepen lat. Rajcht jesajcht mott dee daut doonen.

 Aundre Sorten Doop, wua de Schreft von rät

 De Schreft rät uk noch von aundre Doopen, waut nich dautselwje bedieden aus wan eent von Christus siene Nofolja sikj unja Wota dukt. Hia sent een poa Biespels:

 De Doop, waut Johanes de Deepa derchfieed. e Juden un soone, waut sikj toom Judengloowen bekjieet hauden, leeten sikj von Johanes deepen, om to wiesen, daut äant äare Sinden jäajen Moses sien Jesaz leet wieren (aulsoo daut Jesaz, waut Gott de Israeliten derch Moses jeef). Johanes deept dee, om dee fa dän Messias reedtomoaken. Soo kunnen see Jesus von Nazaret leichta aus dän Messias erkjanen un aunnämen (Lukas 1:13-17; 3:2-3; Aposteljeschicht 19:4).

 Jesus siene ieejne Doop. Aus Jesus sikj von Johanes dän Deepa deepen leet, wia daut eene besondre Doop. Jesus wia een volkomna Mensch un haud kjeene Sinden begonen (1. Petrus 2:21-22). Siene Doop wia aulsoo nich een Tieekjen doafäa, daut am siene Sinden leet wieren ooda daut hee “Gott no een goodet Jewessen” fruach (1. Petrus 3:21, PB). Siene Doop wees, daut hee reed wia, aus de vesproakna Messias, ooda Christus, Gott sienen Wellen to doonen un sien Läwen fa ons to jäwen (Hebräa 10:7-10).

 De Doop met heiljen Jeist. Johanes de Deepa un Jesus Christus räden beid von de Doop met heiljen Jeist (Matäus 3:11; Lukas 3:16; Aposteljeschicht 1:1-5). Dise Doop es nich dautselwje aus de Doop en dän heiljen Jeist sienen Nomen (Matäus 28:19). Wuarom nich?

 Doa sent mau eenje von Jesus siene Nofolja met heiljen Jeist jedeept. Daut sent dee, waut met dän heiljen Jeist jesaulft sent, wiels dee utjewält sent, om em Himmel met Christus toop aus Kjennichs un Priestasch äwa de Ieed to rejieren f (1. Petrus 1:3-4; Openboarunk 5:9-10). De millionende aundre Nofolja von Jesus woaren unja dee äare Rejierunk sennen. Dee haben de Hopninj, eewich em Paradies oppe Ieed to läwen (Matäus 5:5; Lukas 23:43).

 De Doop en Christus Jesus un en sienen Doot. Dee, waut met heiljen Jeist jedeept sent, sent uk “en Christus Jesus jedeept” (Reema 6:3, PB). Dise Doop betraft aulsoo bloos Jesus siene jesaulwde Nofolja, waut met am toop em Himmel rejieren woaren. Doaderch, daut dee en Jesus jedeept woaren, woaren dee Poat von siene jesaulwde Vesaumlunk. Hee es daut Haupt un dee sent de Kjarpa (1. Korinta 12:12-13, 27; Kolossa 1:18).

 Jesaulwde Christen sent uk “en [Jesus] sienen Doot nenn jedeept” (Reema 6:3-4, PB). Soo aus Jesus sent dee reed, aules opptojäwen, om Gott to jehorchen. Dee jäwen uk äare Hopninj opp, mol eewich oppe Ieed to läwen. Äare Doop en Jesus sienen Doot es foadich, wan dee ieescht stoawen un em Himmel aus een Jeist oppjewakjt woaren (Reema 6:5; 1. Korinta 15:42-44).

 De Doop met Fia. Johanes de Deepa säd: “[Jesus] woat junt met heiljen Jeist un met Fia deepen. Hee haft sien Jereetschoft enne Haunt un hee woat siene Draschflua gaunz reinmoaken. Hee woat sienen Weit saumlen un em Spikja oppbewoaren, oba daut Stroo woat hee met Fia vebrennen, waut nich jeit uttomoaken” (Matäus 3:11-12, NW). De Doop met Fia un de Doop met heiljen Jeist es nich dautselwje. Waut wull Johanes met dit Jlikjnis sajen?

 De Weit steit fa dee, waut no Jesus horchen un am jehorchen. Dee wudden noch mol kjennen met heiljen Jeist jedeept woaren. Daut Stroo steit fa dee, waut nich no Jesus horchen. Dee woaren to goodalatst met Fia jedeept, aulsoo fa emma venicht woaren (Matäus 3:7-12; Lukas 3:16-17).