“A Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.”​—Daniel 2:44.

A Rengedel a Dios a kabelment el ngar er a eanged. A mla metutk el Merredelel el Jesus Kristus a mo omtechei a rokui el omengedereder er a klechad e mo oterekeklii el kmo a soal a Dios a mo meketmokl er a eanged me a dirrek el ngar tia el chutem. (Mateus 6:9, 10) Tia el kabelment a diak bo lemutechei er a ngii di el kabelment er a klechad e le ngii “a diak a ulebengelel Rengedel a Rubak er kid e Osebeled el Jesus Kristus.” Ngmo er ngii a budech el diak a ulebengelel.​—2 Petrus 1:11.

“Ele Satan me ng dirrek el oudeluus er a kmo ng anghel er a llomes. Me ng diak le blosech el tekoi a loudeluus a re mesiungel er a kmo te mesiou er a Dios el meruul a soal. A ulebongel, e te mo obals er a rredemelel omerellir.”​—2 Korinth 11:14, 15.

A klsuul klechelid a mo mocholt el urerel a Diabelong e mo mokngemed er tia el chutem. Ngmo diak a omengetukel me a okodellir a rechad el okiu a klechelid. Tia mo uchul e a rokui el betik a rengrir er a “meral di ngar el Dios” a mo mengull er ngii el ngar er a ‘di ta el rolel a klaumerang’ el “loba reng me a klemerang.” Tiang a mo uchul a budech me a kltarreng!​—1 Thesalonika 1:9; Efesus 4:5; Johanes 4:23, BT.

“A Dios a ngii a mo obengterir, e mo Dios er tir. Ng mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.”​—Ocholt 21:3, 4.

A Jehovah el Dios a mo kutmeklii tiang el okiu a Ngelekel el Jesus, el ngii a tilengetengii a klengar er ngii el kirel a klechad. (Johanes 3:16) Ngar  cheungel a ulekrael er a Jesus, e a klechad a mo mecherrungel. Ngmo diak a ringel e le “Dios a ngii a mo obengterir” e mo smuld “a rokui el chiuosech er a mederir.” A diak el cherrungel el blekeradel me a ringel a mo tekoi er a mla me mong; “a re melemalt a mo ungilbesrir el kiei er a chelsel a beluu e mo oubeluu er ngii el di blechoel.”​—Psalm 37:29.

“Ng [Jesus Kristus a] mildechemii a drakon, el ngikel bersoech er a rechuodel, el ngii a Diabelong, me a lechub e ng Satan, e lilechetii er a bombatel el 1,000 el rak. E a anghel a mildeklii er a diak a btil deliobech, e chilsmerii, e chilsechesii, me bo lak el sebechel el mengeblad a beluu.”​—Ocholt 20:2, 3.

A rokui el ongetikaik er a Satan a mo diak er sel taem el ngii me a remekngit el chelid a mo merenged e mo obidokl er a “diak a btil deliobech,” me ngmo diak el sebechir el meruul a ngii di el ngerang. Te mo diak lousbech er sel mekngit el klisichir el omtebechel a urerir a rechad. Ngkol ua ngera el deurreng a bo dodengelii sel bo dekiei er a beluulechad el diak a ongetikaik er a Satan me a remekngit el chelid er ngii!

A Jesus a millekoi el kirel a taem er a “kloul ringel” el ngii a mo ulebengelel a “uriul sils.” Ngdilu el kmo: “Le isei e ngduubech a kloul ringel, el direkak le borngii ra uchelel a belulechad el me lmuut er chelechang, ma ka le borngii er chelechal mong.”​—Mateus 24:21, BT.

A ringel a kmal mo klou el belkul a kmo ngmo duubech a meklou el tellemall el lmuut el meklou er a ngii di el tekoi el mla duubech er a ngar er a mong. Me a ulebongel er aika el tekoi a mo er ngii er “sel mekemad el mor ngii er sel klou el Sils er a Dios el Olab a Bek el Klisiich,” el dirrek el mokedong el “Armakedon.”​—Ocholt 16:14, 16.

A rechad er a bek el beluu el betik a rengrir er a llemalt a omes el bedul a ulebengelel tia el mekngit el blekeradel. Molatk a bebil el klengeltengat el bo lengai el ngar cheungel a Rengedel a Dios.

A “kloul seked” a mo kiei el ngar er a budech er a chelsel a beches el beluulechad: A Tekingel a Dios a kmo a diak lemochur el “kloul seked” er a rechad a “uleak sel kloul ringel” e mo kiei el mo cherechar el ngar er a chelsel a melemalt el beches el beluulechad. (Ocholt 7:9, 10, 14, BT; 2 Petrus 3:13) Te mo ochotii el kmo a osebelir a mla er a Jesus Kristus, el ngii a “Ngelekel a Sib er a Dios el melubet a kngtil a beluulchad.”​—Johanes 1:29.

A meklou el klungiaol a mo er ngii el okiu a osisecheklel a Dios: Ngar er a beches el beluulechad, e “a beluu a mo mui er a klemedengei er a RUBAK.” (Isaia 11:9) Tia el osisecheklel a Dios a mo uldimukl er ngii a osisechakl er a rolel a dekiei el ngar er a budech el obengterir a rokui el chad e mo ungil mengetmokl er a beluu. A Dios a tibir el kmo: “Ngak a RUBAK el Dios el olsisechakl er kemiu el mo ungilbesmiu, ak ngikel omekrael er kemiu er sel rael el kiriu el okiu ngii.”​—Isaia 48:17.

A rebetik er a rengud el mla mad a mo mekiis er a debellir: Sera lengar tia el chutem a Jesus, e ngulekisii a sechelil el Lasarus. (Johanes 11:1, 5, 38-44) E seikid e ngulechotii sel klou el ureor el bo longetmokl er ngii el ngar cheungel a Rengedel a Dios.​—Johanes 5:28, 29.

A budech me a llemalt a mo er ngii el mo cherechar: Ngar cheungel a omengederederel a Kristus, e a chelebirukel el omeruul a mo tekoi er a ngar er a mong. Kede mekerang e medengei? E le Jesus, el ngii a sebechel el menguiu a reng, a mo ousbech er tia el klemedengei er ngii el oukerrekeriil er a melemalt me a chebirukel el chad. Tirke el diak el kengei el melodech a mekngit el blekerdelir a diak bo el kiei er a beches el beluulechad er a Dios.​—Psalm 37:9, 10; Isaia 11:3, 4; 65:20; Mateus 9:4.

Kede mla smaod a di bebil er aike el betok el ulaoch er a Biblia el melutk el kirel a kmal ungil taem er a ngar medad. A Rengedel a Dios sel bo longedereder er tia el chutem, e a “cherrungel el budech” a mo er ngii el diak a ulebengelel. (Psalm 37:11, 29) A rokui el uchul a ringel el omekringel er a klechad a mo diak. Ngulterekokl a rengud er tiang e le Dios a tibir el kmo: “Chelechang e ak remuul a rokui el tekoi el mo beches! . . . Ele ikal tekoi a merang e ulterekokl el mo tmaut.”​—Ocholt 21:5.