A redil el ngklel a Sylvia el oureor el omekerreu er a remechuodel a dilu el kmo: “Ak mlo er a college el obengterir a rechad el leko te kmal chad er a klechelid. Engdi te di cheat sel lolai a test e ousbech a mekngit el kar. A klechelid a kmal dimlak a ngera el lerellii er a klengar er tir.”

A chad el ngklel a Lionel a kmo: “A rechad er a urerek a di omulak e oudengua el mei er a ureor el kmo te smecher alta te diak el secher. Me alta ngar er ngii a klechelid er tir engdi ngdiak lousbech er ngii, el di uai a kingall me a tebel el ngar er a blai el di kirel a ues e merekong.”

A klechelid a diak lolisiich a tekoi er a kldung er a chelsel a klengar er a ruumesingd el chad. A rebetok el chad er chelechang a “leko te chedal a chelid” engdi ng “diak er omerellir ochotel a klisichel.” (2 Timothy 3:5) Me a remengeteklel a klechelid er tir a diak lolecholt a ungil el kerebai me a ka lomesterir a omellach er a Bades me bo el sebechir el kiei el oltirakl a tekoi er a kldung. Sei a uchul me a rebetok el chad a oumerang el kmo a Dios a diak el semeriar el kirel a rolel a klengar er tir.

A Biblia a ochotii el kmo a Dios a sebechel el omelechesiu a tekoi e a blekerdeled a ngar er ngii a ultutelel er ngii. A rechad er a Israel er a bo lomtok er a Dios, e te ‘rirellii el mo mekngit a rengul!’ (Psalm 78:40) Me nguaisei, engdi ngar er ngii a klou el “deurreng er a eanged” sel sekum a chad a mera el ngar er a rengul e ngmodech a cheleuid el blekerdelel. (Lukas 15:7) Me sel sekum a chad a mo oba omereng el saul el kirel a ungil el blekerdelel a Demad el ngar er a eanged, e a bltkil a rengul el mo er a Dios a mukeroul, el rullii el mo betik a rengul er aike el lebetik a rengul er ngii a Dios e ouketui aike el louketui a Dios.​—Amos 5:15.

A babier el The Deseret News er a Salt Lake City, Utah, U.S.A., a melekoi el kmo, a Resioning er a Jehovah a “olengeseu er a rechad el mo ungil a deleuill er tir er a chelsel a telungalek e mo ungil chad er a beluu.” Tia el simbung a melemolem el kmo: “A rechedal a oltirakl a ngarbab el omellach el kirel a tekoi er a kldung. Te oumerang el kmo a omelamech el dekool, imis el omelim el rrom, usbechel a mekngit el kar, bakutsi, deleboes el omeruul me a mengolchotaor a sebechel el tomellii a deleuill er tir me a Dios.”

Ngmekerang a omesuub el kirel a blekerdelel a Dios e ngosuterir a Resioning? A Sylvia el dulsaod er ngii er a uchei a melekoi el kmo: “Ngar er tia el ureor el olengeseu er a resmecher e ngkmal klou a cheleblad el omeruul. Me ngbeot er kid a mechetikaik el mo meruul er tia el tekoi. Engdi a klemedengei er ngak er a uldesuel a Jehovah * el kirel tiang a ngosukak el mo meruul a melemalt el tekoi. Ngmera el dmeu a renguk e ngar er ngii a budech er a klengar er ngak.” A Sylvia a ulterekokl a rengul el kmo ngii el kiei el oltirakl er a klaumerang er ngii a uchul me ngmla mo ungil a klengar er ngii.