“NGAR er ngii a urungulek.” Sera August 28, 1963 e a Martin Luther King, Jr. el ngii a chad er a Merikel el uleldubech a llemeltir a rechad, a millekoi aika tekoi el ngar sel merael a chisel el cheldechedechal. Ngika el chad a uluusbech aika el tekoi el olecholt er a urungulel el kmo a ta er a klebesei e a rechad a mo oldeu a rengrir er a klengar el diak a omengetukel er ngii. Me alta aika el tekingel a mlo er tirke el kiei er a Merikel, engdi a rechad er a bek el renged a dirrek el mla mo oba osisiu el uldasu.

A edei el buil er a uriul er a cheldechedechal a King, e a kuk betok er a 100 el beluu a kilengei er sel United Nations Declaration on the Elimination of All Forms of Racial Discrimination er sera November 20, 1963. Ngdirrek el mla er ngii a kuk bebil er a tekoi el mileketmokl er a uriul er tiang. Aika el rokui el tekoi a mo uchul e ngduubech a ker el kmo, Ngerang a mla meketmokl?

Sera March 21, 2012 e ngike el Secretary er a U.N. el General Ban Ki-moon a millekoi el kmo: “Ngkmal betok a babier me a tekoi el mla meketmokl el merrob a tekoi er a omengetukel me aike el blekeradel el uai ngii. Me nguaisei, engdi a omengetukel a dirk melemolem el uchul a ringel el kirir a rebetok el miliol el chad el meliuekl er a beluulechad.”

Me alta ngar er ngii aike el beluu el mla mo diak a bebil er a tekoi er a omengetukel er ngii, engdi a ker a duubech el kmo: Aika el tekoi el mla meketmokl ngmla choroid aike el ngar er a rengrir a rechad me a lechub e ngmla osisecheklterir el mo omart a blekerdelir el mengetukel er a rechad? A rebebil a oumerang el kmo a chouaika el tekoi a di merrob a klekakeakl er a delongelir a rekakerous el chad, engdi ngdiak el sebechel el torebengii a omengetukel. E ngera uchul me ngdiak? E le klekakeakl er a delongelir a rekakerous el chad a sebechel el moues e dirrek el uchul e a chad a mutaut er a llach, engdi a omengetukel a ngar er a rengrir a rechad me ngmeringel a domtebechel er ngii.

Me a leuaisei, a ngii di el tekoi el meketmokl el mo merrob a omengetukel a kirel ngodechii a uldesuel me a omerellel a chad el kirir a rechad er a ngodech el beluu. Tia el tekoi ngsebechel el meketmokl? A leuaisei, e ngmekerang e meketmokl? Ka me bo domes a bebil er a tekoi el dilubech el ngosukid el mesa el kmo a rechad a sebechir el ngmodech a blekerdelir e dirrek el ngar er ngii a sebechel el ngosuterir a rechad el mo meruul el uaisei.

Linda: Ak milechell er a beluu er a South Africa, e ulemes er a rechad el diak el becheleleu el kmo te diak el ngerang, e diak a skulir, e diak el sebeched el oumerang er tir, e mle kirir el di mesiungir a rebecheleleu el chad. Me alta e ngdimlak kudengelii tiang, engdi ak milengetukel er a rechad. Ak ulemuchel el melodech a blekerdelek er sera bo kusuub er a Biblia. Ak silubii el kmo a “Dios a meral di osisiu er a rengul a re bek el chad” e a rengud a kuk klou a ultutelel er a chiro er a bedenged me a omelekoi el dolekoi er ngii. (Rellir 10:34, 35; Osisechakl 17:3) Sel bades er a Filipi 2:3 a ngilsukak el mo medengei el kmo a lsekum a kumes er a rechad el kuk ngarbab er ngak, e ngsebechek el mo cheroid er a omengetukel. Ngak el kiei el oltirakl a omellach er a Biblia a uchul me ak mla mo ungil el medengelterir a rebebil alta ngodech a chiro er a bedengir. Me chelechang e ak mla mo mimokl er a tekoi er a omengetukel.

Michael: Ak mlukeroul er a basio er a Australia el ruumesingd el chad er ngii a becheleleu. Ak kmal mlo  mesisiich el mengetukel er a rechad er a Asia, el ileakl a rechad er a Sina. Me sel kumekall e kisterir, e ak nguu a mado er ngak el mo er iou e dmu mekngit el tekoi el uai a “Bo mrei!” Sera kumuchel el mesuub a Biblia, e ak mlo medengelii a rolel a Dios a lomes er a rechad. Ngbetik a rengul er tir alta te chad er a kakerous el beluu me a lechub e ngodech a teletelir. Me tia el bltikerreng a kmal mlo soak e mlo uchul e a ngesechel a renguk a ulebult el mo bltikerreng. Tia mera el mengasireng el tekoi el dilubech el mei er ngak. Chelechang e ngdmeu a renguk el obengterir a rechad er a ngodech el beluu el kakerous a blekerdelel a klengar er tir. Tiang a mla ngodechii a rolel a klengar er ngak e mla meskak a klou el deurreng.

Sandra: A delak a mle redil er a Umunede el ngar er Delta State er a Nigeria, e a telungalek er a demak a kuk chad er a Edo State e melekoi a tekoi er a Esan. Me tir el mle chad er a kakerous el basio a uchul me a rechedal a demak a di milengetukel er a delak el mo lmuut er a kodellel. Tiang a mle uchul e ak tilbir el kmo ngdiak kungedecheduch er a ngii di el chad el melekoi a tekoi er a Esan e diak bok bechil a chad er a Edo State. Engdi sera kumuchel el mesuub er a Biblia, e ak ulemuchel el omes a tekoi el ngar er a ta er a rolel. A Biblia a melekoi el kmo a Dios a diak longetukel er a rechad me a ngii di el chad el meluu er ngii a bo lekengei er ngii. Me a leuaisei, e ngak ak mekerang e mengetukel er a rechad el ngodech a kleblillir me a omelekingir? Ak ngildechii a uldesuek e mlo ungil a delongelek ngak me a rechedal a demak. Me ngak el oltaut a omellach er a Biblia a uchul me ngdmeu a renguk e mededaes a uldesuek. Ngdirrek el mla ngosukak el mo ungil a deleuill er ngak me a rebebil el tir a chad er a ngodech el beluu el kakerous a omelekingir me a blekerdelel a klengar er tir. E sera bok bechiil e ak mlo bechil a chad er a Edo State el melekoi a tekoi er a Esan.

Ngera uchul me a Biblia a mle sebechel el ngosuterir tirka el chad me a rekuk bebil el mo cheroid er a klauketui me a omengetukel? E le Biblia a Tekingel a Dios me ngar er ngii a klisichel el ngodechii a rolel a lomdasu a chad el kirir a rebebil. A Biblia a dirrek el  ochotii a lmuut el ta er a tekoi el dousbech er ngii el mo merrob a rokui el rolel a omengetukel.

Me alta a klemedengei er kid er a Biblia a sebechel el ngosukid el omtebechel e choroid aike el mesisiich el uldesued, engdi ngar er ngii a eru el tekoi el kirel meketmokl me bo el sebechel el meterob a rokui el rolel a omengetukel. A kot e ngar er ngii a klengit me kid a diak demecherrungel. A Biblia a bleketakl el melekoi el kmo: “Ng diak a chad el diak a kngtil.” (1 King 8:46) Me alta kede melasem el mengeroid er kid er a omengetukel, engdi kede di mo chelebangel a osisiu el tekoi el uai a apostol el Paulus el milluches el kmo: “A le soak el meruul a ungil, me ngii a di mekngit a bo kngiltii el meruul er ngii.” (Rom 7:21) Me a leuaisei e ngblechoel el mo er ngii a taem e ngme “tuobed a mekngit el uldasu” el mo uchul e kede mo mengetukel er a rechad.​—Markus 7:21.

A ongerung e ngar er ngii a ongetikaik er a Satan el Diabelong. A Biblia a mesaod er ngii el kmo “ng omekoad er a re chad” e melekoi el kmo ng “mengeblad er a beluulchad el rokir.” (Johanes 8:44; Ocholt 12:9) Tiang a uchul me ngkmal klou a omengetukel e uchul me ngmeringel er a rechad el mo torob a okodellir a rechad me a omengetukel me aike el blekeradel el uai ngii.

Me a leuaisei, a uchei er a bo lak a omengetukel, e ngkirel el mo mokngemed a klengit me a rechad a mo mecherrungel e mo diak a ongetikaik er a Satan el Diabelong. A Biblia a ochotii el kmo a Rengedel a Dios a mo meruul aika el tekoi.

A Jesus Kristus a ullisechakl er a rulebengkel el mo meluluuch el mo er a Dios el ousbech aike el tekoi el kmo: “A Rengedem le mei; bo le motaut a soam er a beluulchad el ua ingii er a eanged.” (Mateus 6:10) A Rengedel a Dios a mo torob a rokui el bedengel a chelebirukel el uldimukl er ngii a omengetukel me aike el blekeradel el uai ngii.

Sel lemei a Rengedel a Dios e bo longedereder, e a Satan a mo ‘melechet er a bombatel’ me a lechub e ngmo meterob “me bo lak el sebechel el mengeblad a beluu.” (Ocholt 20:2, 3) Seikid e ngmo er ngii a “beches el beluulchad” me a lechub e ngklechad, el “rokui el tekoi er ngii a di llemalt.” *​—2 Petrus 3:13.

Tirke el mo kiei er a chelsel tiakid el blekeradel a mo mecherrungel el diak a kngterir. (Rom 8:21) Tirka el chederedall er a Rengedel a Dios a mo “diak a ngeral kdekudel ma lechub e ng mekngit” el loruul. E ngera uchul? E le “beluu a mo mui er a klemedengei er a RUBAK.” (Isaia 11:9) Ngar seikid el taem, e a rokui el chad a mo mesuub el kirel a rolel a Jehovah e mo oltirakl er a kerebil el ullecholt a bltikerreng. Tiang a belkul a kmo ngmo diak a rokui el rolel a omengetukel, “ele Dios a diak a soal ma chetil el chad.”​—Rom 2:11.