Ngar er a Biblia, e a “klaumerang” a mesaod er a klaumerang er a chad el ngar er ngii a bleketakl el olechotel. Me a chad el oumerang er a Dios a ulterekokl a rengul el kmo a Dios a mo otaut a rokui el telbilel.

A Moses a mirruul a tekoi el mle ultuil a klaumerang er ngii er a telbilel a Dios. (Genesis 22:15-18) Ngmla er ngii a techellel el mo kiei el ungilbesul a klengar er ngii er a Ekipten, engdi ngchilitii tia el techall e “bai mle soal mo chuarm el obengterir a re chedal a Dios, e dimlak el soal el ngar a tedeb el deurreng er a klengit.” (Hebru 11:25) Tia el omerellel ngdi mle mereched el meruul er ngii e mlo ouuchel a rengul er ngii er a uriul? Ngkmal diak, e le Biblia a melekoi el kmo “ngmle meduch a rengul el outekangel el ua lulemes er a Dios el ngikel diak le moues.” (Hebru 11:27) A Moses a dimlak a ta el bo louuchel er a rengul er a omelilt el lurruul el oltirakl er a klaumerang er ngii er a telbilel a Dios.

A Moses a dirrek el millisiich a klaumerang er a rebebil. Ka di molatk er sel taem el rechad er a Israel a ua bla lemecheseches er a delongelel a Bekerkard el Daob me a resoldau er a Farao. Te kmal mlo medakt me te uleldiu el mo er a Jehovah me a Moses. Me ngmilekerang a Moses?

Nglocha dimlak lodengei el kmo a Dios a kmedu el mo omii er a Bekerkard el Daob me bo el sebechir a rechad er a Israel el chemiis. Engdi ngmle ulterekokl a rengul el kmo a Dios a mo kutmeklii a tekoi el mo omekerreu er a rechedal. Ngdirrek el mle soal a rekldemel el chad er a Israel a bo loba osisiu el klaumerang. Kede menguiu el kmo: “Ma Moses a ulenger er a re chad el kmo, ‘Lak kom medakt! Mkilou a rengmiu, e bo momes a ikel bo loruul a RUBAK er chelechang a bo lolsobel er kemiu.’” (Exodus 14:13) Me ngmlo sebechel el ngosuterir el mo mesisiich a klaumerang er tir? Nguaisei, e le Biblia a melekoi el kmo: “A re chad er a Israel a uluumerang a uchul me te mlo imuul er a Bekerkard el Daob el ua luleak a medirt el chutem.” (Hebru 11:29) A klaumerang er a Moses a mlo uchul a klungiolel ngii me tirke el mlo oumerang er a Jehovah.

Ngsebeched el mo ua Moses sel doruul a omelilt er kid el olecholt el kmo kede kmal el oumerang aike el telbilel a Dios. El ua tiang, a Dios a tibir el kmo ngmo meskid aike el dousbech a lsekum kede nguu a omengull er kid el mo er ngii el mo kot er a klengar er kid. (Mateus 6:33) Ngmera el tekoi el sebechel mo meringel er kid a doltngakl a tekoi er a klechad, e le tiaikid a uldesuir a rebetok el chad. Engdi ngulterekokl a rengud el kmo sel domekbeot er a klengar er kid e derellii a omengull er kid el mo kot, e a Jehovah a mo meskid aike el rokui el dousbech. Ngtibir el kmo: “Ng kmal diak bo kchitau ma ka bo kubes er kau.”​—Hebru 13:5.

Kede dirrek el melasem el olengeseu er a rebebil el omekeroul a klaumerang er tir. El ua tiang, a ruungalek a medengei el kmo ngklou a techellir el omekeroul er a klaumerang er a rengelekir. Me sel lorael el mo meklou e ngkirir el mo medengei el kmo ngngar er ngii a Dios el mla meskid a llechul el kirel a llemalt me a chelebirukel. Ngdirrek el kirir el mo oumerang el kmo a doltirakl a llechul e ngmo uchul a kot el ungil rolel a klengar. (Isaia 48:17, 18) Me a ruungalek a mesterir a rengelekir a mekreos el sengk sel lengesuterir el mo oumerang el kmo, “ng ngar ngii a Dios, e ngii a omesterir omeksullir tirkel osiik er ngii.”​—Hebru 11:6.