Nò. En bes di prohibí plaser seksual, Beibel ta bisa ku e ta un regalo di Dios pa pareha kasá. Dios a krea hende “hòmber i muhé” i a mira ku loke el krea tabata “masha bon.” (Génesis 1:27, 31, Beibel Santu) Ora el a uni e promé hòmber i muhé den matrimonio, el a bisa ku “nan lo bira ún karni.” (Génesis 2:24, Beibel Santu) E union akí a enserá ku nan por tin un banchi di amistat íntimo i huntu por haña plaser den relashon seksual.

 Beibel ta deskribí e plaser ku un esposo por haña den matrimonio ku e palabranan akí: “Alegrá bo den e esposa di bo hubentut . . . laga su pechunan satisfasé bo tur ora; sea semper enkantá ku su amor.” (Proverbionan 5:18, 19, Beibel Santu) Dios ke pa esposanan tambe haña plaser den relashon seksual. Beibel ta bisa: “Tantu e hòmber komo e muhé mester kumpli ku nan obligashonnan matrimonial.”—1 Korintionan 7:3, Beibel na papiamentu koriente.

Un regalo solamente pa pareha kasá

 Dios ke pa solamente hende hòmber i muhé kasá tene relashon seksual pasobra Hebreonan 13:4 ta bisa: “Laga matrimonio ta onorabel den bista di tur hende, i tene e kama matrimonial sin mancha, pasobra Dios lo husga esnan ku ta kometé fornikashon i adulterio.” Parehanan kasá mester keda fiel na otro i kumpli ku e promesa ku nan a hasi na otro. Nan lo ta mas felis ora nan no ta buska pa satisfasé nan mes deseonan, sino ta apliká e prinsipio bíbliko akí: “Tin mas felisidat den duna ku den risibí.”—Echonan 20:35.